SIEHRÈ - L.Keivom

Mani doralah insiem loin,

Mani rûnah thal inlên loin.

-Author

            Delhi, September 14, 2012 Zirtawpni. Zing dar 5-a tho hlak kha sun dar 11-ah ka tho chauh a.  Chu khom chu Lala Khobung-in Imphala inthokin a mi hung fawn leia tho chauh ka nih. Zanah Tv. Rothanglien Khawbung a hung lĕng a, a artikul ziek chu inpawl malamin kan thuol a, zan dar khatah kan thuol zo phuor hman a. Kei hi zâl inhnuin inhma lang khom, zal tawma lekha tiem hi makmawa ka nei a ni leiin, zing dar 2 chen Lala Khawbung lekhabu mi hung thon, Mizoram Leh Kei (2012) ti, Mizoram a Rajya Sabha MP hmasa tak R.Thanhlira ziek chu a tlangpui chauh ka bi thuok thuok a.

            Lala Khobung le kan inbiek zoin, a lengna Dr. Chaltonlien Amaw ofis-a leng ve, Pherzawl lal ka pu Lalhmangpui leh an inbiek a, Pherzawl-ah Power Sub-Station sie dinga ruohmang a ni thu le bawzui a ni mĕk thu a mi hung hril a, lungril a sukhlim hle a. Chu ruol chun, “Pu Hmang, chuonga electric hmu ei phak ding a ni ta si chun Pherzawl khaw hlui le se vĕl, kha hmaa khawtlang rizap huom sung po bĕk kha loa văt le nei lo khap ta ro. Khaw hlui tlanga khan prawzek poimaw tak ei la’n din ding a na, kha taka inthok khan khawvel ei la rŭn ve ding a nih. Chu taka hmang ding chu hmun tin le ram tinah mi thiem sor tlak ding ei buotsai mĕk a nih” ka ta. Khaw hlui tlang chu văt le loa nei an lo khap tah thu a mi hril a.  Hi thu hi Pherzawl khuo ka sir zăta ka thu incha mathlawn lo a ni a, an lo tah ri hang hrietin lung a suklawm èm ém.

Clash of fundamentalism

            ‘Breakfast’ pangngai fa dingin an hnu talaw ta a, lunch (sunbu) fakna dingin a la’n hma talaw bok si leiin, thingpui dawn a, Times of India newspaper tiem pumin kawlkai ka but a. Ka chanchin tiem laia ngaituona fa deuh chu ni thum liem tah, September 11-a Libya-a USA Ambassador Christopher Stevens that a ni thu le a bebawm chanchin hrang hrang chu a nih. Hi ni hi Muslim firfiek, Osama Bin Laden rawihai phier rŭka vuongna hmanga New York-a World Trade Center (Twin Towers) le Washington-a sipai hmunpui Pentagon an baw darna champha voi 11-na a nih.

Muslim khawvel, abikin Arab khawvelin tin le haa an do le khawvel map-a inthoka thai bo an nuom chu Israel Ram a nih. A mawi a mawi naw khom dawn loa Israel ram trantu le humtu chu USA a ni thung a, a thilthawtheina le thil neia Arab le Muslim ram hrang hranga thruoituhai zawr lungawi dan a thiem a. Chu chun, an hnam le an sakhuo tran dinga turuna uoiin-a an vai ruihai theida a’n kaitir naw thei naw a. Chuleiin, an sakhaw hmêlmaa an ngaihai chu hmangruo ieng khom hmanga sukchimit tum chu hieng mi turûhai sakhaw thar a nih.  Chu le inzoma hi lekha ka ziek lai chena an siehre nuhnung tak chu Ambassador Stevens a nih. A san ei la hril pei ding a nih.

            Muslim-hai hin an sakhuo hmusuoktu, zawlneia an ngai Mohammed (c.570-8 June 632) chu Mecca-a pieng le Medina-a kum 63 mi nia thi a nih. Hieng hmun poimawhai hi kum 1980-83 laia Saudi Arabiaa sin ka thaw lai kea ka sir ve vong a nih. Kum 40 vel a niin Muhammad chun thu a dong hlak a, chuonghai lak khawm a bua an siem chu Koran an ti a, a hnungzuituhai baibul a nih. A dam lai ngeiin, a zirtirna pom nawtuhai chu, abikin Juda mihai chu, thawluina hmangin ama rawiin an bei hlak a, chu chu ‘Jihad’ (indona thienghlim) ti a ni a, Judahai chungah a tran hmasa tak a nih. Nuhmei dorzon khat vel chauh a nei nia hril a na, amiruokchu a lim amanih a thlalak amanih siem le sie phal lo a nih. Chu chu Sinai tlanga Pathienin Mosie hmanga Dan (Thupek Sawm) laia pahnina “I ta dingin milim siem naw rawh….” kha kalin an hriet a nih. Muslim mi fir tam lemin thla lak dam hi nuom der lo an nih. Indian Revenue Service (IRS) a um laia kan bathmate pakhat chu Muslim, a hming Hassan a na, Group-a thla kan lak chang khom a thrang nuom naw hrim hrim.

            Chuong ang chu Muslimhai turu dăn a ni leiin an zawlnei thla amanih tar le a hming sukhmelhem zawnga ngai thil thaw hrim hrim chu sukhlum an tum pei a nih. An sakhuo leia mi hringna lak hi tuolthatah an ngai nawh. Indona thienghlimah an ngai lem. Chuong thil leia an lo thi pal a ni khomin pielralah dairekin kai an ta, tui luong del delna huon mawi le inhoi, thei inhnik chi tinrêng umnaah nunghak thienglam 70-in chatuonin an enkol ding niin an inzirtir. Chuong chu a ni leiin, an sakhuo thi chil huom an tam. Iemani chena inthoka an ching chu paipuok paia mi thi chil dam hi a ni leiin khawvel an chokchawrawi nasa khop el. Ieng sakhuo khom ni sien, mani sakhuo chauh thra bika ngaina le sakhaw dang chu Setan pawla ngaina lungril an intuna taphotah sakhuoin a ngêk a hlaw naw thei nawh.

Innocence of Muslims

            Ei thupuiah lut inla. Mi pakhat ‘Sam Bacile’ inti, a hming tak ruok chu Nakoula Bassely Nakoula nia an hril chu Aigupta rama inthokin Los Angeles (USA)-ah a’n pĕm a (Ama hi Coptic Christian a nih. Muslimhaiin Aigupta an lak hma 4-6 A D sung khan sakhaw pawl lien tak an ni a, tu ruok hin chu a ram pumah 10% vel chauh ni tain, Muslimhai hnawchêpna kara intar taka kum za tam khawsa tah an nih).  Inruithei thil le inzomin lung inah thla 21 a’n tang a. Hi sung hin film-a siem dingin tienami a ziek a. Kum 2011 June-a a hung suok chun sum a zong khawm a, Juda hausa mi iemani zatin sum an pek a, chu chun mi 80 vel inchangna film a siem a.

            Hi film hi an insuo hmasa tak chun Desert Warriors ti hmingin a hung suok a. Chu hnunga chun Innocence of Bin Laden ti hmingin a hung suok nawk a. Kum 2010-a World Trade Center an baw ni Champha September 11-a Muslimhai lekhabu Koran raw hlut hlut dinga inthritu Pastor Terry Jones (Gainesville, Florida) khan hi film hi nasa taka a lo inhnikpui le thrangpui leiin September 11, 2012 khan an nuom dân dăna hi film an siem danglam chu Innocence of Muslims ti hming chawiin an tlangzar nawk a, chu chu khawvel hmu thei dingin Youtube-ah sie bok a. Hi ni hin Pastor Jones chun mi fiel khawmin hi film hi a’n entir a, an en hmaa thu tlawmte a hrila chun hi film hi “International Judge Mohammad Day” a ti nghe nghe a nih.

Hi film hi Zawlnei Muhammad hming sukhem tumna lieu lieua siem nia ngaiin, nasa taka demin Aigupta, Yemen, Libya le Tunisia le ram dang dangah-ah mipuiin lam an hraw mup mup a, American Embassy an bei a. Libya-a lem chu Benghazi-a American Consulate chu Muslim firfiek pawlin rawket-in an kap sop vong a. US Consulate an kap ni hin Tripoli-a um an Ambassador Christopher Stevens-in a sir ni le film ei hril hi a rawihai le an en lai a nih. An hril dan chun Ambassador hin hi film hi a’n hnikpui a, mi threnkhatin fimkhur dinga thurawn an lo pek chu a poisa naw leiin, a fepuihai leh an thi pha tah vong a nih. Muslim firfiekhai chun an zawlnei deusawti siehre amanih hrè hmang hi rongbawlna insang taka an ngai a nih.

Siehrè

          Hnukah intar âwk ăwka kawlkai lem thlaa hi thu ka tiem lai chun, Delhi Thurawn-a ding artikul ka la ziek naw thu ka hriet suok phut a. A hmaa ka lo ziek tran tah, ka la sunzom hman lo pahni pathum laia mi am sunzom ding, an naw leh a thar ziek ding ti ka’n ngaituo lai chun ka na-ah thu mal pakhat ‘SIEHRE’ ti hi a hung inlang tlat a, chu chu hi artikula hin voi hni zet ka hmang hman ta nghe nghe a nih.

            Kum sawmli vel liem tah khan hi trongkam hi ei hung hmang tran dan ni thei awm ka sui rak ta a. A san chu trong hi a hmangtuhai khawsakna le an nun dan fie taka thlir theina darthlalang, hnam hlimthla a ni lei a nih. Mihriem tonhriet hi hriet le tiem thei dinga ei namkai  theina dinga a negative chu thu mal a nih. Thu mal tin hung insiem hi ei hnam zierang a nih. Chu chu a hang indikzie chu ei thu mal chai lai ‘siehre’ ti hi hmangin hang hril fie tum ei tih.

            ‘Siehre’ ti hi thu mal pahnih- sie le hrè- keikopa thu mal pakhata siem, a siena ding taka thil sie thrat tina a nih. In inhnok nuoi el chu a siena ding taka sie lo amanih, a umna dinga um lo thil a tam tina a nih. Chuong hai chu a umna ding thlap thlapa ei sie pha chun ei ‘hrè’ fel a nih. In ei inthiel fai khom a nih. Sienkhom, in ‘hrè fel’ le ‘inthiel fai’ inang nawna chu, a hmasa hi a umna ding thlap thlapa thil sie a kawk a, a nuhnung ruok hin chu ina thil um, trangkai lo, hmun hluo po po kha ei thak hmang ti a kawk deu bik.  Ka pindana ka lekhabuhai hre feltu chun indar nuoia um kha a umna ding sengah siein rem fel a ta; ka lekhabuhai inthieltu chun a lak hmang amanih hrè hmang vong khom a ni thei, a thaw khah lekhabu inthiel a ni tlat a. Hmunhnok inthieltu chun a lak khawm a, a dehawnna dingah a peihawn hlak.

            A umzie pahnina hi ‘Siehre-2’ ti zawngin hril inla, ei thu chai tak hi a thlier inhoi a tih. Chu chu, ‘siehre’ umzie pahnina, ei artikula ei thu fŭntu a nih. A umzie chu ‘that, sukhlum, sukbohmang’ tina a nih. Thil thraa ei hriet thaw tumin pawl ei indin a, ei kalchawina sukhrattu neka sukbahlatu, lam suktluongtu ni nêka dâltu an um pha leh inthiel an ngai a, “Ama hi siehrè ding a nih” amanih “Ama hi hrè thrat ding a nih” ei ti chun, kha mi kha that dingin thutlukna ei siem tah tina a nih. “Ama hi inthiel a ngai” ei ti chun ei that amanih, a ngirhmuna inthoka ei pei ding thu ei hril a nih. Thanga’n a thuomhnaw lo ‘siehrè’ dinga a hril le a nuhmei lo siehrè dinga a hril chun a hmasa hi siehre-1 a na, a nuhnung hi siehre-2, sim le hmar anga indanglam a nih.

            Siehrè-2 ei hung hmang tranna nia ka hriet chu kum 1960 kha a nih. Hi kum February-August sung khan unau hmelhai thawin Hmar le Kuki inkarah buoina a suok a, mi iemani zatin hringna an chàn pha a. Khang chen pansak panthlanga lo cheng tlang le innei pol, zan khat thilthua kèl le berama hang inthre le inen ringot el kha chu thil harsa a lo ni a. A khing tieng a khing tienga a chongpu chan chang theihai lem kha chu a tu tieng tieng ringhla an hung kai naw thei naw a. Hi boruok lêng vêl kara hin ‘hi nu/ hi pa hi hrè thrat amanih siehrè ding a nih’ ti ri a hung inri nok nok el ta a. Sienkhom, a taka insiehrè thu chu hril ding a vang. Kum 1966-1986 inkar khan Mizo National Front-in insiehre an thaw nasa a, anni MNF sunga mi ti lo, an khingpuia an ngai Mizo Union mi le sa an siehrè ringot khom mi 400 chuong ni dingin thil suituhai chun an ring.

            Hmar hnam bing sunga insiehre pawlisi hmang nasa tak chu HPC a nih. Ei pawlitisianhai laia hrohrâng le huhăng na tak Ngurdinglien Sanate-a inthoka tranin mi fel tlawmte ei nei laia mi iemani zat an mi siehrepek a, tu chen hin thruoitu mumal nei loin, van tawk lo, hnuoi tawk loah an mi’n lengtir a, an pawlisi bawzui po po laia tluong tak le thrahnemngai taka an la bawzui ngar ngar chu mani insiehre sin hi a nih. Thuthang inleng ka lo dong danin, HPC (D) a Lalhmingthang pawl intiin siehre dinga SIPHRO Chairman an vauh thu a nih. Iem a san? Hmar Inpui chun Hmar Biel le a se vel, abikin Tamenglong Biel-a thautui zong pawl hmalakna (oil exploration and prospecting) chu a rama chenghai rawn loa iengkhom thaw lo dinga norna sin chu SIPHRO kutah an pek a, chuong ang dungzui chun Chairman-in inhrilhrietna sin chu a bawzui a, chu chu hun la hung um peia hnam damna lampui nia ngai le hriet a nih. Threnkhat chun, HPC (D) Lalhmingthang pawlhaiin hieng ang thil inzakum an thaw hih thautui zonghai hin an lo suklawm tah lei niin a nih. Ram le hnam an mi zorna man hi a tlawm sawt nuom awm khop el.    

            Kaina khan a unaupa Abel kha a lo siehrè ringot el a. Sienkhom, Iengkim hretu hmaah thup thei a ni si naw leiin a chunga trongsie a tlung nghal a, a umna rama inthokin hnot suokin a um bok a. Unau siehre hi Pathien hmelmaa chop le chila insiemna a ni leiin, a hmaah hmaiman ei nuom chun băn vat chi a nih. (September 14, 2012 Delhi)