CHANCHIN LAWRKHAWM 11 Nov. 2012

@@ SSC le UPSC hnuoia exam: Vawisun hin ei thalai tam tak hai chu SSC huoihawtna hnuoia FCI Assistant grade III le UPSC hnuoia CPF (AC) exam an tih, hlawtlingna chang ngei dingin ei member hai ei ditsak takzet a nih.

@@ Mi pahni Emergency Operation: Pi. Lalthienghlim w/o Pu. Vanlalmuon Joute Munirka chu Tubal Ectopic Pregnancy leiin liem tah Nov. ni 8 khan Fortis Hospital. Vasant Kunj-ah emergency operation thaw a nih. Ama hin thisen unit-4 zet mamaw ni a, chu mamaw phurhruktu mitlawmngai mi pali hieng 1) Tv. Samuel Lalhuopzau 2) Tv. Joseph Sanate 3) Pu. Thathang Leivang le 4) Tv. Zonunmawia Pachhau hai hin thisen an lo pek a nih, anni hai inpekzona hi a hlu-in inpak an um takzet. Chuongang bawk chu Pu. Roland L Hmar h/o Pi. Marilyn Lalrolut, Mahipalpur chu tarik ni 9 (Friday) zan khan rilphir (appendix) natna leiin Charag Palika Hospital, Motibagh-ah panpui a ni a, ama hi at a tul nghal ding an leiin Safdarjang Hospitalah emergency operation dingin refer a ni a, chu ang chun Nov ni10, Inrinni zingkar 6:00am lai khan Operation chu hlawtling taka nei zo a lo ni tah. Ama khawm hi thisen unit hni pek a ni bawk. Damna tha tak chang zawm pei ding ei nuom pui tak meu.

@@  North East Council (NEC) in Parbung khuo-ah Mini Stadium bawlna ding sanction a pek:  Tipaimukh Sub-Division Hqrs Parbung-ah NEC in Mini Stadium ( playground with gallery) bawlna dingin Rs. 7.197 crores zet alo sanction der el ta thu Sangngai Express 10th Nov. 2012 issue chun a lo suo. Hi playground hi bawl zo huna chu Churachandpur District a playground tha tak le  a lien pawl tak dinga hril le beisei a nih. Iengtikam bawltan a ni ding ti chu thu ching ei la hriet nawh. Games & Sport tienga hiengang sanction ei hmu hi ei hnam mi suk hmelhemtu nek-in, sukmawitu hung ni ngei dingin ei ditzat tak meu.

@@ 1st North-east India Choral Singing Competition 2012 nei ding: Voisun tarik ni 11, Nov. 2012 5:00pm hin 1st North-east India Choral Singing Competition, nidanga la um ngai zen zen lo chu Tangkhul Christian Charitable Trust hai huoihawtna hnuoia Thyabaraj Stadium Shri Ganganath Marg INA Colony-ah nei ning a tih. Hi inruosiekna a hin eini tlangmi hnam hrang hrang hai Choir 13 vel chu thang dinga beisei an ni bawk. HCFD Thalaipawl khawm thang ngei tumin hun iemani chen anthawk khan a lo insingsa ta kha a ni a, hlawtlingna chang ngei dingin ditsakna DT chun an hlan ngal bawk. Hi huna hin eini tlangmi hlasak thiem tak tak hai anthawk khawmin special performance um bawk a ta, chulai chun ei member Nk. Roselyn Lalumpui khawm a thang ve. Hi hun a hin Chief Quest dingin Mrs. Sheila Dikshit. Hon’ble Chief Minister. Govt. of NCT Delhi ning a ta, Guest of Honour in Mr. Rishang Keishing. Hon’ble Member of Parliament Rajya Shabha ni bawk a tih. Inruolsiekna el cho niloin  chawhnung 1:00pm-3:00pm sung hin Chawibiek inkhawm Kohran/Fellowship hrang hrang hai fekhawmin nei ning ata. Rev. Arun Andrews Minister at Large. Ravi Zacharias International Ministry chun Pathien thu hrilna nei a tih.

@@ Joint Meeting nei ding: Hung tlung ding tarik ni 13 nov. 2012 hin Bethesda Social Service Centre, Mahipalpur New Delhi hmunah Delhi khawtlanga Association um pathum HCFD, HSA le DHWA a executive members, Adviser, Pastors, Valupa, Nghakupa hai Joint Meeting nei ning a tih. Hi huna agenda pawimaw lai a pakhat chu ‘Delhi tlanga Hmar mipui hai Society le Kohran-ah inthuruol taka kal ie chawi pei thei dan ding’ ni in ei thu dawngna chun a hril.

@@ Vengbuk Bible Study nei a nih: Karliem tah 5th-10th Nov. 2012 sung khan vengbuk Bible study vengbuk hrang hrang haiah nei nawk a ni tah. Ei Bible study chu John 14: 15-31 sung a nia, zan liem tah inrinzan kham Mahipalpur-ah Pastor Lalsiesang a rawiin khawmin inhawi taka hmang a ni thu ei palai in a hril.

@@ Ni 40 le zan 40 bunghei tawngtai nei a tawp tah:

Pi Lalremsiem  Convener nina le EFCI Central Nuhmei Pawl Organised-na hnuoia nei September ni 25, 2012 a inthawka tan tah, ni 40 le zan 40 bunghei tawngtaina NPT Prayer Mountain. Muolvaiphei-a nei chu November ni 3, 2012 khan hlawtling taka hmang zo a lo ni tah. Hi taka hin mi 1826 a rieklut an uma, a thang po po chu mi 28000 bawr vel ni a hriet a nih, mi 80 an piengthara, mi 376 in Pathien a inthawk damna an chang-el khela Zu, Damdawi. Dendrite edict iemani zatin insiemtharna an chang el khela Setanic pawla thang mi iemanizat-in inpuongna annei bawk thu ei thu dawngna chun a hril. Malsawmna dawng thar hai po po Pathien thuoina dawng zui pei dingin ei ditsak takzet.

@@ Delhi Hmar Sikpui Sport nikhatna zo a ni tah: Zani tarik ni 10 Nov. 2012 khan Pusa hmuna Sikpui sport (Batminton le Table tennis) hai chu hlawtling taka nei zo a lo ni tah. Hi inkhelna a fekhawm tuhai inhawi an ti tlang hle thu ei thu dawngna chu a hril. chanchin kimchang lem phek-10na-ah.

@@ 6th NE Tamchon Football Trophy: Hungtlung ding 17th Nov, 2012,(Inringni) 2:30pm hin 6th NE Tamchon Football Trophy chu Dr. Ambedkar Stadium Delhi hmun a tan ning a tih, hi taka hin HSA Delhi khawm thang ve in nasatakin pakhatna la tum in an singsa mek a, league match HSA FC in an khelpui ding hai chu :

Dt. 19th Nov. 2012, 12:30 Noon V/s SSPP (Peite) Dt. 22nd Nov. 2012, 12:30 Noon V/s ASUD FC (Arunachal) Dt. 24th Nov. 2012, 10:30am V/s TSFD (Tripura) an nih.