CHANCHINTHAR

HSA Delhi President A Hung Tlung:

            Hmar Students’ Association, Jt. Hqrs., Delhi President sin chel lai mek Pu James Pusing Sanate (E, kan ziek suol an nawh. Tv. ei ti hlak kha Pu ti a tul ta si a ngei rem lo tutin ei zuk ti tan phawt an ta hih!) chu Rengkai, Tuithaphai ah ei Treasurer Esther L.Hmar leh kut insuina an nei zo hnungin an khuo Parbung tieng chawlkar khat vel an zun zin nawk a. Tuta kar liem khan dam takin Delhi an lo hung chuongkai nawk tah. Sungkuo hlim tak indina ei khawtlanga an mawphurna hai thafan taka sunzawm pei dingin Tuokthar, ei President le First Lady/a nuhmei hi ditsakna ei inhlan a nih.

Pu Ruolngulji Hospital A’nthawk Discharge:

            April 16, Thawtanni a sung tieng harsatna a nei lei a Safdarjung Hospital a admit Pu LH Ruolngul aka Ruolngulji chu zani, April 21 khan Damdawi In a inthawk insuo a lo ni tah. Hriselna tha lem le a sinthawna tha taka sunzawm thei nawk vat dingin ditsakna ei inhlan a. Ei tawngtaina a khawm lo san zui pei dingin ei in fiel thar bawk.

Sunpuina:

DHWA member le DU North Campus tienga ei thuoitu hlun ve Tv. David Joute u pa, Tv. Joseph Lalruotsang Joute, Hmarkhawlien chu April 17, 2012, Thawlenni khan inverter a siem lai a chang suol pal leiin hun lo takin muol a mi lo liem san tah. Hi zan la la hin DHWA le HCFD chun Pu RH Hminglien Hmar in, Sector-4, RK Puram ah ralna hunser an buotsai. Lusun tuortuhai ei tuorpui takzet a, thlamuongtu Lalpa Pathienin hliekhu in an hma thuoi pei raw se.

Free Coaching Tan A Nih:

            Ruonglevaisuo Education Society hmalakna in zani, April 21, Inrinni khan sawrkar sin thaw nuoma Competitive Exam pe mek hai ta ding bikin 52 Building, Munirka, New Delhi ah khawm Free coaching (Athlawna Incherna?) tan a lo ni tah. Incherna hun tan a ni hma hin Pastor Lalsiesang Joute’n tawngtaina’n hun a hawng. Inhnikna nei hai chun Pu Lalchungsiem Thlawngate kawlah ngaiven thei la ni awmin anlang. Kum liem ta anthawka HSA Delhi khawma buotsai tuma lampui a dap zing lai RES in inchuklaihai hmakhuo ngaituona lei lieu lieu a hieng ang hamthatna an hung intlun hi lawm a um takzet a. Inchuklaihai khawma sawr ngei tuma thang la ding le, RES khawm nasa taka hma la zawm pei dingin DT chun a ditsak takzet a nih.

Pu Laltlana Chhangte Anzin:

            Ei thuoitu Pu Laltlana Chhangte chu a sangpa John Chhangte nuhmei nei ding leiin tuta kar khan Delhi suoksanin an khuo tieng a lo inzin suok thu ei palai a’nthawk ei lo dawng. Dam taka a hung kir nawk vat ei beisei.

HCFD Inkhawm Programme:

            Sunday School

A Hun- April 29, 2012, Pathienni

            Inkhawm Vawngtu- Upa Ruolkhumlien Buhril

            Tantu- Pi Lalrotluong Pulamte

            Thuoitu- Upa Ruolkhumlien Buhril

            (Subject- Exodus 26)