Area Visit (Thurawn)

Tulai ei thuoituhai in thahnemngai tak in area visit an hung nei mek zing a. Vengbuk pathum chu an kan tah a. Delhi Thurawn issue hmasak a ei hung thailang zau ang khan, thu pawimaw tak tak hriltlangna in hun an hmang pei niin ei hriet a lawm a um takzet. Mipui tieng khawm thuawi takin thiltha lem a ra suok beiseiin thang ei lo lak mek pei a lawm a um zuol hle anih. Hieng thu chei a um tam takhai lai a tlawm a zawng zuk thailang zawk ei tih
.

HSA I-card & DHWA Membership Fee: “Kum dang DHPL a HSA I-card neilohai chu inkhel thei lo ding ei ti hlak ang khan, HSA/ DHWA election hunah khawm HSA I-card neilo/DHWA Membership Fee pelohai chu vote in nei tir ta naw inla a tha naw manih” ti thurawn a um a. Ngaituo tham tak anih. Eini’n ngun taka ei lo ngaituo ngai naw hman pawi ta nakah Delhi a hin Hmar nau tu tu’m an um ti takngiel khawm hre phak lo ei mikhuol hung thuoihai chen dam a fiemthu thawna ang el a an nuom nuom an lo hung vote ve pawp pawp el kha chu a fuk naw reng a. Chuleichun, zawm chi tak ni’n anlang.

Section a inthe : “Ei chengna khawpui a lien a, kar a hla tawl deu lei hin in organise a harsa; areawise in section siem inla, thuoitu/ representative bik khawm ei nei thei seng lem naw ding maw?” Hi thu hi kha hma met khawm khan ngaituo thuok ani a. Tu chen a chu ei la hmang chie nawh. Ngaisak a phu hlie hlie. Election a reng reng khawm area/section tinin anni sung a thuoitu tlak a an ngai po hung thlangsuok an ta, chu chu mipui hriet a lo suklang lawkin election ni ah chuhai lai a tha ei ti ti ei vote el ding anih. A suk awlsam lem el bakah mass participation a um lem ngei ding anih. Chun, area tin awptu bik ding Val-upa/Nghak-upa khawm siem pek thei inla chu kawng tam tak a ei hlawkpui ngei ring a um. Ngaidan tha tak tak iemani zat ei la tarlang lo khawm a la um a, ei la hung tarlang pei tum anih. Hieng tarlang a umhai hi lo ngaituo seng ei ta, tha lem a ei ngaihai chu thurawn in pe tawn peiin ei khawtlang ta ding a thil fel lem le tha lem a hung ra suok ngei ei beisei. Thang tlang ei ta; ram siemthat zai rel ei tiu