Area Visit

Kum dang a lo thaw ta hlak ang in Vengbuk Kanna(Area Visit) chu tukum khawm nei nawk dingin thuoituhai chun an lo rel nawk a. Chu dungzui chun zani, April 2, 2011 a inthawk khan tan a lo ni nawk ta a. HSA le DHWA inkawp a hi program hi siem ani ang hrimin ei thuoitu mi pangahai chun DU North Campus tieng a ei memberhai an lo va kan nawk der an tah. Ei thuoituhai in thei ang
ang a hma an hung lak peina hi  inpak a um hle.

            Thil dang dang bakah hieng ang a vengbuk kanna ei nei hlak nasanhai lai a pawimaw deu hai chu; a vantlang a ei insuikhawmna HSA le DHWA hai hin iengtin am hi neka hrat lemin hma la peihai sien ei nuom a? Tuchen a an mi thuoi danah ei lung a awi tawk am? Ieng am bansan in ieng am thaw tan inla ei nuom a, tihai hriltlang theina hun siem hi anih. Ei thuoituhai tlinnawnahai mi dang bula hrilsiet el lo a hieng ang hun a ei hril tlang hin ra tha ansuo lem chawk hlak leiin mitinin ei thlawp seng nuom a um takzet. Chuchu member ei ni vena zar a ei mawphurna khawm ani hrim anih. “With rights comes duties” ti hi khawtlang thil a khawm hnawl thei ani bik chuong naw ti hretu vawng ei ni ring a um. Hamthatna ei chang ding chun mawphurna khawm ei nei ngei hlak si a.

            Chuleiin, hun, tha le zung tam tak seng a hieng ang program induonga a um ta si si hin chu tukum a ei area visit khawm tangkai takin hmang seng inla nuom a um. Abikin, kan hmabak a la um areahai lem kha chu hril lang ding awm a ei hriethai dam lo ngaituo lawkin lo ziek dap inla, thuoituhai hung hun a lo hrilpui thei inla chu a felfai in hun khawm a khawral naw lem ngei ring a um. Chuong ang khawm ei lo ngaituo pei naw a, hieng ang programhai hi ei ngai pawimaw pei naw ani si chun, thuoituhai hrilsie a sawisel tlak ei ni bik naw ding ani ti hi mipui khawm a ei vawng tlat nuom a um.