Father’s day hi 1909 kum khan Spokane, Washington
ah nuhmei tleirawl Sonora Smart Dodd in Mother’s day hmangna sermon a
ngaithlâka inthawka inṭana ngai anih. Sonora nu hi a nau neina in a thia,
nau panga, Sonora ṭhangsa in an pa Henry Jackson Smart, lo neitu chun
parawlin (single parent) in alo enkawl puitling tawla.
Sonora in a pa chawimawi
na dingin Ni khat special taka buotsai a nuom hlaka. Chuong ang tak chun, 1924
khan America President Calvin Coolidge chun America mipui po po in ursun taka
Father’s day hmang dingin an fuia. 1966 khan President Lyndon B Johnson in
presidential proclamation sign in June Pathienni vawthumna hi Father’s day in a
hmang a. 1972 khan President Richard M Nixon in official holiday le permanent
le legal in ahung puong ta pei anih. Tleirawlte pakhatin apa inrim dan a hmua
inthawka idea hung inṭan anih. Ropui tak a niha. A bikin Father’s day hi
biekin inlawi ngailo hai khawma biekin an pan vena ni anih. Ursun taka hmang
ding hrim anih.
Ei bible a hin a tlangpuiin Israelhai suolna le
fail na a hril ṭeu bak hi chu chuong lawm chun pa hai hlawsamna a
ziek tam naw a hawi. Pa hai inpumpekna le sukdikna record hi Pa hai failna le
hlawsamna record nekin a tamlem in an lang bawk. Chuleiin, bible a pa haiin an
sukdikna ṭhen ṭhen lakhawm eita; an fail na
lien deu deu, ei ni rawi ta dinga inchuk ding alo um pal takin, sui met bawk ei
tih. Johnny Hunt chun “We must translate our learning into living if we
are to really make a difference” (Ei thlasawng pei hai laia danglamna ṭhatak ahung um ei dit chun, ei
inchukhai hi ei hringna in a tarlang ngei ding anih) alo tih. Tulai naupang
tamtak hin ‘Hero ding le Role model ding’ nasatakin an zawng
a. Chuleiin, film star dam, singer dam, sports person hai dam an entawna, an
biek deu thaw hlak. Chuleiin, pa hai hi nauhai ta dinga entawn tlak role model
le ṭhuoitu ni dinga insiem a ṭul em em. Nauhaiin pahai anlo
ringzo dan ka ngaituo po leh, 1956-57 laia Imphal kan hung inpem lut laia ka pa
mi promised ka hriet suok hlak. Lungthulien pem ti tak ah Imphala Bedford
truck le Chevrolet truck le bus hai ka hmu in kan hnar thei em ema. Ka pa kuom
ah asun azan in min chawpek dingin ka ngen hlaka. Awl rawngin ”I lien deu pha,
i khalthei ding hun ah inchaw pek ka che” ami tia. Ka ring em em! Lien fu kani
hnung khawmin ka la ring tlat chu tie! Tuchen hin ami lan chawkpek nawh!! Nau
in an mi ring anga hring ei tum ding anih. Eini rawi insuk hlim
ngiel ngiel le Sunday Kristien tamtak hai hi an nauhaiin ienga khawm an ngai naw
ve tlat! Hausakna, mi lien le sum hau nina naupang in an inza chuong nawh.
Naupang in an lungrila an hriet zing le an inza tak chu ‘Pa hai ding ṭhaṭhuona ṭawngṭai rawphai hi anih’ an tih. Bible a Pathien
thu sukdik tuhai:
- Abraham chungchang Pathienin Gen 18:19
ah “For I know him that, he will command his children and his
household and they shall keep the way of the Lord….” alo tih. A
ropui remrem ngei! Eini rawi hi Pathienin iengtin takin am ami comment ve
ding maw?
- Gen 35:2 ah Jacobin a sunghai po po kuom
ah “nangni laia midang pathien umhai chu siehmang dai unla,
insukthiengin, insilfenhai thleng ro; tho ei ta, Bethel ah feng ei tiu” alo
tih. Pathien be dinga nauhai inchuktir hi pa hai mawphurna anih. School ṭha le hostel mantama sie el an nawh. Mi tamtakin
an nauhai hmundanga an sie nasan chu ‘an enkawl pei naw lei ani
hlak’!
- Roreltuhai 13:8 na ah Manoa in Pathien
kuomah “Aw Lalpa ka hni che, Pathien mi I hungtir kha kan kuomah
hung nawk sienla, naupang hungpieng ding chu iengtin am ana kan thaw ding
mihung inchuktir raw se” a tih. Nau pienghmaa enkawldan ding lo
indawn lawk chu ei tam hehu ring aum nawh. Ei nei thei chen chen ei nei
ringawt anih! Eini rawi hin ei nauhai tution pek bak ei hriet nawh! An sie
hle pha pastorhai ko ei tum chau hlak!
- I Lalhai 2:1-4 ah David in a naupa Solomon in
Pathien thupekhai zawm tlat ding le pawm tlat dingin an fui. Eini rawi
chun ’Home work in thawtir le tuitiona infetir dingina
nawr ngut ngut bak ei hriet nawh’! Nauhai hang siem ding ziezang chu
ei ni nawh.
- Thilthawhai 10:2 ah Cornelius in anauhai le a
insuong thil pali (a-Pathien ṭi
mi; b-sunga Pathien ṭi;
c- Insung maicham siem zing; d- Mi retheihai sum
sem hlak) feltakin an thawtir. Ringtu ani hmaa Pathien be insung anih
Bible a pa hai fail na:
- I Sam 3:13 ah Pathienin Eli chungchang
ah ”A nauhan Pathien an hrilsietna suol chu hrezing pumin a khap
naw leiin a sungkuo chu kumkhuoa dingin ka ngaituo ding ani ti ka hril ta
sia” alo tih. Nauhai chunga mawphurna tlâknaw hi namen annawh.
Pathien suk lungsen theina chikhat anih. Nau chunga ei mawphurna ngaimaw a
ṭul
- I Sam 8:3 ah Pathienin Samuel a chungchang
ah ”Nisienlakhawm a nauhai chun aumdan chu an lak ve nawha, sum le
pai tieng an hnawta, thamna hai an laka, indik nawtakin ro an rela” alo
tih. Samuel kha Zawlnei anina ah a pass ṭha vei
leh, a nauhai chungah a fail let der anih. Pa anina ah a fail anih. Hi
taka bible in ahril hai hi tulai kohran in ringum taka an bawsiet zing hai
anih!! Biekin ah tiem dawk ngam la ning an ti?! ”Sum le pai hnawt,
thamna la, indik naw taka rorel”! Ei la sermon ngam?! Ei nauhaiin hung
ching ve naw hai sien maw!
- I Lalhai 1:6 na ah Pathien in David anaupa
Adonija chungchang ah ”Apa hlak chun ieng huna khawm ’Iengdinga hienga
I thaw am an leh’? tin ahal ngai si nawha” alo tih. Mi ṭhenkhatin Saphai thawdan anta’Naupang hal
le vuok loding’ anti hi khelbur an nih! Bible ah an ziek nawh.
Bible fepui naw zawnga nau enkawl Khawthlang hai neka nun ṭhalo khawvel ah an um nawh. Secular
inchuktirna evangelical thuring haiin ei pawm ding an nawh. Bible thu
thlak theiding khawpa inchuktirna ṭha
khawvel ah ala um nawh. An nauhai thlaruk mi khawm zalpui pei lo hai
nungchang hi ahril khawm hril vet ding an nawh! An nu le pahai an hmangai
naw zie chu kum 60 an tling pha Old Age Home a sie ding chauin an ngai!
Khawthlang mihai hi Pathienin tulai hin kohran rama hma la dingin a
buotsai kher ta nawh
- Thuvarhai in nau enkawlna chungchanga a
ziekhai po po pei thei naw ma nih. Pathien thu ani ti hriet a ṭha Prov 29:15. Mi inti var le secular hai
ngaituona hai eini laia sam khawm sam ding an nawh. Pathien thu le an kal
hulhuol anih
Chuleiin, Pa hai po po nauhai ta dinga role model
ni dinga insiem angai. In sunga hnena changna thuruk chu ‘Thlaraua hring’ ani
sia. “Ka nauhai Pathien thu taka an hring neka lawman nasa lem ka nei
nawh”. Amen
No comments:
Post a Comment