DHPL-V : Day 1 Thlirlêtna

Tukum Delhi Hmar Premier League hi lo fam tah Pi Fimlunghnem hrietzingna dinga a naunu Nk. Elizabeth Varte’n a hung sponsor a ni a. Hratna nina changtu team hai chun lawmmanin cheng sing khat an dawng ding a nih.

Ama Nk. Elizabeth Varte hi thenkhat chun ei la hriet dal thei a. Nunghak fel le tlawmngaina kawnga entawn tlak tak, Delhi a ei Nghak-Upa suong um em em, Delhi Hmar Welfare Association thuoitu kumhlun ve pakhat a nih. Ministry of Tourism, Govt. of India hnuoia thawk, kum thum vel liem ta a inthawka Frankfurt, Germany a lo posting tah a nih. Mi rama makhat chau a zu khawsa a ni leiin facebook a khawm a active ve tho a, a hrechieng nuom hai chun ama khawm inbiekpui thei zing a nih. A thahnemngaina ropui ei ti a, a sinthawna tieng khawm tluong pei dingin ei ditsak takzet a nih.

            Leh hun iemani chena inthawka ei hril rik ta le, inchuklaihai khawma exam zo a ei nghakhla em em DHPL chu zani, July 14, khan Vasant Kunj Sports Complex a tan a lo ni der el tah. Hawngna Sersuon (Opening Ceremony) chu zantieng dar 4:30 a tan a ni a. Ei editor khawm hi sersuon vawngtu dinga ti ni sienkhawm a lo in suk pal met leiin a hun a hluo thei naw hlau el a. A aiah Tv. Lalneilien Inbuon in hnesaw mangkhengin a hung thuoi ta lem a. Hun hmasa takah Team tin aiaw in an Captain ha’n intiemkamna an nei phawt a. Hi hun hi Tv. Phlegon, Games & Sports Secy., HSA in a hung thuoi a. Chu zo chun Pu James Pusing Sanate, President, HSA Delhi thuhrilin a zuia. DHPL thil tum vawng tlata, in unauna le lainatna a zuol pei theina dinga hi league hi inkhel dingin inkhelmihai chu uor takin ancha a nih.

            Pastor Lalsiesang in hi DHPL hi Pathien ropuina dinga inhlanin tawngtaina a nei a. Chu chu zo ah Pu Lalchungsiem Thlawngate, Secretary, DHWA in mipui pungkhawm po po a ruol a khek puiin a hawng ta a nih. “DHPL dam sawt raw se” “HSA dam sawt raw se” ti a mipui khek ri chu a khawk ram ram el. A ropui takzet.

Duthusamin inbuotsaina a lo tha tawk naw chu ni ngei a ta, hmawsaruma muolpho inkhumna dinga tlan vir pui tul thil iemani zat a uma a pawi ngawt el. Ei thuoituhai khawm an buoi seng leiin ei inhrietthiem tlanga lawm a um hle. A ni hni ni chuh kha neka fel lema ei nei thei ngei ei beisei.

A hmasa lema inkhel chu Pu Jacob Shakum le Nk. Mawi Joute hai team Hmarthlipui le Nk. Esther Lalsanhim le Nk. Vari Changsan hai team Khuplal FC hai an nih. A khaw tieng tieng khawm an thang nasa a thlirtu mipui mit a tlai hle. Hmarthlipui Manager Tv. Sunga Biate’n thei tawpa a rawi hai play a siem pui lai chun sir khing tieng Khuplal Manager Tv. Joseph Lalramlien chun a rawihai alo chawk phur ve zing bawk a. A in bei tawk char char hle. Pu Lalthuoisuok khawm Khuplal FC hai tanin khuongte leh abei nasa. Hun a hei tawp meu chun mi thenkhatin hrat lem dinga an ringHmarthlipui FC hai chu 1-2 a hnebanin an um ta tlat el. Thei tawp suo ve ve siin lawm dan an ruol ta rek naw tlat.

A nuhnunga inkhel ding Pu Hrangthangvung le Pi Esther L Hmar hai team Faith United le Pu Rambuotsei Sinate le Pu Zalienhmang hai team Habakuk FC hai chu an hung tlan lutnawk them them a. An hei bei tak tak chun first half chenah Habakuk FC ha’n 3-0 in hma an thuoi ta nghal el. Second half a chun Faith United ha’n thei tawpa hung bei let nawkin si hni an hung thun kir hman a. Amiruokchu, zanthimin ahung nang el ta si. Hun tawp chen inkhel si lo hrat/tlawm kha an nuom bik si naw leiin an zuk thaw tang tang a. Sienkhawm anthim ta em leiin player hai an hung hliem inzing ut el tah a. Chu phing leh nat sap a um nawk hma’n Match Referee Tv. Damrawse Sinate chun a hung mut tawp a ngai ta a. Faith United hai chuh 2-3 in Habakuk FC lakah an lo tlawm ve nawk ta a nih.

DHPL-V : Day 2 (21^st July,2012) Fixture

1^st Match: Faith United v/s Hmarthlipui FC

2^nd Match: Khuplal FC v/s Habakuk FC