Islam Ṭhang Loin Baibul Indik A Tim ? - L.B.Tuolte

A’n dik thei nawh. Pathienin Hagar naupa, Ismael mal a sawm zo hnung, kum iemani zat hnungin Sari naupa, Isak mal a sawm nawk leiin Arabhai le Israelhai  buoina chu hi taka inthawk inphumruk a ni tah. Isakin a naupa Esau, malsawmna a  pek naw leiin a hnung le hma hril ding a bo der angin Hagar naupasal Ismael khan  Pathien malsawmna chang naw sien a hnung le hma hriet ding bo ve der ding bah!

Hagar naupa Ismael thlahaiin khawvel leilung hausaka hmun popo an hluo vawnga. Chuchu tulaia Arab Musalman ramhai, rambung 23 an nih. Khawvel leilung hmun  khanna (strategic location) petrol, khawnvartui le alkatara tamna ram an nih. Anni hi Ismael thlahai ni ngeia hril; an ni khawmin an inngai bawk. An ram del khawmin a namdet bawk. Ismael thlahai hi Pathienin mal a sawm a. Hnam ropui le thilthawthei ding le ram hnienghnar hluo dingin a ditsakna a pek. Sak tieng lailung (Middle-East) Iran le Israel ram tiemsa loin an del vawng. Iran hi Persia hnam, Hagar thla laia tiemsa an ni nawh.

Khieng tieng pangah, Sari tuhai, Pathien vekin mal a sawm nawk thung a.  Pathien bawkin Hagar naupa le Sari naupa kha mal a sawm leiin vawisun khawvel buoina bul chu a nih. Zinga le zing nawk chen khawmin la buoi  pei  ding a nih. Hnam 12 veve an ni nawk nghal a. Arab muslimhai le Israelhai chu buoi ding le iner ding renga Pathien ruot ni sien ahawi. Atizie naw hle. Hi karlakah, a hun loa pieng  kohranhai ei lo inrawl  ve nawk a.

Ram inchu chauh an buoina ni sien azie um ding bah. Ram nekin mihriem a inthawk itthikna piengsuok hi a bulpui chu a nih.  Sari naupasalhai theida ding hi Arab Musalmanhai, Hagar naupasalhai lekhabuah sabjek  pawimaw (compulsory subjet)  a ni nghal sih a. Inrem ngai naw hrim hrim an tih. Anni kar thubuoi hin khawvel a nghawng siet a nih.

Abramham nau seng, a then malsawmna chang le chang naw an um. Keturah leh naupasal iemani zat an nei. Hagar naupa le Sari naupa chauh Pathienin mal a sawm hi asan mumal Baibulin a ziek nawh. Khawvel politic/history invir peiin asan afie chau a nih.  Malsawmna chang lo hai hnung le hma hriet ding a um nawh.

Hagar  tuhaiin rambung 20 neka tam, kilometer maktaduoi tam tak an del laiin Sari naupa chu ram, ar hmai ruol a hluo ve a. Hagar a nauhai inthuruolin sukchimit tumin an beihrawn zingzing hlak. Sari naupa hin ar hmai ruol chau ram hluo sienkhawm tlawm nekin avung deudeu el lem a. Thawk iemani zat Hagar tuhaiin that chimit tumin an beiruol tah. ‘Dragonin Nuhmei, naupasal neitu chu a hnawt thlur a,’ ti ziek a ni sih a. An tum nasa  leh anni (Hagar rawihai) a sie lemin an thang nawk hlak.

Kum 2005 a inthawk Iran president (Mahmoud Ahmadnidejad) in Israelhai leihnuoia inthawk sukchimit tumin an hrosa zingzing hlak. Hi le inzawmin ‘Iran Nuclear Bom’ ti hi ama thupui a nih. Chuleiin, tulai khawvel politics (International politic) ngaituo phak chen lungkham chu: ‘Sari naupa hin Persian/Iran hi iem a law reng’ tia dingdilipa an thlir chu a nih.

Hadasa (Esther an ti bawk) vanglai huna Mordekai le Haman chanchin lungrilin a hung inlang ve nghal a. Historian hai  hril danin ‘history repeats itself’ an tih. Ei tawnga umzie ni awm chu: history hi ama khatin a’n virkuol nawk hlak’ tina ni awm a nih. Hamanin Mordekai, Judapachal  khaihlum dingin a buotsai mek laiin ama (Haman, Agag mi) khaihlumin a um lem a. Historian hai thuvar a’ndik hlak a ni chun asie lem ding chu hril a ngai nawh.

Hagar naupasalhai lungkham bangna chu Sari naupa (Israelhai) leihnuoia inthawk nuoibo a nih. Chuleiin, Hagar tuhai duthusam chu Sari tuhai thang loa leihnuoi hluo hi a nih.  Ismael thlahai, abikin Musalmanhai khawmin Messiah pakhat,  IMAM MAHDI an nghak ve a. Leihnuioa inthawk Israelhai an chimit hma chu IMAM hi a hung inlang tum bawk si naw leiin Sari tuhai nuoibo chu an thaw makmaw a nih. An sukchimitna dingin Iranin  thang a khaw nasa hi awm reng a nih.

Ismael thlahai hi iemani chenah an mit a’n del ni sien a hawi. Vawisuna Israel ram hluotu, Israelhai khu nuoi 60 vel chauh an nih. Israel ram nekin puo tieng an tam lem ti hi Iran hin an hriet nuom naw ni  lem a tih. Israel ram puo tieng maktaduoi tam tak iengtin am nuoibo anta? Hi bakah, BC 700 vela inhmang, hnam 10 hai kha an umna tukhawmin ei hriet nawh. Hnam pakhat, Pathien hnam thlang nawk nghal, nuoibo/that chimit dinga khek-khek chu Setan a inthawk naw ni thei ring a um nawh. Leihnuoia inthawk Israelhai that chimit an ni chun Pathien nekin Setan a hrat lem tina ni bawk a  tih.

Israelhai leihnuoia inthawk an chimit a; Setan a lo hrat lem chun tulaia Setan bie pawl (Setan zui pawl) an changpar hleng a tih.

Sari   naupasalhai lungkham bangna khawm an Messiah hung  inlang ding chu a nih. Messiah inlang hmaa Tempul muolah Musalmanhai hmun thienghlim ngirna hmunah Juda Tempul indin tum an ni bawk.

Kristien tarmit hmanga ei thlir chun Ismaelhai Messiah hi belchiengdawl a ni nawh. Tienlai khan Imam pakhat a umna hriet loin a boral an tih. Ama chu Imam Mahdi, hung inlang nawk dinga an beisei chu a nih. Kristienhaiin ei beisei chu ISU ‘ka hung nawk ding’ tipa kha a nih. Sari tuhaiin Isu an ring si naw leiin an beisei hi hrietchieng a ni nawh.  

Khawvel sakhuo pathumin MESSIAH hran seng ei beisei kuhi ei inrem thei nawna san pakhat a nih. Tu Messiah tak am aw!

Baibul hi Zawlneihai le mi dang dang ziek a nih. Mihriem remhrietna ringawta ziek chu ring a um nawh. Abikin Daniel le Thupuong hi Hrillawkna lekhabu (Prophesy Book) an ni leiin mihriem  varna le remhrietna khel hmanga ziek chu an nih. Chuleiin, Judahai  lekhabu  ni sienkhawm Musalman sakhuo indin/hmu suok ding khawm a hmai nawh. Musalmanhai le belkawp thei thu  iemani  zat ziek a nih. Thu hmai thupa ziek an ni leiin minaran hrietsuok/ ngaituo suok ding an ni nawh.

Musalman sakhuo le hmetkawp thei  Baibula ziek thenkhat tarlang ei tih.

Daniel 12:11 ‘Nitina pumraw thilhlan suktawp a nia inthawk sukramtu tirdakum sie a hung ni hun chen inkarah ni 1290 (sangkhat le zahni le sawmkuo) tlang a  tih.’ Danielin a hrila inthawk kum sang neka tam hnunga tlung dinga hril  a nih.

Solomon tempul huongsunga (complex) hin Mosalman hmun pawimaw pahni a ngir a. Chu hai chu: Dome of the Rock le  Al-Aqsa Mosque an tih.  ‘Sukramtu Tirdakum, a ngir nawna ding hmuna ngir’ kha Dome of the Rock hi a nih. Dome of Rock hi Umayyad Caliph Abdal-Malikin a bawl a nih. 688 A.D khan a bawl tan. Judahai ta dinga tirdakum le sukramtu, an thil inhlan zingzing sukbotu chu  Tempul Muol (Temple Mount) a Mosalman hmun thienghlim chu an nih. 

Judahai kum khata Ni 360 (Lunar Year) a um a; vawisuna calendar ei hmang hin ni 365 (Solar Year) a um. Judahai calendar hmaga ei inkhi chun kum 1290 a tling thei a. Daniel hi Juda mi a ni leiin Judahai calendar a hmang. Hrillawkna (Prophesy) ah ‘Ni’ ti ziek hi ‘Kum’ ani hlak. Vawisuna ei kalendarah kum 1272 a nih. B.C 583 hi Judahai pumraw inhlan tawp hun vel a nih. Hi nia a inthawk 688 A.D Dome of Rock ngir chen hi kum (Ni) 1290 annawleh ei kum tiem danin Kum 1272 (Ni  1290 x.986=1271.9/1272 )  a nih.

Hniek phawi der loin Danielin a lo hril kha tuhin a’n dik zie hmu thei a nih. Musalmanhaiin Tempul muol an hluo ding hi Zawlnei Danielin a lo hmu dai tah. Iengchen am an hluo ding ruokchu hril thei a la ni hri nawh.

Pahnina, Vantirko panganain tawtawrawt a hang mut phingin vana inthawk arasi pakhat a tla a. Ama chu Khurkuoruom mawng nei lo (Botomless pit) chabi an pek a (Thupuongsuo 9).

Hi arasi le chaibi hi ‘Prophet Mohammad le Koran’ tiin Bible Scholar thenkhatin an hrilfie. Belkawp thei a lo ni reng bawk a. Vana inthawka arasi tla hi mihriem, Musalmanhai Prophet Mohammad, Arabia ram lalsungkuo (royal family) ni si lalna chang lo a nih. Chuleiin, Zawlnei Johanin thiem deuin, arasi tia a hril chu a nih. Setan chu a ni thei nawh. Khurkuoruom mawng nei lo chaibi hi Koran leh belkhawp/ hmetkawp thei a ni bawk. Koran hmang hin mihriem thlarau maktaduoi tam boralna khawpui tieng an fetir. Khawvel mihriem a zatve vangin an zui chu Koran hi a nih.

Hieng anga thilthawthei lekhabu hi Baibul ziektu, abikin Zawlnei Daniel le Johanin an hmu thel ring a um nawh. Anni pahni hi Pathien Zawlnei ni zingin khawvel politics (history) an hril uor lem. Daniel le Thupuongsuo hin thuruk tam tak a um. Pathienin khawvel politic a thlir dan a ni leiin tiem  ringawta hriet ding a ni nawh.

Zawlnei Johan hin thu hmai thupin Musalmanhai chanchin a lo ziek ni dingin a’n lang. Minaran hriet thei dinga ziek a ni naw reng a. Thupuongsuo bung 9na hrietfie dingin  Sekiular history leh ei suikawp angai. Sakawr chungchuong mihai inthuom dan  hi  Musalmanhai nunchang char a nih.

Ringtuhai chu a hun loa pieng ei ni leiin Hagar le Sari buoina karah iengkhawm thaw ding le chan ei nei ve nawh. Kristienhai chu Hagar naupasalhaiin an theida em em thunga. Hmelma nambar pahninah an  sie hiel bawk. Hmelma nambar pakhatna chu Sari tuhai.

I thlahai (rul thlahai) le nuhmei thla indotir ka tih’ Pathienin a tih. ‘Nuhmei thla’ tia tiem thei khawvelah pawl hnih an um. Pakhatna, nuhmei thla a ti hai Israelhai an nih. Thupuongsou 12 Dragon le Nuhmei thla chanchin a nih. Hi taka nuhmei thla hi Israel hnam char a kawk. Nuhmei, naupasal neitu chu ‘Dragon chun a hnawt thlur  a’ tiin a ziek. Kum zabi pasaria (Islam sakhuo hmu suok hun) inthawk vawisun chen Musalman, Ismael thlahaiin Israel hi sukchimit dingin an hnawt thlur zing. Johanin a hmuchieng hmel khawpel.

Pathumna, Nuhmei thla pawl dang chu kohranhai an nih. Kohranhai hi Isu thina le tho nawkna lei pieng an nih. Ismael thlahaiin (Islam sakhuo zuituhai)   kristienhai an theida hle. ‘Rul thlahai le Nuhmei thlahai indotir ka tih’ ti thu hi vawisun khawvel politics hi a ni thei el naw ding? Khawvel politics hi Islam le Kristien kar ni lo maw? Annawleh Islam le Judahai kar a nil naw ding?

I thlahai (rul thlahai) le Nuhmei thla indo tir ka a; nangin a kekhawng chukpek i ta; amain i lu vuohawp a tih’. Ringtuhai le Judahai hi Musalmanhaiin an theida naw chun Pathien thu  indik thei der lo ding a nih. Pathienin Hagar naupa mal a sawm hi Pathien thu sukdikna ding lem a lo nih. Pathienin Hagar naupa Ismael mal a sawm hi thawpal ni loin tum reng, Ama thu indikna ding a ni lem.

3^rd Changer (October), 2012