Lawrkhawm 13th May 2012

Mami Sinate Album Tlangzar Ding:

Nk. Lalengvari Sinate @ Mami Sinate ( Mizo Idol 2011 Finalist) Music Video Album “AMEN” ti chu hung tlung ding May 14, 2012 Thawtanni, 8:00 pm khin  Zonet Studio, Zarkawt, Aizawl ah tlangzar ni tang a tih. Hi Album a hin Pathien chawibiekna hla 12 lai a um a Hmar tawng le Mizo (Lusei) tawng a hai a siem a nih. Delhi khawm kar thar Pathienni hin a hung tlung hman beisei a nih. Nghakhla a um ta takzet. Album hi Pu Lalthankhunga Hmar in a produced nih. Album tlangzarna hunser hi Zonet Cable TV chun LIVE in a pek dawk a nih.

 

Kaisang Thar:

Hun sawttak nghak upa lo ni tah Nk. Lalremkim Buongpui (@U/Ni Rai) chu May 10 khan Head Clerk a inthawk in Account Oficer ah a lo kaisang tah. Ei lawmpui hle! A zuk HELLO nuom hai chun 9818187965 a hin biek thei a nih.

 

Delhi A Sawn Thar Ding:

Police Headquarters, Aizawl a sinthaw mek Pu LT Hrangchal, IPS, chu Delhiah Deputy Commisioner of Police (DCP) sin zawm dingin transfer order a suok. Mizoram sawrkarin la’n suo naw deu sienkhawm kar thar tieng khin chu an sungin an hung insawn hman ta beisei a nih. Delhi a hin North East haiin buoina chi dang dang ei tuok rawp hlak a, hieng lai hun taka a mi awptu ding High Rank Police Office, Hmar tlangval ngei ei hang nei ding hi lawmum ei ti takzet. Delhi a um North East thalai mi sing tel hai ta ding khawmin malsawmna hung intluntu ni ngei dingin ei ditsak bawk. Pu LT Hrangchal hi Kangreng khuo a Pu Singa naupa a ni a, Mizoram State police zawmin tuhin IPS confer a lo ni ta a nih.

 

Education Awareness:

Tuta kar liem ta khan HSA NC Hills & Karbi Anglong Jt. Hqrs chun Education Awareness prokram Muollien, Jinam Valley hmunah a buotsai. Hi hun a Chief Guest ding chu Pu Laltlansang Hmar EM a ni a, resuorce person in Pu S.K Khawbung Secy, HLS Assam le Pu Laibuon Hmar, C.Jinam Valley hai an thang bawk.

 

NE Bielah Simkhawlei An Hning:

Zani hmasak zantieng 6:11 pm khan Assam le India hmarsak biel haia chun ritcher scale 5.4 a hratin seconds 10-15 sung simkhawlei an hning niin R.F. Dattatreya of Met Department, Delhi chun a hril. Amiruiokchu, thil suksiet a nei thu hriet a ninaw baka mihriem thi le hliemna tuok an um thu hriet a ni nawh. Simkhawlei inhning hi Tezpur district-a inthawk intan a nih. September 2011 khan India hmarsak biel le Nepal ram hai ritcher scale 6.9 a hrat simkhawlei inhningin a sawi huna khan Nepal mi 5 thangin mi 8 in thina an lo tuok pha ta a nih.

 

KSDC In Strike le Blockade:

Kuki State Demand Committee (KSDC) in 11^th May, 2012 dar 12 khan B.Vengnom Community Hall-ah Press Conference an nei a. Kuki state ngenna kawnga an hmalak pei dan dinghai an tarlang. KSDC Spokeperson, K Khongsai in Press Release a siema chun Kuki haiin India sawrkar kuoma Kuki state a ngen chun ngaisak a hlaw naw hle thu hrilin KSDC in nuorna a nei ṭan ta ding ni’n a tarlang. Hi le inzawm hin May 12, 2012 zan dar 6:00 a inthawkin May 15, 2012 zan dar 6:00 chen Manipur a General Strike nei dingin thusuok a siem a. Hi zo chara inthawk May 19, 2012 zan dar 6:00 chen Economic Blockade le sawrkar office hai le sawrkar sin hai po po suk tawp vawng a ni ding thu a hril bawk. A chunga hmalakna hai po zo a ni hnunga ngaisak a la hlaw naw chun Centrel Committee, KSDC in hmalak pei dan ding ngaituo nawk a tih ti’n a hril bawk. Hi Strike le Blockade hin Kuki hai umna taphawt huom vawng dingin a hril a, Kuki hnuoia hin Tribe 22 a um ti’n a hril sa bawk a nih.

 

Biekinah Setan Be Pawl Hi An Che:

May 8, 2012 ni khan Mizoram State sunga Kolasib District a Kolasib Vengthar a Presbyterian Biekin sungah Setan be pawl an che nawk a, Setan Symbol circle in an huol khum Arasi (star) lim an ziek. Maichama um lekhabu chi tum tum, Bibles 11 le hlabu iemanizat thangsain Setan symbol (inchikna) an rin kuol sungah an raw tiin tuolsung Upa K.V. Engliana chun a hril. Ni 10 liem tah sunga hieng ang thil a tlung vawithumna a ni tah. April 30, 2012 ni khawm khan UPC, Kolasib town Biekinah Setan be pawl hi an che a, chun May thla sung tho khan Thingdawl khuo Biekinah Setan be pawl hi an lo che ta bawk a nih.

Biekin suosamtu ni dinga ringhla tleirawl 3 hai chu man le hrentang an ni tah. Mana um tleirawl hai 3 hai chu Kolasib hmunah an nu le pa han Police kuta an pek niin Police thupuongtu chun a hril. Hieng tleirawl 3 hai chu kum 14-17 inkar mi an ni a, an nu le pa han an ringhla leiin thu indawnna neia an dawp huna an thil thaw hi an puong leia Police kuta an pek niin ei thu dawngna chun a hril. Hieng naupang hai hi Kolasib-a English Medium School-a kai le Hostela um niin zanril laiin Hostel-a inthawk suokin Biekin tum tuma inthawk Bible le hlabu hai lakhawmin Biekin sunga hin an raw el nih.

 

SHDC Mipui Thlamuongna Dingin Flag March:

Mizoram Police Officer hai inṭhungkhawmna a an thuthlukna ang dungzuiin Sinlung Hills huom sungah Mizoram Police in Flag March nei an tum. Hi Flag March hi Sinlung Hills Development Council huom sunga mipui hai thlamuongna dinga nei tum a nih. DIG inrawina hnuoia inṭhung khawmna hi nei ni’n SHDC huom sunga mipui hai chu HPC (D)’n sum a dawl chu pe lo dingin an hriettir. Mizoram Police chun thawluina hmanga pawisa dawl chu dan lo ni’n, a thawtu hai chu thubuoi an siem khum thu an hril. Hieng pawisa dawl lo petu hai chu dan bawsie an ni leiin an chungah hremna intlungtir ning a tih ti’n an hril bawk. Flag March huna hin MAP le IR haiin an ralthuom ṭha tak hai suklangin khuo fangna nei an tih. Sakawrdai, Vaitin, Ṭinghmun, Mauchar, Zohmun, Saiphai, Saipum, Suongpuilawn tlangdung, Khawlien le Khawdungsei hai-ah nei ning a tih.