Lawrkhawm 16 Sept, 2012

HCFD Choir Music Video Shooting Zo:

            September 13, Ningani khan HCFD Choir Music Video Album a ding group song chuh Damdama Lake, Haryana hmunah shooting va nei zawm a nih.

Hi group song hi short drama le inkawpa siem a ni a, a mawi hmel hle thu shooting a va thang hai a inthawk thu ei lo dawng. Shooting ding po po an zo felna a lo ni tah. Ei lawmpui takzeta, mi tam tak ta dinga malsawmna intluntu a ni ngei theina dingin tawngtaina’n lo san zing ei tiu.

Term Paper/Internal Assessment A Hnai:

            Ei inchuklai thenkhat hai chun an hma ela khin Term Paper/Internal Assessment an hmasuon meka, an insingsa mup mup zing ta a, mitinin ei tawngtainaah lo san seng dingin ei in ngen. Hi el baka hin vawisun, September 16 hin Combined Graduate Level Examination (SSC) Tier-II chu nei a nih. Eini mi iemani zat khawma hi exam hi an hmasuon niin chanchin ei lo dawng. Hlawtlingna an hung chang ngei ei ditsak hle.

HCFD Beiruol Tan A Lo Ni Tah:

            Hmar Christian Fellowship Delhi chun tukuma September-October Beiruol chuh chawlkar hmasa liem ta laia inthawk khan an lo tan tah. Tuta kar khan Munirka le Mehrauli Area hai ah hi beiruol programme hi nei a nih. A thang hai chun an hlawkpuiin inhawi an ti tlang hle niin thu ei lo dawng. Kar thara hin Vasant Vihar le Dwarka Area hai ah nei ni nawk a tih. Hi beiruol hin ra lawmum tak a’nsuo ngei ei beisei. In tawngtaipui tawn pei ei tiu.