Lawrkhawm 4th November, 2012

## Promotion hmu thar: Tarik ni 30 Oct, 2012 a Central Government hnuoia Section Officer hai promotion order suok a, Delhi Hmar Welfare member Pu Pumzalal Pulamte, (H/o Dr.Sangkim Pulamte) Urban Development Ministry a Section Officer sin thawlai zing chu Under Secretary ah a lo promotion ve tah.

Hiengang promotion a hmu hi DT chun a uongpui hle ruol ruol in ditsakna an hlan nghal bawk.

## DHWA meeting nei: Zani zantieng dar 6 vel khan, 2012 Sikpuiruoi nei ding le inzawmin DHWA Sikpui organizing committee meeting, Pu. Hrangthangvung a in-ah nei a nih. Sikpui organizing committee a inthawk thu ei dawn dan in tukum Sikpuiruoi chu RK. Puram Sec. 1 Grih Kalayan Kendra hai hmun a 8th (Saturday) December, 2012 hin hmang ding in a lo suk tluk tah. Phur a um ta takzet. Ei thuoitu hmalakna hai po po hi inpak an um takzet.

## Innei ding: Delhi tlangval lo ni hlak Tv. Ebenezer R. Sinate S/o Rev. Rosung Sinate le Nk. Jenice Lalparvul D/o Pastor. Hmangthankung hai chu tarik ni10 Nov, 2012 hin Sielmat ICI Biekina kohran danthienghlim in kut insuina an nei ta ding thu chanchin ei lo dawng. Ei lawmpui takzet

## Sin hmuthar: Mizoram Engineering Service (Power & Electricity Board) in Assistant Enggineer/ Sub-Division Officer post exam an conduct, final result suok a chun Delhi tlangval Isaac Tlangte Zote S/o Zosanglien Zote, Aizawl/ Lawngtlai chu a lo tling ve tah. A hlawtlingna chang hi DT khawmin a lawmpui takzeta, ram le hnam ta dinga mi thangkai tak hung nizawm pei dingin ditsakna an hlan nghal bawk.

## Delhi lo suoksan ve tah: HCFD a ban pawimaw taka ei nei hlak Pu. Timothy Shakum, Chairman Dept. of Music & Youth Affairs le Executive member HCFD chu a sinthawna le inzawmin liem tah October ni 30, 2012 khan Gandhinagar,Gujarat hmun-ah a lo insawn tah. Ama hi Ministry of Defence ah Section Officer nilai mek a nia, Gandhinagar, Gujarat hmuna hin kum 2/3 bawr vel um ding beisei a nih. A transfer ding le inzawm hin liem tah Pathienni 28^th Oct. 2012 khan HCFD inkhawmna hmunah Upa. Dr. Lalsiemlien-in inthlana thucha hrilna a lo nei ta kha a nih. Nu le nau boin hun iemani chen chu la hang um phot a tum thu ei lo dawng, chu ruol ruolin nu le nauhai chu khawsawt leiin siksikriu anhram el ta ani thu ei thu dawng chun a hril.

## Dept. of Music & Youth Affairs HCFD Chairman thar nei: DOM&YA HCFD Chairman Pu. Timothy Shakum-in Delhi a suoksan na le inzawmin HCFD Executive Meeting chun Chairman thar dingin pa fel le mawngzang vetvot Pu. Immanuel Khawbung a lo ruot thar tah. Chu le inzawm chun liem tah Pathienni zantieng khan Chairman thar lawmlutna le a hlui inthlana chu, meeting nei nghal malam bawk leh Pu. Timothy Shakum a ina thalai committee memberhai inhmukhawmna nei a nih. Chairman thar Pu. Immanuel Khawbung chun ‘Thalaipawl hi kei ka khata ka thuoi ding annaw a, ei renga thangtlang ding le inrawntuo pei ding ani’ thu khawm hrilna a nei bawk. Hi huna hin committee memberhai le hlim tlang taka hun hmang a ni el khela Pu. Timothy Shakum-in ruoi inhnik taka a lo buotsai nghal bawk thu ei thu dawng na chun a hril.

## Dept. of Music & Youth Affairs HCFD Video Album tlangzar ding thul a la nih: Remchang nawna le inzoinzap nawna then then leiin voisuna tlangzar dinga beisei Dept. of Music & Youth Affairs HCFD Video Album Volume-II chu tlangzar thei a la ni hri nawh. Chanchin ei lo hriet dan chun November, ni 18 2012 khin tlangzar hman ring a um tah thu ei lo dawng. Nghakhla taka lo thlirtu le ngainatu hai po po khan beisei takin lo la hei nghak nawk phot ei tih.

## Hlapawl inchuk mup mup a nih: Tangkhul/Naga hai huoihawt Choral Competition northeast mihai ta dinga anbuotsei chu, ei thalaipawl hai khawm thang ngei tumin kar liem tah a inthawk khan hla an lo inchuk tan mup mup tah. Hi ang inelna hi a umphutna a ni ring a uma, lawmman khawm 1^st Price-3 lakhs 2nd Price-2 lakhs 3^rd Price 1 lakh ning a tih. Thalaipawlhai hlawtlingna chang ngei ding ei ditsak takzet.

## Hla Ruoipui nei ding:Hmar Christian Musical Society (HCMS) huoihotna hnuoiahm hung tlung ding November 6th- 7th 2012 inkar sung hin Rev Chawnga Memorial Chapel, Sielmat. CCpur Manipurah Hla Ruoipui tia hming inbuk nghatin kohran hrang hranga nu le pa, thalai le naupang renga Pathien inpak tlangna hun hmang dingin churachandpur phairuom hai chu anin sing sa mup mup a ni thu chanchin ei lo dawng. Program chu zana cho hmang hlak ning a ta, hi Hla Ruoipui huna hin Pi. Dr. Lalrimawi Pudaite (President Bible for the World) le Pu. Dr. Chaltawnlien Amo (Chairman, HAV Govt. of Manipur hai chu Chief Guest ning an tih. Short Message Rev. Rohminglien (Secretary HCDF) le Rev. H P Runremthang (Evangelist-atlarge, ICI) hai ni bawk an tih.