TO A SKYLARK

                                                              (P B Shelly) 

                                                                                            Translated by Thangnuntluong Ralsun

                                                                                            Sunday, 12^th August, 1990

                                                                                            Lower Minister Hill, Kohima                                                                                                                               

                                                   

Chibai  vochuom, rauthla ngainobei;

          Sîrvate hrim in’nawh.

Pielrâl a’nthawk; an’nawleh a kâwl a’nthawk bêkin

          Insuo hlak; i lungrila sipliem chu,

Zaihla tam tak le inzir si lova thiem tak siin.

Insâng tiel tielin;

          Hnuoi a’nthawk boruokah

Meikhu ang elin i vuongkai a;

          I thla dumpâwl le chun,

Zaihla rem peiin hlimzai i vâwr hlak.

Inno nghiela

          Zântieng tũrni tla riei rieiin a el var,

Sûm êng inno phût hai chunga khin

          Vuongin i tlân vêl a;

Rauthla a’ntlânsiekna inṭan cho ang elin.

Tûrni tlâk tâwm kâwlkawdawnga sûm senduk* khawm

          A bo hlak; i lêngna phawta.

Pielrâl si-âr angin

          Sûn vara khawm;

Sîngmita hmu thei ni naw lakhawm ka hriet si hlim taka râwl         mawi insuo chu.

Zîng ârasi var tak;

          Thalzum anga ngei,

Zîngkhuo a hung vara

          A ropuina a hung bo pha

Hmu thei ta si loa a um zing kan hriet angin.

Leihnuoi le boruok po po

          I râwl mawi tak chun a suksip a,

Zân boruok inthieng taka

          Sûm vâr hlawm khat chovin

Sawrthlapui varna hmanga vân po po a el var angin.

Kan hriet naw che; ieng thilsiem hrim am i n’a ?

          Ieng thil le’m hrilkhîng kan ti che a ?

Sûmrisâng a’nthawk a suok ngai nawh

          Ruomal, vâr sieu el hmu ding;

I lêngna phawta rimawi khuongruo anga sûr hlak hi.

Hlaphuoktu taptawm tak;

          Suongtuona inthûk tak leh

Mariekte-a khuonu chawimawi a;

          Leilung, beiseina le lunginsietnaa danglam hiel khawpa

Zaihla’n in-awia; ṭitna hrim hre lo angin.

Tleitîr hmêlṭha angûr lanu-in,

           Lal insâwng a’nthawk

A lungdi leia a beidawngna

          Mariekte-a zaihla’n a in sip rum rum a

A’n awia; a phur rik a zâng huoi angin.

 Daidawhai tlâkna phairuomah;

          Rângka ienga tle sieu chawkchawnâlin*

Tu dang hrim ngai lo a;

          A zie mawi tak hringmihai tâwnah thup a;

Pârte le hlobet hai vul chieina hmun chovah a’nzâmvêltir angin.

         

Sâp pâr mawi tak;

          A hnain a hliekhu;

Thli lumhaiin an mût ṭil a,

          A rim hrât takin

Virthli lênghai a sukchau hiel angin.

Nipui huna hlobet tle sar hai

          Chunga rimawi tinrêng hai;

Ruotuiin a keitho pârtehai,

          Thil iengkim; a mawi, fel le

Thar hai hi i zaihla thiemna chun a khûm vawng hlak. 

Mi hril rawh; nang rauthla am sîrvate;

          I dâwn lungrûk khuoi anga thlum chu.

Ka hriet ngai nawh

          Hmangaina  ’mani  zu inpâkna;

Chuong lâwma ditum; tui anga lien, hlimna tâwpkhâwk;

suilungrûka  mi’n dâwntirtu chu.

           

Mo lâwmna hla

          An’nawleh hnena hlado

Hai chu i ta an nih, sienkhawm

          Takbo chapona cho maw lo nih !

Kan ngaithiem nawh; kan tâwna thil hlu i thup tlat chu.

Ieng thilhai am an n’a

          Hlimna hla châng i dawng bîkna chu ?

Khâwlai lo am, ieng tuifâwn le tlâng am

          Ieng ang vân dumpâwl le phaizâwl am ?

Ieng thil am an n’a; hmangaina le natna hrim i hrietnawna  chu ?

Chau le nguina hai chu tiem lovin

          Nau ang nuina  cho i ta a nih.

Lunghnûrna hlimthla rêngin

          A hnai ngainaw che.

Hmangaina i’n suo a; hmangaina chu nau ang ṭapna ti hrim hre lovin.

                                                                                          

I ṭhung le i in innghil lai amani;

          I thini chen khawmin

Sui dikin dâwn thûk lem ngei i tih;

          Keini; thina nauhaiin tawn-manga kan hmu nêkin.

An’nawleh, i hla mawi hai chu ieng ang lâwma ropuiin am an luong suok a ?

                                                                                         

Hun la tlung ding le liem ta hai kan dâwnin;

          Teplo hai leiin ṭap zai kan rêl a,

Ha hîpa kan innuina khawm chun

          Mitthli a pai a.

Châwnbân vâwra nau ang kan nui hla hai chu luoithli nûla kan 

                                                                        ṭap hlahai an nih.

 Hmusitnahai,

          Theidanahai, chapona le ṭitnahai kan hriet si,

Sienkhawm luoithli hrim nûl lo dinga

Hrin lo ni inla  chu;

Ka hriet nawh; nangma anga hlimzai kan vâwr theinawna ding chu.        

Râwlmawi chi tinrêng hai,

          Khawvêl sum le pai;

Lekhabua inziek po po nêkin

          I zaihla thiemna chu a mawi lem

Hlaphuoktu tâwnah, nang piellei hmusittu!

Mi hril ve rawh, a chenve bêk;

          Dâwn lungrûka i hlimna ngei chu.

Chuong lâwma rimawi invêtpui khawp hiel chu

          Luong suok a tih; ka hmûrhaia inthawkin;

Chuong chun, khawvêlin ngaithlâng a tih; vawisûna na ka sit ang hin.              

                                                                                                                                     *Hmarṭawnga a tlukpui um lo an nih.