Ziektu: L.B.Tuolte
Kum 2013a Delhiah pawl binga biekna inkhawm hotuhaiin an ṭan hi chu pang a ṭim deu ngei. Hotuhai thaw khawm ni sien ‘uipui tui lien thlir anga thlir’ el naw thaw ngaina a um si nawh.
‘Independent kohran mi reng ka nih’ ti khawm inphalam a um hiel. Delhia khawtlang le kohranin ei tuok le inzawmin zawlnei indik le tehlem sinthaw ngun takin thuthlunghluia inthawk ka suizui a. A tehlem le zawlnei indik hriet ṭhe a harsa khawpel ie.
Tienla Zawlnei tehlemhaiin, ‘Lalpa Pathienin chuong ang, khang ang chun a tih’ tia mipui kuomah thu an hril ve hlak a. Zawlnei tehlem thu hril an awi leiin mipui chungah Pathien lung a sen rawp hlak. Zawnei tehlemhai hin Pathiena inthawk ni awm takin an hril hlak leiin mipuiin an awi hlak a nih. Zawlnei tehlem Hanania chun mipui hmaah hieng hin a hril a: (Jeremi 28:11) ‘Hieng hin Lalpa chun a tih. Hieng ang bawkin Babulon Lal Nebukanezzar ringkawl chu kum hni sung ngeiin hnamhai po po ringa inthawkin sukthliek ka tih’ a tih.
Hi thu hi thu khel, ama phuokfawm, annawleh thlarau suolin an hril tir a nil thei. Pathien a inthawk ruok chu a ni naw tawp. Hniek phawi der loa a hril chu a ni bawk sih a. Chuleiin, a thu hril hi a ring tawk an um reng a nih. Hi hun vek hin Zawlnei Jeremiah chun kum 70 Babulon sala Israelhai an intang ding thu a hril ve hlak. Hanania hi Zawlnei ve tho a nih. Mipui ta ding khawmin zawlnei indik le tehlem hriet dik a’n tak reng a nih.
(1Lalhai:13) Jeremiah le Hanania thuah chauin a tawp nawh. Pathienin mi pakhat, Pathien ngaisak ei ti dim Pathien mi vek a tir a. Tempul le maicham hal ding le ṭawngsie inphur dingin a tir a. Iengkhawm fa lo ding le dawn lo dinga hril a nih. A thaw ding le hril ding a zo chara kir nghal dinga hril a ni bawk. Hi hun vek hin Zawlnei putar pakhat a um ve a. A nauhaiin zawlnei putar hi thil um dan an hril a. Ama hin Pathien mi fena hmun tieng an dawn zoin a hnawtzui nghal tah a. Pathiena inthawk thuthar dawng ni awmin a’n hril a. Pathien mi chu fa le dawn dingin a ko kir tah a. Fa le dawna an ṭhung lain zawlnei putar hi Pathien thlarauin a man ve nawk thung a. Pathien mi chu halin ṭawngsie an phur tah a. Pathien mi hi sakeibakneiin a se hlum.
A chunga thiltlung (incident) a inthawk Pathien thlarau tir le ramhuoi thlarau tir hi hriet kar a harsa reng a nih. Pathien mi hi zawlnei putarin a hlem hi mak ve tak chu a nih. Zawlnei putar hi Pathien zawlnei ni kher naw nih. Pathienin a hmang ve tho a nih. Thuthlung hluiah hieng ang thil a lo um hlak. Chuleiin zawlnei tehlem le andik hriet chieng an tak reng a ni awm.
2013 kuma Delhia pawl rama ei thil tuok hi Pathiena inthawk am ramhuoi ti hriet dingin nghak a ngai. Kuttum le hriemhrei hmangin iengkhawm chingfel naw nih. ‘Uipui tui lien thlir’anga thir phawt hi a him tak awm ie.
Tienlai zawlneihai khawm Pathien hmang am thlarau suolin a hmang ti hriet nghal antak reng a nih.
Pa, Naupa le Thlaru Thienghlim hminga kohran mipui le khawtlang inthuruolna suksiettu hi Pathien Thlarau tir am annawleh Ramhuoi thlarauin a tir? Thuthlung hluia thiltlung (incident) besana thlir chun Pathien Thlarau tir ti chu ringhlel um a nih.
Tienlai zawlnei tehlemhai hi Pathien tir ni loin duthusam hrilin mipui an hlem hlak. Thudik hriet dingin hun a ngai.
Zawlnei ei ti hai hi Pathien tir an um lai zingin thlarau suolin a tir an um ve tho a nih. Chuleiin, Pastawr awrdenin Pa, Naupa le Thlarau Thienghlim hming sala kut an nghat nazawng hi Pathien thlarauin a tir ring ding a ni nawh. Zawlnei tehlemhai khawmin hniek phawi der loin ‘Lalpa Pathien hming salin’ an hril lawk hlak. An dik le dik naw ruok chu hunin a rel. Thawk-le-khatin Pathienin phuba a lak ngai naw leiin zawlnei indik le khel hrietkar a harsa reng a nih.
Zawlnei tehlem sinthaw chu mani phuokfawm, thu indik loa mipui hlem a nih. ICI, EFCI kohran an ti hi ṭawng indik lo a nih. Register Society Act 1860 dungzuia India sawrkar hrietpui pawl (organization) an nih.
‘Kohran’ hi sawrkarin a hrietpui nawh. ‘ICI, EFCI le EAC’ a dang dang Sawkar hrietpui pawlpui hming (organization) an nih. Hmar Christian Fellowship le ICI, EFCI ti hming hi ei ram kohran hotuhai buoina a nih. Hmar Christian Fellowship hi ‘kohran in ni nawh’ an ti hi thudik a nih. ICI le EFCI khawm kohran an ni bawk nawh. HCFD khawm kohran a ni nawh. Pawlpui kona hming an nih. Ei ram kohran hotuhai pawlpui le kohran hmingah an buoi a nih. Chuleiin, kohran hming an hril pha ICI annawleh EFCI an inkawktir ta mei mei hlak.
Delhia hin ram le hnam ta dingin zan 60 neka tam khawvarin ei ṭawngṭai tah. Ei mipuihai le kohran pawl hran hran pumkhata ei luong tlang theina ding hi thupui pawimaw a ni zie. Kum 4/5 vel ram le hnam ta dinga ṭawngṭai ei thlada/chawlsan karin pawl ram hung lut an ni leiin Pathiena inthawk ti hi chu ringhlel um ani hrim hrim.
Tawngṭai thlarau ei nei lai ni sien, ieng pawl thlarau khawmin Delhi Hmar Christian Fellowship ner ngam naw nih. Ei ‘inlusu karin Setanin ram a lak pei’ tia hla ei sak pu hi thudik khawm a hawi ie.
Delhia students (nunghak le tlangvalhai) le sawrkar thawktuhai Pathien rama ṭhuoilut ei nuom leiin Hmar Christien Fellowship ei indin a nih. Pathien ram chu:
(i) Suol laka thiem chang.
(ii) Inremna (Pathien le inrem) le
(iii) Thlamuongna an nih
Kohran Pawl bawmah tukhawm denglut ei tum nawh. Pawl ram chu:
(i) Indemna.
(ii) Intheidana.
(iii) Tuolbawm le inrem thei der lo ram a nih.
Hmar Christian Fellowship Delhi hi nunghak hmelṭha, ngaino bei em em ang a nih. Ei ram kohran pawlhai inhnar ani hrim a. An lak thei naw khawmin suksiet an pawisa naw chu hriet thei a nih.
Pu Rokung dam lai khan Delhia RPC pastawr sie an nuom thu an hril tah. EFCI in remchang an hmu naw leia an zie an suklang naw chau a nih. Lo hmu ni hai sien Delhi kohran le khawtlang vuodar dai tang an tih. 2013 in remchang an hmu leiin ICI zie an suklang a nih. ICI hi an suol bik khawm a ni nawh. Thuhmun char an nih. Tu pawl khawm ni sien, ei ram kohran hotuhai khi pawl ram inrui leiin mani hnama inthawk tuithlar (cut off) an ngam vawng. Vawisuna ei mit ngeia ei thil hmu chu a nih. Maka a ni ringawt. Kohran pawl leia mani hnama inthawk tuithlar chu Pathien thu puo dai a ni tah. Setanin Hmar kohran hotuhai hi pawl hmangin a dawivet zo ni lo maw ??? Kohran hotuhai hrilin var pha naw ni hai.
Zirtirtu chun a sikul naupang sin insang a chel pha a lawmpui hlak ni lo maw? Hlawtlingna ei sikul naupangin a chang pha ei lawm ve ni lo maw ? Hmar Christian Fellowhip, Delhi le Fellowship dang dang, ei ram kohranhai rasuok an nih. Iengleia Hmar kohan hothuhaiin an lawmpui naw am ning a ta? Lawmpui nekin suksiet/vuokdar an nuom lem hi ienglei am ning a ta ?
Vairamah sawrkar Officer haiin Pathien biekna hmun le hun remchang an mi siempui hi hung tho nawk hai sien Rev. Thangngur, Pastor Taisen le H.K Dohnun, an lawmna mittui hul ngai naw nih. Iengleia vawisuna Hmar kohran hotuhaiin Hmar Fellwoship an lawmpui thei naw am ning a ta ? Zawlnei tehlemhaiin thu dik an lawm hlak am a ni ? ?????
Pathienin Delhia le Gauhatia Hmar Christian Fellowship kum tam a lo hmang tah. Retheihai sawmdawltu ding khawmin a lo hmang tah. ICI hotuhaiin iengleia sukdar an inphlam naw am ti vawisun chena a san ka hmusuok lo a nih.
Annawleh, Pathienin a lo hmang ve zing zing vuokdar dingin Setanin a chawktho tawl am a ni ? ICI hin Pathien an cho (challenge) a ni lem naw maw ???
Kohran mipui le khawtlang keikhawmin kum 20 neka tam inrem le lungruolin Hmar Christian Fellowship Delhi chun Pathien rama rawng an lo bawl tah. Lokalin kum 24 lai lo inenkawlin ser-le-sang, rawngbawlna dam, misawn neiin hma an lo dawm tah. Ei ram kohran dan kengkawin hnawtsuok ṭul an hnawsuok a; laklut ṭul kohran sunga dingin an laklut bawk. Sakramen le baptisma le naupang inhlan khawm ei ram kohran pawlhai ang bawkin ei thaw ve a. Dan le dun ei zui kim dap. Ei rama Evagelical pawlhai leh danglamna ei nei nawh.
Kohran le khawtlang inthuruol em em le lungruol taka umkhawm vuodar dingin Isu hin a Tharau a hung tir ding maw ? Isu thlarau a ni naw chun khawlai thlarau a inthawk am intibing nuomna lungril a suok ning a ta ? ???
Kum zabi vawikhat hmang ve thei bawk, puitling thawkhat, ei ram kohran pawlhaiin zani lai chaua indin Fellowship an theida em em le an tai hi a mak ang reng. Ei ram kohran hotuhai sum senga ei indin khawm ni lo, an thurawn leia ei indin ni bawk lo, Fellowship chungchangah kohran hotuhaiin iengkhawm hril ding an nei nawh. Chu nekin Fellowship suksieta mani pawl indin an la tum ta deu deu. Nuvuoi……!
(New Delhi, 13th December, 2013.)
