Kum 2000 Hnung Tieng -Hrangkaplien Sinate

“A him, a muong” an ti laiin nuhmei nauhase angin sietna an chungah hung tlung thut ata, pumpel tawp naw ni hai.

-(1Thesolonika 5:3)

Leilung suitu pawl (Geomorphologist) hai sui dan chun, khawvel hun liem taha hai khan kum 2000 lai bawr vel zatin sietna rapthlak tak tak (mass destruction) a lo um zie hlak ti a nih. Amiruokchu, a kum 2000 na chie ah a ni kher nawh. Kum 2000 an vawi hma  le hnung met lai a ni deu tak. Hieng ang sietna hai hi hripui, tuilêt, extra-terrestrial le hnuoi internal forces lei dam a ni tlangpui. Leihnuoi chen insawi danglamin, khawmuol dam tuipuiin an changa, tuipui dam khawmuolin an chang ve thunga, chuong hai lei chun khawvel nun nasa takin a lo thleng danglam hlak. Hnuoi hi siemtu Pathienin a natural process neia a siem a ni leiin mihriem sukdanglam el thei a ni nawh a; mawl le mawl naw thu in inveng thei dan a um met ti thu chauh a nih. Tienlai lem chu hripui inlêng lei ringawt khawma sietna rapthlak a lo tlung hlaka, tulai medical sciences leiin chuong ang thila inveng thei a ni tah a. Amiruokchu, hri a pung hratin sukdam theilo natna a pung deu  deu. Extra-terrestrial incident lei le Earth internal forces leia sietna hai ruok chu hriet lawk theina le insanhimna ding mihriemin ei la nei thei nawh. Sietna chi dang dang tlung leiin Lalram hrat le hmingthang hai khawm nuoiboin an lo um hlak a, mihriem hratna, varna le sipai hratna khawma insanhim thei a ni nawh. Tuilêt leia khawvel pumpui sietna Bible a khawm ei hmuh.

Tuta kum 2000 liem tah a khawm khan khawvel siet ring pawl haiin khawvel tawp ding angin an hrila, khawvel mi po po deu thawin ei awiin ei tung luoi luoia, computer programme hai dam kum 2000 chen a ding chauin an lo siema, mi tamtak ei buoi rum rum a ni kha. Bible le mithiem hai sui dan le khawm an mil nawin an dik naw reng a nih. Thu belchieng dawllo, ringthu mei mei leiin khawvel mi ei buoi sup supa, Bible thu  leh an mil am ti khawm ngaituo hran lovin mi tamtakin ei awia, kha hma po kha chu hun tawp lungrilah sie in ei ngaituona hai khawm Pathienthu tieng ei in lêna, tu ruok hin chu   mihriem lungril anhmaw ta nawin ringtu lai khawm Bible hril lawk hai suizui pei le ngaiven pei ei tlawm hrat nuom hle. Mimal chauh nilovin, kum 200 hnunga kohran fe dan hai enin Pathien thutak a in sungsipa thlarau boral hai sandamna dinga hmalak nekin bu, bo hmang nawk el ding, zawngin an inlap rak rak lem tah. Pathien kona hmu a thahnemngaia rawngbawltu nekin inchukna tienga hlawsam met hai in hnaw bitna a hung ni ta pei. Ei ram kohran khawm chuong tho; Pathien ram neka mani taksa khawsakna ngaipawimawna leiin Isu hminga chan ngam iengkhawm ei nei naw leiin inremna lampui hraw dan hrim a um thei nawh. Kohran châu chu fakzawngna siet pha ding anga ngaina leiin mani kohran hratna ding a ni phawt chun Isu thucha pawimaw em em in hmangai tuona uor nekin pawl pawla insiem nasat ei thaw pei lem. Pathienthu ngaisak nekin inhawitirna (comfort/luxury), hrietna, hausakna le duâmna hai hin mihriem lungril a hluo sip hrat lem tah. Khawvel inhawina le hmasawnna hai ei khuk puiin ei inrui a ni deu tak tah a. Amiruokchu, Pathienthu an khel naw ding a ni leiin, a ni le hun hrietlo, pa chauin a hriet hi a la tlung tho ding a nih. Mihriem lungrilah Pathienthu ngaithana a liena, chapona, duamna, tuolthat pawisak nawna, inhawitirna ngawt a pienga, ‘Pathien um nawh’ ti pawl ei pung peia, ei bauin ti naw sienkhawm ei khawsak dan hai en hin Pathien tina le Pathien thutiem, rorelna la tuok dinga inngaina ei nei ta nawh. Khawvel hun liem ta hnunga sietna a tlung hlak lai khan mihriem hratna leia insanhim thei a ni nawh ti chieng taka hmu ding tam tak a um. Hun thenkhata lem chu thangko ding, (thang thar hai ta dinga chanchin hriltu ding) khawm an um naw hiel hlak. Pathienthua a hril hai ena hun tawp ding ngaituona chun mihriem lungrilah hmun a chang thei ta nawh a. Chu nekin inhawitirna, hmasawnna, hausakna, chapona tieng ei awn hrat em em.

Technology hmasawn peiin hmasawnna, hrietna, thil awlsamna le inhawitirna ni tin a pung pei. Hienghai hi ei buoipui tak le ei sakhuo tak khawm a hawi tah. Technology inthang peiin hmasawnna a mi pek ruol ruolin hrietna a suk pung hrat hle, ei hriet naw karin van boruoka Boruok Lawng (Sattelite) tam tak vuong velin hnuoi chunga thil um hai thup thei ieng khawm a um ta nawh. Sawrkar pa khawma thup thei a nei bik ta nawh. Hriet lo dinga thup mihriem thilsiema inthawk khawmin a um thei chuong ta nawh a, Van boruoka mihriem thilsiema inthawk hmana thup thei a um ta nawh chun siemtu Pathien hma ah iem thup thei in ringa? Ralthuom le sensitive thil hai khawm ieng ang a thup hai khawm sensor dang dang hmanga man dawk thei vawng a ni tah. Ei lungril le ngaituona, ei thilthaw hai po po Pathien iengkim thawthei hmabula thup thei um chuong naw nih. Rorelna ei tuok pha a lan lang vawng tho ding  a nih. Pathienthua ei hmu dan chu ni naw sienkhawm, ei thilthaw po po, a sie a tha, Pathien rorelna huna, tulai tawngin, Live Record phawrsuok nisienla ei meng ngam dim maw! Hi thu ka ngaituo chang chu ka hun hmang ta po po hai kha kei kir thei nisien ka nuom hlak. Davidin a tleirawl lai suol ngaidamna hnia a tawngtai hai le  khawlai hmunah um sienkhawm Pathien hma a inthawk thlan hmang thei a ni naw zie a hrilhai a min hrietsuok tir. Ieng anga var, hausa, thilthawthei ni inla khawm Pathien rorelna hma ah thup le suong ding nei chuong naw’ng ei tih. Khawvel inher danglama sietna tlung hlak lai khan mihriemin iem hril thei le thaw thei an lo nei reng renga?

Isu ngei khawma a hun le ni ‘Pa chau naw tukhawm a hrie an um nawh’ a ti kha hre zingin, mihriem hrillawk indik naw leia lungmuong el loin a hun a tlung thei zing a nih ti ngaituo thar ei tiu. Technology, hausakna, inhawitirna hai hin a mi sandam nawha , Ringna leia lungunsietna a sandamna ei chang hi eini tieng a thlawn nisien khawm, a mi petu pa tieng en rawh a tlawn an nawh. Abrahama inthawk Isu Krista krossa a thina chen kha sui la sandamna hlutzie ngaituo suok ngei i tih. Hla siemtuin “Mi phal naw nih ama innghila khawvel par tlan el  ding chun” a lo  ti ang in chu dinga Pathienin sandamna a mi pek a ni nawh, ama dit dana khawsa ding le Ra tamtak insuoa khawvel pumpuia fe a thilsiemhai kuoma chanchintha hril dingin a sandam lem che a nih. Mi hausapa hremhmun intâng kha hre zingin, hun tawp la ni naw sienkhawm nitin mi sâng têl thina’n a thuoi zing a nih. Hun tha ei nei sung hin Lal sin thawng ei tiu.

(New Delhi, 22^nd September  2012)