Lawrkhawm 2nd Dec. 2012

@@ HSA FC chun hratna a chang zo ta nawh: Tarik ni 17^th Nov. 2012 a tan tah Tamchon Football tournament, Tangkhul Naga Society hai huoihawt chun zani tarik ni 1 Dec, 2012 khan ropui tak hmang zo a lo ni tah.

Hi tournament sunga hin HSA FC chu a che tha thawkhat hlea, hiengang hi a lo nih,  a khelpui leaque match-ah SSPP 2-3, ASUD FC 2-3, TSFD FC 0-0, a hnein an group-ah hrattak niin quarter final ankaia, quarter final-ah Demazong Boys  (Sikkim) 3-1 a hne nawk a nia, Semi final-ah KSL (Meitei) chu 8-6 (penalty)in a hne bawk. Final chen tlung phakin Zaliangrong FC chu 2-0 in a lo hne ta nawh.

@@ Sikpuiruoi 2012 hmang ding: Hungtlung ding tarik ni 8 December, 2012 (Inrinni) hin DHWA huoihawtna hnuoi-ah Delhi Hmar Sikpuiruoi-2012 chu hmang ning a tih. Tukum a Sikpuiruoi chu kum dang naw ang deu in Hall/Auditoriuma hmang ta loin tuol thawvengah ‘KVS Lawn Sector 2 R K Puram (Behind St Thomas Church)’ mani’n hall dit dan ang taka siema hmang dinga riruong a ni thu organizing committee hai a inthawkin thu ei lo dawng. Hi le inzawm hin Organizing committee hai chun theitawpa hma lain hla hai dam lo inchuk mup mup a ni ta bawk.

@@ Sin hung zawm thar: Tv. Joyful Zawlthanglien Khawzawl S/o Lalkhawmawi, Sielmat chu Union Public Service Commission (UPSC), Delhi-ah Assistant sin zawm thar dingin a lo hung vuong lut ve tah. Ama hi nikuma Staff Selection Commission (SSC) in a huoihawt Combined Graduate Level Examination a lo inziek tling ta kha a nih. Ama hi Shillong-ah Tax Assistant sinthawa lo khawsa hlak kha a nia, kohran le khawtlanga hai khawm mi tangkai tak el a ni thu ei thu dawngna chun a hril. Delhi khawtlanga khawm ban poimaw tak a la hung ni ngei ei beisei. Tarik ni 26 November, 2012 khan hi a sinthar hi a lo zawm tah a nih. Ei lawmpui takzet.

@@ Advent Christmas Boruok: Kar liem tah sung khan HCFD thuoitu hai hmalakna hnuoiah vengbuk hrang hrang haiah Christmas urlawkna neiin Bible study nei a nih. Chu el khela Delhi sung vengbuk tinhai chun Advent Christmas hmang tumin anin pucha tawl mêk tah. Hienglai zinghin Safdarjung Enclave hai chun tarik ni 24 November, 2012 khan Pastor. Lalsiesang thuhriltu a hmangin, lengkhawmna leh ropui takin an lo hmang zo der ta bawk. Mahipalpur area hai khawmin hun remchang hmasa tieng taka hmang tumin an insingsa mêk ta niin changchin ei lo dawng.

@@ Scholarship Form pêklut hun suksei:Tukum Manipur ST  Post Matric  Scholarship 2012-2013 apply dinghai chun mani’n Bank Account nei ngei a ngai tah ti a ni angin, bank account la hawng el thei lo student mi tamtak anla uma hriet a ni leiin pêklut hun ding 30 November, 2012 chen ding ti kha,  29 December ,  2012  chen dinga suksei a la ni thu Director,  Tribal  Affairs  & Hills, Govt. of Manipur-in inhriettirna a siem. (source:Hmasawnna thar)

@@ HCFD Thalai pawl Music Video Album Vol-II inpak a hlaw hle: Tarik 25 November, 2012 a Upa. Dr. Lalsiemlien-in mitin en thei dinga a lo tlângzar tah HCFD Thalai pawl Music Video Album Vol-II ‘Kan nghatna lungpui’ chu Hmar mi le sa chengna hmum hrang hranghaiah thawn dar a ni ta a, ngaithlatuhai tamtaka inthawkin inpak a hlaw le zawr khawm a hlaw hle thu ei thu dawngna chun a hril. A copy dithai chun Rs.150/- chaua inchawk thei zing a la nih.

@@ HSA FC player hai ei ramtieng kir vat antum tah: Tamchom football Tournament 2012 inkhel dinga hung ei player mi thenkhat hai chu anhma tieng taka an umna khuo tieng haia kir nawk vat ta dingin an in singsa mek. Ei player hai inpâk an umin, hnam ta dinga antlawmngaina hai hi a ropui takzeta, hmatieng peia khawm hlawtlingna insang lem chang zawm pei ding ei ditsakna ei inhlan nghal bawk a nih.

@@ Lekhabu tlangzar ding: Hungtlung ding tarik ni 8 dec, 2012 Sikpuiruoi ei hmangna ding huna hin ‘CHANTAWK -2’ Pu. V L Reng Hriler-in a ziek chu Pastor. Lalsiesang Joute-in tlangzarna nei a tih. Pu V L Renga Hriler hin ‘CHANTAWK’ ti lekhabu chu nikum 2011 Sikpuiruoi ni khan ei lo tlangzar ta kha tukum Sikpuiruoiah CHANTAWK-2 hmel ei hang hmu nawk el ding chu phur a um takzet, a tiem inhawizie chu a tiemtu hai cho naw chun anhriet nawh. Tiemtuhai hrilfak a tling takzet. Hrilsei dal ei tih, inchawka tiem ve ngei chi ning a tih.