KHAWH NA E, KHAWH NA LAWM LAWM E MAW!

(A pawi ngei, , Ava pawi ngei de maw!)

-Darsiemlien Ruolngul

          Kan naupang lai khan kan khuo, Muolvaiphei ah Simte sungkuo iemanizat an um ve hlak a. Anni  khan an insungah Simte tawng hmang hlak hai  sien khawm  khawlaia ruol an pawlna ah Hmar/Lusei tawng an hmang tlangpui lei khan Muolvaiphei khuo-a um, a tam lem khan Simte tawng kha kan thiem naw phah a, a pawi khawp el.

Amiruokchu Biekin neiin, Simte tawnga  inkhawmna an nei hlak a. Chuonglaia an hlasak ka la hrietzing pakhat chu Hmar hla, Simte tawnga an inlet, ‘Khawh na e, Khawh na lawm lawm e maw!’ (A pawi ngei,  Ava pawi ngei de maw!) ti hla  kha a nih. Ka la hriet zing a, ka theinghil  thei ngai nawh. Hun dam a lo sawt ta leiin ka hriet dan hi ka ringhla deu a, Pi Kimi Thlawngate ka van dawn a, ama hriet dan le ka hriet dan chu a lo la’n zul tho leiin hieng ang hin ka hang hmang a, andik lem hrie ei um chun in hril ei ta.

Awle ei thupuiah hang lut tah in la.

          December 22^nd, 2012 khan Conference Hall, National Institute of Social Defence, R.K.Puram, New Delhi ah Delhi-a Hmar organization pathum, Hmar Student Association (Jt. Hqtrs Delhi), Hmar Christian Fellowship, Delhi le Delhi Hmar Welfare Association haiin joint meeting nei a nih a. Hi inkhawmna hi a pawimaw ang bawkin inkhawmna hmun khawm hi a changkang hle. Pu Herbert Lalsanglur, Director, Ministry of Social Justice & Empowerment, Govt. of India in hieng ang conference hall a mi buotsai pek hi keima mimal khawma lawm a um ka ti takzet a, hi meeting organizer hai khawm an lawm ve tho ka ring.

          Hi Joint meetinga ngaituo ding  thupui tak ni a inlang chu  Independent Church of India ‘63^rd General Assembly Resolution No. 5 na- Delhi ah ICI member haiin Bethesda Social Service Centre ah inkhawmna lo nei ve ta hai sien’ ti a an lo rel hi ei dit naw thu le hi thurel hi sût dinga nawr chung chang a nih.  Hi thu chai ding  hi hophur a um lei am ani ding,  a kotu organization khawm hriet hlei theiin a um nawh a. A kar leh DHWA in programme an insuo a, a kar leh HSA in programme an hung insuo nawk bawk. A ieng ieng khom ni sien, inkhawmna chu phuisui tak a nei a nih a. Pastor Lalditsak Inbuon conductor niin, Pastor Lalsiesangin a thlawp a. Pu C.Thant Khobung, Chairman, DHWA in Key Note Address a pek  lei khan DHWA huoihawt chu ni deu anga ngai thei a nih.

          Hi inkhawm hi ei thaw dan pangngaia a hun taka ei thaw thei naw leiin ngaidan hril le ei ngaidanhai hang sawichipna hun a tlawm hle a. Mi tam rak lovin khawplo taka ngaidan an hril zovin, 97% vote hmuh in thutlukna siem a nih a, chu thutlukna chu hi ICI 63^rd Assembly resolution hi ei dit naw thu ‘Declaration-cum-Resolution’ siem a nih. Hi thutlukna ei siem le ei tlangzar nghal  hi a nih ‘Khawh na e Khawh na lawm lawm e maw’ (A pawi ngei,  Ava pawi ngei de maw!) ti a ka hung khek suok pui chu!

          Hi ‘Declaration-cum-Resolution’ ei siem,  electronic le media dang dangah ei hang  puongzar nghal hin ieng ang   kakhawk (reaction) am  nei thei  a ta, ei thaw dan hi a’ndik chie am,  ti hai hi  ngun taka ngaituo chieng  a tul a nih.

          May thla, 2007 khan Delhi Hmar Welfare Association huoihawtna in MTNL Hall , R.K.Puram ah Delhia Hmarhai a tam thei ang taka inkhawmna neiin, Delhi-a Kohran mal hminga pawl indin le Delhia Hmarhai mi thedar ei dit naw thu ‘Declaration’ ei lo siem tah a, a tha bek bek. Kha lai hun a khan tu kohran, tu pawl khawma chuong anga kohran binga pawl indin amanih, Delhi a Hmarhai mi thedar tuma hma lak tumna  ri iengkhawm ei la hriet  nawh. Chuleiin khanga ‘Declaration’ puithu taka ei siem khan tu pawl khawm a dodal nawh a, tu kohran khawm a kal naw bawk leiin  a huntakah  ei thaw ding ei thaw a nih.

          Tuta tuma ei inkhawmna a ‘Declaration’ ei siem ruok hi chu  Kohran pakhat bik  thurel ei dit naw thu ei ‘Declare’ a hung ni ta leiin chu kohran thurel chu ei dit naw el khel ah ei dodal (confront)tina a nih. Confront ei ti hi Hmar tawng a‘Dodal’ ei ti hin a hrilfie zo chie nawh. An leh Delhia Hmar hai hi ei ram kohran lien ve tak tak hai hi ‘confront’ thei dingin ei in ngai am? Kohran ka hang ti hin ICI/EFCI le kohran pawl dang dang hai ka ti na a nih. Hmar Chjristian Fellowship Delhi hi member 1000 vel ei nih ei tih a,    (inkhawm chie chu 300 tling naw tieng).  Ei member po po hi 1000 khawm lo tling ta hrim inla  kohran puitling, member sing tel nei hai thu rel sa lo rel khum thei ding ei ni am? (Ei declaration-cum- resolution en rawh) Hienga Declaration thaw a, ro ei rel khum tahnunga ngenna hang siem nawk dinga ei rel khawm hi thil inmil rak a hawi ta naw in ka hriet. Amiruokchu kha inkhawm ni a rorel le thutlukna chu ka thu tlukna a ni ve tlat si.

Hieng ang hin thu lo suk tlu tah inla khawm tuta ei thaw ding ni a ka hriet chu confrontation lampui hi hraw lovin, 2007 a declaration ei lo siem ta hai thangsan in, ei kohran nu-le-pa hai kuomah thuhnuoirawl takin, ei harsatna le Delhia kohran inthe thei ei la ni naw ziehai, ei biekin hmun inchawkna dinga sum tamtak bat ei la nei hai dam hi ei inthe chun ei muolpho pui ding zie le, eini  muolpho chu anni nu-le-pahai khawm an muolpho na a ni ve thu hai  hrilin hang ngen ngawi ngawi lem inla, a tula ei hriet lem chun ICI hotuhai inbiekpui dingin delegation hiel khawm intir rin nawng ei tiuva, chuonga ei thaw phawt chun anni khawma an  lo hriet thiem ngei khawm kei chun ka ring tlat a.

Ei Baibula ei hmu angin ‘Dawnna innem chun lungsen a thawi dam a, Invin ruok chun lungsen a suk tho (Thuvar 15:1) ti a nih. Chuleiin, Delhia Hmar mipui hai hin inpumkhatna le inthuruolna ei dit tak tak a ni chun inpha hnuoi hi pawisa nawng ei tiu. Pawl buoina leia sungkhat laina, ruoltha le thenum khawveng in the na le innghirnghona tam tak ei lo hmu ta hlak a, a that naw zie khawm ei hriet seng. Chuleiin tukhawma tlawma la lovin, inremna a um theina ding  ni chun a tlawm lem ni inchu ngam ei tiu. Hi hi ei ngaitha chun ei nuom neka sei fe theina ngirhmuna ngir ei nih, ‘A spark neglected burn the house’ ti a ni kha.

Chun, Hmar Christian Fellowship khawm hi nguntaka in bi chieng a tul ta hle in ka hriet. Pu L.Keivomin ‘structural change’ ei tul a nih a ti hai hi ngaipawimaw chi ning a tih.  Fellowship ei nih ei ti lai zing hin fellowship characteristic ei nei chie am tihai khawm ngaituo a tul. Delhi a ei unau fellowship dang dang a hai chu ieng kohran Pastor khawm Delhiah hung sienla, a lusa le a thuoitu hiel ah an thang thei a. Eini fellowship a ruok hin chu kohran thuoitu le  kohran Pastor hai hi an thla a ngam chie naw niin ka hmu hlak. Hi hi thil pawi tak a nih. Ei kohran nu le pahai le inlaichinna thatak ei nei zing hi  a pawimaw zie hrieng ei tiu. Tu khawm hin ei Pastor hai le Upa hai khawm ei kohran nu le pahaiin an mi ordain pek leia Pastor/Upa nei thei chauh ei nih. Chu el khelah Hmar Christian Fellowship Delhia member a tam lem hi parent Church nei seng ei ni si a. Tuta Hmar Christian Fellowship Delhi ei fe dan chie lem hi chu  ei veng tienga ‘local kohran’ an tihai khi ei hawi ta hle a, hienga ei fe pei chun tuhin ei ram kohran haiin iemani chen mi hang hrethiem hai sien khawm an hung inrawl naw thei naw hun a la um ngei ngei ding a nih ti hriet a tha.

Inpumkhatna hai, inthuruolna hai hi mitinin ei dit seng a, amiruokchu a nei thei dingin thang ieng ang in am ei lo lak ta hlak a,  iengtinam ei lak pei ding ana ti khawm ngaituo a tul takzet el.

New Delhi, the 28^th Dec.,2012