Lungngaina Kan Tlangpui

Lungngaina Kan Tlangpui

-Darsanglien Khawbung

            Anih, nitin insung khawsakna le taksa khawsakna ding ngaituoin mi tamtak mani tawk tawk a buoi le chawl thei lek loa hringnun kalchawi in ei buoi mup mup a. Chuong lai zingin hringnun umzie iengkhawm engtona nei der lo a, thawveng em ema um khawm ei lo um tho. “Mihriem a tunga ngir taphawthai inang vawng anta, ngaituona khawm inang vawng ata, ditzawng chenin” ti ziek um chuong lo

chuh. Ieng lei am? Khawvel a ni tlat!

Abikin, harsa le vangduoi bik rieua inhrietna mani ah a hung tlung phat hin a nih. Mi po po neka vangduoi bika inhrietna a hung um a, hi khawvel hi mani ta dinga tawngsephur bik rieua hrietna lien tak sungrila a hang intu tak tak ni hin chu thil iengkim el le, ei hmabaka la hung inher suok nawk pei dinghai chen hang ngaituo lem hin chuh ‘Lungaina a tlangpui ni tho tho a tih’ ti chang hi hmabak a la hung ni nawk ta rawp hlak a nih.

Kei lem hi chu mi neka vangduoi lem le harsa lem, thiemnaw le inhnuoi lem ni a inngaina lien tak ka lungril a intu nghet tlat hi peitlak harsa ka ti em em a. Chuleiin, mani a mang angna a hung tlung changin tuor thiem intak ka ti hlak. Hieng anga ngaituona tawitak le bul deu, innghatna ding iengkhawm um naw a ei inhriet lai tak hin a ni……..Iengtik lai khawma mi lo tlatlam ngailotu, ei hrietfuk naw lai khawm a mi lo hrefu zing a, milo umpui zing hlaktu, mala min um tir ngailotu “LALPA” kuoma ei hang tlu lut hin chuh; hrietthiem nawhai khawm hrietthiemna le hadamna ei hmu hlak. Chuong an naw chun Setan in remchanga la in, ei ngaituona buoi le harsatna a’nthawkin, inthima inthawk inthim nawk zuolna a mi hnuk lut a lo tum ve zing hlak chuh.

Hi hi hringnun khawvel, ei ni mihriemhai suksuol lei a tawngsephur, hmun ei hluo ding a Lalpa’n a mi lo tiem pek nawk chu. Chuleiin, thlarau a sip mihrang lo fe tahai in thlarau inhrietirna ngei a hla ropui tak tak an lo phuokna san hai chu. Hi thuruk hrethiem tuhai hai le bel ding tak beltuhai hai ta dinga hrietthiem dinga ro phum ruk chu. Nang, kei a ta dingin inhawi in, inhawinaw bik naw nih. Hi thlaler ram tawl a hin harsatna le buoina tamtak ei hmabak a hin mi hmuoktu an lo la um zing tho a nih. A tlung ta le la hung tlung ding chenhai khawm.Ei chan dinga ruot,Lalpa’n a mi siem pek chawl hadamna hi thlaler khela I chan ding I ngaituo hun a chu hlimna thuruk nei ve ngei I tih.

Thlalêr ka khêl hma chun,

Buoina tamtak tuok ding ka nih;

Lungaina thar la tlung ding le tuta,

A tlung tasa khawm,

Vân lâwmna chun ṭhal tui angin a suknêm thei.

By:-Rev.Thangngur (THINA JORDAN)