Lawrkhawm 6th May 2012

TB Leiin Pu Mangchunghnung Ei The Tah:

            DHWA member Pu Mangchunghnung H/o Pi Lalthanei, Munirka a khawsa mek chu May 2, 2012, Nilaini zan 7:30 vel khan TB natna leiin Safdarjung Hospital, New Delhi hmunah a lo boral tah.

Hun iemani chena inthawka hi natna hin a thlakbuok ta reng ni sienkhawm inrik taluo a um a ni naw a. Hi ni khawm hin a nuhmei leh bazaar dam an la kai a, an hung inlawi hin a hung chau sie a; Damdawi In pan pui nghal a ni a chu san hman a ni ta naw a nih. A zana hin Pi Hmingmawi In, 71-C, CGH Complex, Vasant Vihar a DHWA le HCFD chun ralna hun hmangin Nunghak Tlangvalin an lumen pui a. A zing, 3 May zantieng khan Dwarka thlanmuolah vui liem a nih. Lusun tuortuhai po po ei tuor pui takzet.

Saidanah Pu Hrangaikim a Boral:

            Greater Noida lai a rawngbawla um mek Pu Samuel Mihriemate pa, Pu Hrangaikim (72), Saidan, chu hun iemani chena inthawka natna chi thum laiin a thlakbuok tuor zo ta lo in May 2, 2012, Nilaini 3 am vel khan an chengna inah a mi lo maksan tah. DHWA le HCFD chun hi zan vek hin Delta-II, Greater Noida ah ralna hun an hmang. Ama Pu Samuel Mihriemate khawm a pa thina le inzawm hin May 3 khan Tuithaphai tieng pan in a lo inthawk dawk ta a nih. Lusun tuotuhai ei sun pui hle.

Hauz Khas PS Ah DCP In Seminar A Huoihawt:

            Zani tarik May 5, 2012 chawhnung dar 4-6 inkar sung khan Hauz Khas Police Station ah North east mihai ta dingin Hauz Khas DCP in Seminar a huoihawt. Hi programme a hin Mahipalpur a’nthawk HSA members Tv. Robert Khawbung a rawiin mi paruk lai zet HSA president hrietpuinain an lo zu thang ve. Hnam dang dang mi iemani zat zet fekhawm a ni a. Hi inpawlkhawmna hun a hin harsatna ei tuok zeu zeu chungchang thuah Delhi Police hai le thang thlang dan ding kawng le lam tha tak tak ngaitlak a ni el baka, ei harsatna hai hi Delhi Police intlun vat vat hlak ding a ni zie dam le eini hai khawm a thei chinah fimkhur nawk zuol dingin infuina  DCP chun a siem bawk. Fe khawm tuhaiin thu tha tak tak ngaithlak a ni el baka fak le dawn-ah an hnienghnar hle thu ei lo dawng. Hi inpawlkhawmna-a thang hai hi Delhi Police-in an fe le hungna ding motor a pek vawng bawk a nih.

DoM&YA, HCFD Emergency Meeting Nei A Nih:

            29 April, Pathienni inkhawm tin char khan Department of Music & Youth Affairs, HCFD chun Emergency  Meeting an nei. Inralna le siet nikhuo a insawngbawl dan kawngah DHWA in dan a siem hai chu kengkaw a, an thurelhai chu thlawp pei dingin an rel. Chun, Music Video a ding audio recording thaw mek, la zo fel lo met chuh Delhi University hnuoia inchuklaiha’n exam an zo char a zo fel dingin an rel bawk. Hi le inzawma thu chieng lem chu a hranin Music Secretary in inhriettirna a la hung siem ding niin ei thu dawngna chun a hril bawk.

Inzin Hung Kir:

April 29-May 4 sung Sinlung Hills le Hmar Biel (Tuiruong Dung) fanga inzin Pu L.Keivom le a naupa Pu David Lalhmingsang Keivom chu May 4 zan khan dam takin Delhi tlang an hung chuong kai nawk tah. An inzin san hi David Keivom-in B.D Thesis-a dingin, ‘Displacement As Exilic Experience with Special Reference to Northeast Tribes (In the Light of the Planned Tipaimukh Dam Project’ ti a thlang leiin a hmun ngei kea sira a mi chenghai hmai intuoa inbiekpui a, an ngirhmun hriet an nuom lei a nih. An inzin sungin khaw tinah khawtlang thuoituhaiin vantlang mipui fielin inkhawmna an huoihawt a; Sinlung Hills HSA Joint Headquarters huoihawt, Mauchar khuoa inkhawmpui (April 24-25) an hmangpui bawk a. An inzin sung po poa thuoi veltu le enkawltu chu SIPHRO Chairman Pu David Buhril a nih.

Munirka MCD Member in DHWA a Fiel:

Ni khat laia MCD Election ei nei na a, eini mi tamna tak Munirka Ward a thlangtlinga um Smt. Pramila Dhiraj Tokas chun 6 May a office innauguration programme a siem le inzawmin DHWA khawm fielna a hung pek niin chanchin ei lo dawng. Hieng ang programme a dam hrietfuka ei um ta hrim hrim chu a ieng hehu la ni phak naw sienkhawm lawm a um hrim hrim khawpel. Ei thuoituhai khawma var taka hmalak dan ding an hung ngaituo ve pei ei beisei.

Naupang Joel Khawbung At A Nih:

Vikaspuri, West Delhi a cheng Pu Immanuel Khawbung naupa Np. Joel Khawbung chu zani May 5 tuk khan LNJP Hospital, Delhi ah admit a ni a, Groin Operation hlawtling taka thaw zo a ni hnungin zantieng insuo nawk nghal an nih. Np. Joel hi kum 4 mi vel niin operation tum hni a tuokna a ni ta a, pawi ei ti pui takzet. A hung hrisel pei theina dingin ei tawngtainaah lo hre seng ei tiu.

HSA Friendly Match Khel A Nih:

            May 4, Zirtawpni khan HSA player hai chu Senior le Junior a inthe in Vasant Kunj playground ah friendly match an inkhel. Hi inkhela hin ‘Khup in lu a khel thei nawh’ an ti ang deu khan, Senior hai chun 2-0 in hratna an lo chang ta a nih.

Department of Music & Youth Affairs, HCFD

May 6, vawizan inkhawm tin dar 7:00 pm hin HCFD, Department of Music & Youth Affairs Committee ei Chairman Pu Timothy Shakum inah nei ning a tih. Committee Members hai kim taka thang seng dinga inhriettir ei nih. Tulna dang leia thang theilo ding dam ei um a ni chun Secretary inhriettir dingin ka hung ngen che.

-Lalneilien Inbuon

Secretary, DoM&YA, HCFD