Hmar Peoples’ Convention (Democratic) PRESS RELEASE

Hmar Peoples’ Convention (Democratic)

PRESS RELEASE (Mizo Text)

HPC (D) leh Mizoram Sorkar inbe tura an insingsat laia Mizoram Sorkarin inbiak huna dan zawm tura duan lawk tawh sa chu chiang taka bawhchhia a, thil thar leh hrilh fiahna thar zimte chhuanlama hmanga mutan siam an tum ni awma lang hi Hmar Peoples Convention (Democratic) chuan a ngaimawhin pawi a ti hle a ni. Khami hmaa inbiak dan tur kalhmang lo ruahman lawk tawh leh remtih tlan tawh ang ni loa Mizoram sorkarin mahnih duh dan hnawn luih tuma tran
a khawh ni awma lang hi inremna kawng tihchhiat tumna leh mipui rorelna dan hmanga inremna kawng siala awm mek hi a kuhmum laia thruai chhum tumna angah HPC (D) chuan a ngai.

       HPC (D) chuan Suspension of Operation (SoO), Inkah chawlh puan tawh chu a ngial a ngana zah a, zawm a, kengkawh turin Mizoram Sorkar a hrilh fo thrin a.  Mahse, tun hnaia ngiat lawk mutan an auh chhuahpui vak hian inbiakna boruak leh inrin zawh tawnna rilru a tichhia a, Mizoram sorkar hi rintlak lo-ah a chantir a, inbiak duh anga a inlantir pawh hi dawtah a chantir bawk a ni. Hmar mipuiten an thil ngen an hmuh lohna tura vuak darh tumna rilru tenawm tak hi HPC (D) chuan a dem takzet a ni.

       Mizoram sorkarin threndarh tuma min phiarna hi eng lai pawhin HPC (D) chuan a pawm ngai lo ang. HPC (D) chuan India Danpui hnuaia mipui rorelna kawnglam zawha inbiakna dawhkan zahawm hmanga an thil dil hmuh hi nghet takin a tum reng tih a sawi nawn a.  Hnawhchepa awm Hmar mipuiten an thil ngiat an hmuh theihna turin, inrin tawnna leh inzah tawnna thinlung pu a, Mizoram sorkar leh HPC (D) te chu thawk tlang tur an nihzia thuah HPC (D) hi a chiang a, chu chu a ram pum tan leh abikin Hmar mipuite tan pawh thil thra a ni tih a pawm nghet tlat a ni.

       HPC (D) thil tum leh ngen chu ram thren darh ni loin, India Constitution-in a duh dan anga hnam tlem zawkte dawm thiam a, an dinhmun tur vohsak hi a ram pum tana inzawmna ngelnghet zawk siamtu a nihna chu a taka hlenpui tura bawhzui hi a ni.  Inbiakna tluang taka a kal theih nan, HPD (D) chuan inkah chawlh puan hmasak phawt chu thil tih ngei tura a ngaih bakah, chumi inkah hai chhung chuan inbiakna a hlawhtlin theih nana pawimawh, inrin tawnna boruak siam trulin a ngai bawk a. Chutiang tak chuan chumi hun chu HPC (D) chuan inbuatsaihna hunah a hmang reng a ni. Inkah chawlh huna puan chu a lo ral dawn tak avangin, HPC (D) chuan a hun tisei tur leh inbiakna tura an remchan hun rawn hrilh turin Mizoram Sorkar a hrilh a, chumi chhanna chu Mizoram Sorkar atrangin a la nghak reng a ni.  Suspension of Operation-a thu chuang emaw chumi piah lam thil emaw sawi fiah ngai apiang chu inbiakna a awm huna sawi tlan turah HPC (D) chuan a ngai a. Chutiang ni loa vantlang emaw chanchinbu mite emaw kianga mahni puala inbiakna chungchang thu sawi chu HPC (D) chuan hun a ti lo a, puitlin loh thlakah a ngai.

       Hemi nena inzawma chanchinbu leh Television atranga HPC (D) thil hriat, mak a tih em em chu Mizoram Chief Minister Pu Lalthanhawla leh Mizoram Home Secretary Pu Lalmalsawma ten tlang hriata rinthu an puan, HPC (D) le Mizoram Sorkar inbiakna turah hian HPD (D) ten puitu atan American mi rawih an tum tih thu a ni.  Hemi inbiakna tura HPC (D) palai turte hi vawi khat mah an hming puan a la ni ngai lo. HPC (D) chuan thil kalhmang leh danpuiin a phal chin a hre chiang a, Mizoram sorkar nena inbiakna turah hian aiawh atan ram dang mi sawm a tum ngai lo. Hetiang thu veivir hi ramhuai rilru pu mite thu phiar atranga lo chhuak a nih theih avangin Mizoram Sorkar chuan chaw tak khuka khukpui lohin menah thlak daih rawh se. Hetiang thu lumlam hian thudik them te pawh a fûn lo.

       Inbe tura insingsa pawl hnihte tum ber chu hun lo la kal zel tura Mizoram himna tur thlir renga mumal taka thil rel a ni tur a ni. Hmar mipuite tana HPC (D) thil ngen hi Mizoram Sorkar chuan a duh thua pek mai theihna thuneihna a nei. He thil hi kum 1994-a Mizoram Sorkar leh HPC ten Remna Thuthlung an ziakah a inphum diam tawh a ni. HPC (D) te thil dil pek hi Mizoram sorkarin an laka thaba sut tur kum tam a bat tawh chu a ni. Chu chu hlen chhuah tum lo a, Hmar mipuite inkarah kut rawlh a, an thil dil hmu thei lo tura dai darh tum lehna a awm chuan, chu chu HPC (D) chuan a dem a, a do tlat zel dawn.   Inbiakna awm turah hian Mizoram Sorkarin dikna leh rinawmna kengkawh se tih HPC (D) chuan a duh a ni.

John F. Hmar

Secretary

Information and Publicity

Hmar People’s Convention (Democratic)