A silfen hai an in sem a!!!

A silfen hai an in sem a!!!

Jim Greene

Tukum Goodfriday ding chu ka lungril khawma alo um fuk rek ta naw a, ngaituo khawm ka lo ngaituo phak ta naw reng renga, zankhat chu ka sinthaw na a tuta zirtawpni chu Goodfriday ding ana ka hung kainaw ding ti ri ka hriet chun ‘Lungai hapta’ a um kani ti chu ka hung inhrietsuok ta ve cho a, ka lungrilin Goodfriday ka hang ngaituo chun, kalvari tlangdunga hmangaina thang der lo a ka Lal an sawi lai hmel dam chu ka suongtuona mitthla a chun a hung inlang ta vel vawnga, khawvel mi taluo ringawt, lunginsietna le hmangaina tawngbau lem chu vawi iengzam ang bau a inthawk a suok ta ding ti ngaituo um rak khawpa mi rorum, hmelma hai sawisak na tienga chu na talu neilo

le an nunrawng leia mi hriet kai phak Rome sipai haiin an deusaw vel ding dam ka ngaituona a chun a hung thar ta zung zunga. Chuong laia kil khata ka Lalpa sinfen mawitak el chu changnaw inlaua Rome sipai haiin Lamka, Churachandpur kawtthlera krismas tawma mipuiin Secondhand thin taka an thin ang ela an hang inchu vel ding chun ka lungril ngaituona po po chu a hluo khat vawng ta a. Kawngkhat ngaituo chun Krista hmangaina chu hril lo Pathien tak hre lo le inza lo hai thilthaw ani ti ka hrietchiengna chun ka tuornatna chu a zie a hung um ta anih.

Chuonga ‘a silfen hai an insem a’ ti ka ngaituo mek lai chun, iengtik lai khawma ka lungril thi ngai lo ‘Kohran’ tirko Paula chun ‘Krista Taksa’ ‘Pathien In’ tia alo ko hlak, Isu Krista thina le thonawkna leia hung piengsuok chu ka hrietsuoka. Hi ‘Kohran’ ngei hi Hmar nau hai lai kum 1910 khan Pu Saptlangval tia duot taka ei pi le pu hai an lo ko hlak rawngbawlna leiin alo hung insieng tan veta kha anih. Hmar hnam, hnam inthuruol, hnamdang hai do ding khawma inthlathlam ngailo, tlawmngaina nunmawi leia mi hriet hlaw hlak hai chu khawvel thu neina le inlalna a inthawk Krista nunmawi insiltir in alo um ta a. Kristienna chun zung a hung kei inthuk deu deu a Kohran chu an thanglien peia, sienkhawm kum 20 an vei cho chun suol sinthaw leiin (sap putar hmangin) hnam inthuruol em em, kohran inthangduong lai mek chu kei nawi in, pawl pahni in a hung siem ta anih.

Hmar kohran histawri tieng chu a hretu hai deu vawng eini leiin hril talu dal ka tih. Amiruokchu, kum 1930 a inthawka vawisun ni chena Hmar kohran hi Tirko Paula in Korinth kohran hai ang khan lekha mi hung thawn ve ding nisienla iengtin am ziek a ta? ti zawna hi sui lem ka nuom anih. Korinth kohran hai kha thlarau mi hai ang in a address theinaw a, asan khawm chieng em em in a ziek sa bawk. Vawisuna Hmar kohran hai hi te thlarau mi hai ang in ami address ding am? Kum 100 kristien ni hnung khawma naute ang in nene tui in ami la chawm ding am? Ei hnam sunga kohran le kohran kara hin inthikna le insel na a um sung chu…Hmar kohran hai hi thlarau mi hai kuoma thuhril ang in a hril thei ring a um naw ie…

Gospel centenary 2010, Hmar hai in ei lawm na a Delhi thalai hai in drama an thaw kha ka ena ka lungril a them khawp el. Kohran indaidanna sukbo le inpumkhatna siem hi ka  phurna zawng tak ani bawk leiin kan pak tawl in script writer khawm lungril a nei hle in ka hriet, a changtu hai anhnesaw bawk. Lekha a inziek kohran hming an hang keithler deu hmak hmak kha chu mi thenkhat hai lungril ana in, mi thenkhat lungsen khawm an um ni awmtak anih. Drama thawtu le phuoktu hai thiltum chu mi lungril sukna le suksen chu ani ring a umnaw khawp el. Kha drama khan a thiltum chu thawk le khat in ra tha insuo nghal naw sienla khawm lunghnuol lo in Delhi a fellowship hmunkhat a inlawi Hmar kohran fe khawm hai hin hma sawn pei lem ei tiu. Chu thaw theina ding chun ei lungril a hai seng hin kohran in daidan na hi keithler in, inpumkhatna chi hi ei lungril senga inthanglien tir hmasa phawt ei tiu.

Hmar kohran inpumkhatna anthanglien theina ding chun Delhi a Hmar kohran hai hin mawphurna ei va nei insang ngei de! Delhi hmuna fellowship hmunkhata ei inkhawm el chau hi annaw anih. Hmar kohran inpumkhatna dingin kohran hming pakhat, biekin pakhata inkhawm kher kher a pawimaw tak nawh.  Ei veng tieng seng ei kir pha khawm nisien, hilai hmuna ei umlai khawm nisien, ei lungril senga hin kohran dang hai inkhawm khawm Hmar kohran inkhawm ani ti a lungmuong taka thangthei na nun nei inla. Kohran dang hai rawngbawlna khawm ka rawngbawlna ani ti a lungril taka ngai thei a pawimaw anih. Chuongang ni lo a ICI inkhawm, EFCI inkhawm, RPC inkhawm etc le rawngbawlna anga ei ngaia, ei thangtheinaw sung chu kristien tisa mi, naute anga nenetui a chawm ngai ei la ni zing ti na anih. Tirko Paula tawngbau takin Appolo chu tum anleh? Paula chu tum ani leh? Watkin Robert chu tum anleh? Coleman chu tum anileh? rawngbawltu eini min awitirtu chau annih, an thangliengtir tu chu Pathien anih. Nangni Appolo pawl, keini Paula pawl kan nih eiti sung chu mihriem, tisa mi eila nih. Krista lungphum chunga rawngbawltu hai fimkhur ava ngai ngei de! Mei a fie in ei la um seng ding ani si. Saptawngtakin inclusivism anih, exclusivism le separatism hin ra tha insuo naw nih.

Kum sanghni (2000) liemta khan Rome sipai hai chun anni hamthatna ding in  Krista silfen hai chu an insem ngeia, kum 1930 kum khan Hmar kohran lai Krista taksa, Pathien in chu keithler in semdar alo ni ta bawk (asan le ani dan chu hrildan a tam leiin hril dal ei tih). Chu hun hung fe pei chun Manipur a hnam chi tam taklaia, kristien um hai laia chu kohran pawl hau tak eila nih. Vawisunni chen hin eini Hmar kohran hai hin Krista taksa ei lan sem zing ding am anih? Hi Krista taksa ama ngei inmantir ani ding zana a sem, inmi hrietzing na dingin thaw hlak ro a ti le khan chu an angnaw anih. Bible thu tak chun kristien tisa mi, Pathien In sukhawhlo tu hai ei nizing annaw maw? inngaituo that ava huntawk ta de! Krista thina chun kohran tadingin hringna antlun ang hrim hin Krista thonawkna hin ei lungrila kohran hung zuongtho sienla nuom a um ngei. Hmar kohran hai hin theitawp suoin Krista taksa semdarna hi suk boin, inpumkhatna dingin thang latlang ei tieu. “Tukhawmin Pathien in chu a sukhawhlo chun Pathienin ama chu sukhawhlo veng a tih. Pathien in chu an thieng sih a, chu in chu nangni (Kohran) in nih. Tukhawm in ama le ama inhlem naw raw se…” (1 Korinth 3:17-18)