KA NGAIMAW THIL CHITE TE HAI

RK Puram Papui

          A kuor thla tieng chu ni tang ka tih ie, thil chite te hi ka ngaimaw thei rieu. Ka chier dawk ngai em naw a chu, ka lungril hi a hadam thei thlawt naw hlak. Insung tieng nisien, ka nau ha’n a umna dinga thil an sie naw ringawt khawmin ka lungril chu a lo chier hman hlak. Ziek dinga in fiel khawm nilo, mani ziek ngei, chu khawm chu sawiselna tieng ngha zawnga ziek, mi ngaimaw zawngtak magazine a hei insuo chu thawfuknaw lem chun insir umtak ni dingin ka ring. Lotheilova ngaiin ‘Delhi Thurawn’ hmangin ka hung chier dawk anih. Tawngbau thiemnaw ti taka, ziek khawm ka lo thiemnaw tlat.Thiltha dit lei lieu lieu anih ti mi lo hriepui ro.

Kha hma a inthawka ka lungrila hung inlang rawp le ka ngaimaw rieu hlak chu Hmar Christian Fellowship, Delhi(HCFD) ei inkhawm dan kalhmang/inthruoi dan hai hi anih. Darkar hnih inkhawmna ding hun ei nei a, ei hmangkhawp naw chang a tam. Ei Upa(Elder) ngeiin ditthaw deuvin hi hun darkar hni hi hmangtangkai ding le imu thatna dinga hmanglo hram ding anih, tiin vawi iemani zat chu a puong ta nghe nghe. Ei hun nei hi iengtinam inhawitak le imu suok hman lova hmang dan ding? Mani mimal a innghat chu ani ngei el. Anachu, inkhawm inhawi thei ding khawpa boruok siem theitu a then then ka lungrila um hei hril ka tih:-

1.    Inkhawm thuoitu/hun vawngtu:- Inkhawm inhawi na ding chun thuoitu/hunvawngtu hin maw a phur nasa khawp el. A then chun Bible an hei tiem a, an la hei se nawi nawk a. Pathien thucha hriltu’n a hril zo hnung khawma an la hei comment nawk hlak. Ka ngaimaw tawk hi a tling ve em em hlak. Special number/puongding etc  a tam chang lem hin chu Thuhriltu pa’n minute tlawmte chau a chang ta hlak. Hieng hun a hin hunvawngtu thiem a pawimaw em em bawk. Lotheilo thil chu hun hmasa tieng sie a, Pathien thucha ngaithlak zo a, hun a la um ani chun, item danghai chu hril/ko nisien. Chun, Pathien thucha hriltu ding mikhuol ani lem chun, hunvawngtu’n, ei hun nei zat hai, thuhrilna ding hun a nei zat a kuomah hril ngei sien bengvar thlak ngawt atih.

Hunvawngtu dinga ei ruothai hi a awm deu dinga ei ingaihai ruot hlak inla, thalaihai chu anni puol a inkhawmna, zirtawp zan zat le Fellowship a thlakhat a vawikhat an nei bawk leiin naupang tieng nek hmanin, a upa tieng annawleh Executive Committee members ni ngei hai sien.

2.    Hla thuoitu:- Kha hma, iemani chen an’thawk khan mipui ep zawnga ngir in, ei thalaiha’n mipui hlasak an va thuoi hlak a. An va ngirin, hlim sar in hla sak thei hai sienla, a zawm khawm inhawi a tih. Khuong vuo thiem hi ei tamnaw hle. Khuong ri mipuiin ei zui ding ani lai, a chang hin chu khuongin mipui hnung a zui lem hlak. Music beat in khuong an vuok rem theinaw bawk. An rang deu ding le a muong deu dinga vuok khawm hi hriethrang a hun ta ie.

3.    Thuhriltu:- Inkhawm inhawina ding chun Thuriltu in maw a phur tak. HCFD a hin Pathienthu hrilmi hi ei umnaw khawp el. A hriltuhai khawm ei hril dan kalhmang historical tieng hi ei uor hman hman am aw? Thlarau chawmna ding, ei kristien nuna ei hmang ding zawnga hril an tam nawh. A then hlatak a inthawk pawisa-sum tamtak senga hung inkhawm anni leiin, inkhawm man(worth attending) um an ti diem? ti dam ka lo ngaituo hlak. Mi tamtak chu Thuhrillai hin an in(nap) hlak. I thuhrillai mi an lo inlusu ani chun, mipui thiemnawa sie bur chi ani diem. I thuhril khan mipui I hnenaw ani lem el diem.

Pastor ei nei ve bawk a, vengtienga inthawka Pastor an hung siehai le chu 4/5 ei nei. Pastor thuhril chu mipuihaiin an ngainuom lem hlak. Ei Pastor Bible a graduate hnungin(ka hriet suol naw chun) vawi 2 vel chau thuhrilna a la nei. HCFD Biekin inkhawmna a chu, ama hi a starring ni awm tak anih.

4.    Ushers:- Ushers dinga ruothai hi a then chu an thaw ding tak an hriet nawh. Thungna kawkhmu takngiel khawm an thaw inkhat hle. Senior, thawdan hrie deu le junior deu hai ruot pawl deu inla chu an hung thiem ve pei ring a um.

5.    Hun ruottu:- Secretary/Chairman/Asstt Secy, HCFD in Pathienni nawka hun changtu dinghai an ruot lawk hlak. Tantu in a hun chang ding khawm a hrietnaw chang a um, an khawm naw lem chun a hming a sie hlak. A chang leh inkhawm huna a hriet fawm mei mei dam ani hlak. Chuongang bawkin Chairman dinga ruothai khawm. Chuleiin, hun ruottu hin hun changtu ding a ruot dinghai hi phone in confirmed zet sien chu  a tha awm ngei. Chu baka, welcome speech hi a la tha tawk nawh. Mikhuol lo lawmlut dam hi thaw ngei ngei chi.

6.    Pastor le HCFD Thuoitu:- Inkhawm hun hma a chibai lo sem dam hi thil thatak anih. Mikhuol lem chu chibai ngei ngei chi. I hrietnaw khawma chibai bukin introduce(in hmel inhrietna) nei ngei ngei chi anih.

Ka ring nekin ka chier-inrhluok hman hman in ka hriet. Miin an faknaw vieu chun inzak chem. Chem ka ta, ziek ngai ta naw’ng ka tih.