Remna Palai - Pu Timothy Shakum

Mitin le inrem a leng khawm diel diel ei nuom seng ring a um. Insung khawm inrem tak a khawsak tlang chu an hawi em em a, lungril hai inhmu tuo in, thiltum le ngaidan hai khawm tlang tak in inhrietpawin a um hlak, hienghai lei hin zalen le thawveng tak in khawsa tlang thei hlak a nih.

Chuongang insung a chun, lungril le ngaituona ram khuokhirna a um naw leiin ‘decision making’ le lungril hrat tieng tluk ruol an ni naw. Asanchuh, a sie-a-tha hai tlangtakin an in hriltlang hlak leiin, sungkuo ta ding a hrisello hai chu hnawl hmangin a thra ding hai ruok chu lunginruoltakin an changchawi tlang hlak leiin. An insung a chau inremna inleng lovin, an tuolbawm hai, kohran le khawtlang hai le chen an inrem pha hlak a nih. Hitaka inthawka a rasuok hlawk zie chu – sungkuo a a chintak a inthawk a a lien tak chen in mani inringzona a piengsuok a, ngaidan thawveng le tluongtak el an nei tir pha a, khawtlang le kohran rama mi ditum le hmangtlak tak tak an hung ni pei a nih.

Nisienkhawm, hieng a inrema khawsak lai zingin thil pakhat/ pahni lei dam in insung a inhrietthiemnawna a um thei. Chu lai a inremna siem tu ding a pawimaw em em hang en ei tih. Remna palai sinthaw dingin mitam le thil tam a ngai kher naw. A hun taka lo um fûk, hril le thaw fûk dam a ni lem. Insung a nu-le-pa an lo insel deu a, inkhat nu a lo inhmur bur chang khawm nau hai in nu le pa kara inremna an siem thei a nih. Chuongang bawkin, insung a mitinin chu sin thra le pawimaw chu an thaw thei seng a nih. Remna inlengna insung ei dit seng, hi intlansiekna khawvel a hin mi neka thra, fel, thiem, khawsa, neinung le hrie thei lem ei nuom si leiin. Chu chu nang le keiin ei thaw thei a nih.

India le Pakistan inlaichin dan ei hriet seng ring a um. Awna zawng dawp dawp ve ve an nih. Rul in ka mei sir sien chuk lang ti ang deu in an thiem naw na an in zawng tuo a. Rambung pakhatin a pakhat lem a biek tha deu le a dang in chu rambung chu lo tlawn tha lem a inruolthatna thalem a lo siem pui tum nawk lawi si. Hiengang an ni lai zing hin, tulai hnai el a India External Affairs Minister nithum sung Pakistana a cham sung a mani ram sung a in lut paw ‘visa’ a awlsam lemna dinga thuthlung an ziek khan nasatakin hieng rambung pahni hai kara hin inhrietthiemna a hung ngirsuokin inremna an kara a hung um pei beisei a nih. Hi thuthlung thiltum laia thenkhat chu – India miin an sunghai Pakistan a um va kan vat theina dam, sumdawngtuhai awlsamtaka insirpaw/ inlutintuo theina dam le naupang/upa tieng hai ramri an tlung hnunga luttheina phalna pek ding dam a nih. Hi lei hin Pakistan Foreign Minister in hi rambung pahni inkara inhrietthiemna hung rasuokin inremna a hung zuol pei dingin a hril a nih. Remna palai dingin thil lientham a tul kher nawh. Hi ‘visa’ thuthlung hi remna palai pawimawtak a hung ni beisei anih.

Bible a Barnaba chanchin hi ka sui nghawk ngainaw a. Ama hi thlarauva sip, mi tha, huoisen le a tulna pova tir inlawna hmang a na. Mi tadinga inhmang le mi tangkaitak a ni bawk. Rimsi, pasie, thangpui ngai le sawmdawl ngaihai ta dingin an pek zoa, a thilneihai khawm inro lova pe hlak mi a nih. A thiltha thaw tamtak laia ei thupui le inhme pakhat cho hang tarlang vat ei ti, a danghai chu hun remchang a ei la ngaituo tlang ding nisien. Remna palai sin pawimaw tak tak Barnaba hin a thaw a. Tirko Paula kha a pienthar hma in ringtuhai kha a suknawmnasa thei hle leiin khanga Lalpa Isu Krista an tuokpui hnunga Ama ta ding choa rawngbawlin Jerusalem tieng a fe mihaiin an ti em em an zâm san pei chu Barnaba hin a keithuoia, thuoihruoihai kuoma a fe pui a, a hnunga Paula chu Jentail Tirko ropuitaka a hung ni kha. Paula le mipui/ thuoihruoihai kara remna palai sin Barnaba’n a thaw leiin ringtu tamtak an hung pung a, chuongchun chanchintha chu an dar ta pei a nih. tumkhat khawm Paula le Marka inkara inhrietthiemnawna umin Paula’n Marka chu rawngbawlpui dingin a dit ta naw a, chuonga Marka hmangtlak ni ta lo ding chu Barnaba in taimatakin an zinna ah a thuoina le Pathiena beseina neiin sukpuitling a tumna chu a hlawtling a. Marka chu Chanchin tha ziektu, Paula ngei khawma a khawhnunga mi tangkai a hung ti nawk hiel a ni kha. Barnaba in hiengang remna palai sin a lo thaw hi a tha in a hlawkpui tu hai chu vawisun ni chen a ei ni hai khawm ei hung ni ta pei a nih.

Thlatu Adam le Evi bawsietna leiin Pa Pathien le hnuoi mihriem inrem thei ta lo hai chu, A naupa Isu Krista Pathien Beramte kros lera a thina a thisen lei chun van le hnuoi inremna puong in a um ta a. Pathien lunginsietna A naupa Isu Krista a puonglang a um, chu ringtu le pawmtu hai chu Pa Pathien le inrema umin A nauhai ei hung ni ta pei a nih. A va hang tha in lawm a va um de! Haleluia ti a Ama a hlim le lawm ding hi ei ni ringawt el a nih. Chuleiin unauhai abiktakin thalaihai, ei hmabaka anhawina le thatna le ei hlawkna ding chau ni lovin, a rinum le harsa, mi thaw pei lo le dit lo khawm nisien, Lalpa en tlatin, siemthatna lungril nei tlatin ei insung, kohran le khawtlanga ‘remna palai’ ni dingin Krista chun a mi thlang an ta. Chu ding chun insiem seng ei tiu. Lalpa’n a thu malsawm raw se. Amen.