Lawrkhawm 29th April 2012

HSA Delhi Meeting le Lawmhai Lawmpuina Nei:

            22 April, Pathienni zan khan HSA Jt. Hqrs., Delhi chun ei Office ah ei President James Pusing Sanate hai nupa tuok thar le OB sunga sin hmu thar Nk. Chawnglienmawi le Nk. Esther Lalsanhim hai lawmpuina’n zanbu an kil tlang.

Hi hun hi remchanga la in meeting khawm nei nghal a ni a, thurel thenkhat, mipui hriet tul hai chu a hran a suklang a nih.

TV. Joel Khawlum Ei Lo The Tah:

28 April, 2012, Inrinni 4:30 pm vel khan Tv. Joel Hmangrolien Khawlum @ Joel Khawlum (27) S/o Pu (L) Mawia Khawlum le Pi Rody Khawlum, Mohammadpur, New Delhi a cheng chu natna hran nei khawm ni lo in risang muol a mi lo liem san tah. Zirtawpni zan hospital a damnaw nghak a khawvar chu sunah a in a, tho ta lovin a um sawng el ni’n ei thu dawngna chun a hril. Safdarjung Hospital an panpui a ni a, sienkhawm a hringna san hman in a um ta naw a nih. Ama hi thenkhatin ei hriet thei dan ding chun Senvon Drugs Store neitu, lo fam tah, Pu L.Rokung Hmar a tupa a nih. A ruong hi Nilaini tuk khin Tuithaphai tieng phur a ni ding a ni a, chu hma po chuh nunghak tlangvalin ei tawiawmin ding a nih. Inrinni zan khan khawvar pui a ni ta a, vawizan khawm hin 12 am chen aw dingin DHWA le HCFD chun ralna programme a buotsai nawk ding a nih. Lusun sunghai ei tuorpui takzet.

Pu Vanlaldik A Boral Thut:

            Munirka, New Delhi a um Tv. Thachunghnung a pa, Pu Vanlaldik (44), Saron, Mahur a cheng chu 26 April, 2012, Ningani zantieng khan nat lawk um lo in a boral thut a. Hi zan la la hin DHWA le HCFD chun Tv. Elisha Changsan hai chengna in Munirka ah ralna programme an hmang nghal bawk. Ama hi suna khawm hrisel pangngai taka khawlai la leng ve zing ni’n an hril. Lusun tuortuhai ei tuorpui takzet a nih.

DHWA In An Ral:

            Thla hmasak lai a lo boral tah Pu John Lalnunthar Varte, Pi Lienrameng a upa chu 26 April, Ningani zan khan DHWA in an ral. Chun Pi Siempui, Safdarjung Enclave, khawm a pa’n a lo boral sanna leiin 24 April, Thawlenni khan DHWA in a lo ral ta bawk a nih. Tuta kar liem kha lusun le inralna an zing ut el a, pawi ei ti takzet. Ei thaw thei a tlawm hle a, lusuna thi purdo hai po po in Pathiena inthawk thlamuongna mak tak el an chang ngei theina dingin tawngtaina’n lo hre zui seng ei tiu.

Chawl Hmang a Hung:

            Pu Samuel V Hmar, SI, J & K a posting mek chu nu le nauhai bula chawl hmang dingin Delhi a lo hung chuonglut ve nawk tah. Chanchin ei lo dawng dan chun ama hi thla hni sung veng vawng chawl dinga hung inthawk a nih. Hadam vawng vawnga a chawl sung a hmang theina dingin ditsakna ei inhlan.