DHPL Thukhawchang

Iem A Nih A? : ‘DHPL’ lamsei chu Delhi Hmar Premier League a nih.

Inkhelna chi hrang hrang a sang tel laia Hmar nau el ni lo, khawvel hmun hrang hrang ang bawka, India Hmarsaka tlangmi hai lunglutna le hrietthiem tak chu football/soccer hi a nih a.

A tar a zur in ball pet umzie le a dan le dun hai khawm ei hriet tlangpui. Thangtharhai lai hin inkhelna chi dang dang inhnikmi an hung um pei ta a chuh football in ei khawtlang a lo chungchuongna a lo chang ta laklaw lei am a ni ding vawisun chen hin a lalthungpha chu a la hluo ta fan a nih.

Delhi Hmar nauhai lai khawm a la danglam chuong nawh. Insukhlim niphâm (Sports) ei nei nikhuo a mi keikhawmtu le ei lâknat tak chuh football hi a ni châwk. Chu chu lungrila pâi pumin ram changkâng lem hai dungthulin inchûklaihai nipui châwl sûnga insukhlimna, inhmêlhrietna le inunauna sukthatna dinga football inelna a nih.

Huoihawttu : Hmar Students’ Association, Joint Headquarters, Delhi in a huoihawt a nih.

            HSA chun inkhêl ding an tlawm le tam dân dungzuiin team an sem ruola, dân le dun pawimaw hai an siem bawk a, khêlmuol an ngaituo a, sponsor hai zawngin iengkimah hma lain DHPL hi an huoihawt hlak a nih. HSA'n tul a ti chun hmalatu ding bik Sub-committee/ Organising Board a’ndin hlak bawk.

Team Owner/Manager : HSA'n team le dân le dun a siem fel pha inhnikna nei le a nuom taphawt hai inchâwk thei dingin team hai chu a tlângzâr a; chu chu lo inchawtu le changtuhai chuh Team Owner/Manager ti an hung nih. Chun, team inchawtu hin a sika team enkawltu ding Manager a ruot thei bawk.

            Team the a um hai hi an ruol thei dân tak ngaituoa siem a ni ang hrimin a man khawm an ang seng a. Amiruokchu, team pakhat chu mi/group pakhat neka tamin an lo inchâwk nuom chun open bidding a hrât lem lemin an chang el hlak. Team Owner chu team chunga thuneitu tak a hung ni a, HSA a van rawl ta ngai nawh.

Bul Intanna : Kum 2007 khan Delhi Hmar Premier League hmasa tak (DHPL-I) chu nei a nih. DHPL hmasa taka team hai chu-Faith United, Muvanlai United FC,  Khuplal FC le Hmarthlipui FC hai an nih. Team hming hai hi DHPL zatin a thar siem pei a lo ni hlak a, tuta tum ruok chuh DHPL-I a team hming hai suk thar nawk an hung ni tah a nih.

Sêngso

DHPL-I : Vawisun ni chena DHPL lo liem ta po po a sêngso tam tak le khum (record) la ni zing chu DHPL-I kha a nih.

Kha tuma team pali hai inchawkna man chawkruol chu cheng  7,500 vel a nih. Team to taka ei la khum zing chu Faith United niin cheng 10,000 chuongin Pu Benjamin Khawbung hai sungkuo’n an inchawk a nih. Chun, DHPL-I a team tin khan cheng 3000-5000 inkar sengin jersey set thar an insiemtir seng bawk a nih.

Ei khêlmuol hmang man le inmila team man (minimum) hi HSA'n a sak hlak a nih a. DHPL-I kha JNU Playground le Central Secretariat Ground hai ah inkhêl a nih. Khêlmuol haw mana khawm ei sêng rawn hle. Sienkhawm hun hung inher danglam ang peiin ei thuoituhai khawma sêngso tlawm thei dân ding an hung dap pei a, tuhin chu Team Owner hai tading khawma tlawmte a in zo thei dân dingin ei hung nei thei ta a nih.

Team mana ei siem hi tournament entry fee ang chau a ni tah a. Hi taka inthawka ei sum hmu hi khêlmuol hawmanah ei pêk hlak a nih.

Thiltum : Inchûklaihai nipui chawl sûnga inunauna siemthatna ding beiseia DHPL hi nei a nih. Chun, ka sawl ka kham khawm ti hman lo hiela inrima sinthaw hai tading khawma insukthovengna le lungril sukzângna dinga ei huoihawt a ni bawk a nih. Hi lei hin a ni inzawm khawma inkhêl lovin, sin dang le lekha tiem khawm sukbuoi lo dingin kâr khatah vawikhat, zantieng darkar tlawmte sûng chau ei nei hlak nih.

Hmathlir : Hmun hla tak inzin ding chun pên khat peia hma sawn pei a ngai ang hin, damte te a hma la peiin ei DHPL khawm hi la hung inthang lien pei a ta, ei hnam le khawtlang tading khawma thil tangkai tak a la hung ni phâk ngêi beisei a um.

            Khawvel a um sûng chu India bo ta naw ni a, India a um sûng chuh Delhi bo ta bawk naw nih. Chu ang pei chun inhmaa dar ang ei lo sai hlak Delhi a um sûng chu Hmar nauhai khawm ei chêng ve zing ta ring a um. Ei hnam sûnga inkhêlmihai tadinga platform tha tak a la hung ni pei ding hun chuh nghakhla a um takzet el. Chu hun chuh tu hri a ding hin chuh ei hmathlir el la ni sienkhawm, tak ram a hung chang ngêi ei beisei tlat a nih.

Thupui (Theme) : Kar hmasak lai ela khar lo ni tah Euro 2012 a an thupui chu “Respect” ti a nih. Football khawvela tournament ropui hai rêng rêng chun thupui an nei hlak a. Hi thupui hi inkhêlmihai el chau ni lo in, ram le hnam, mi chitin chitang hai laia an sukhluor nuom, an thucha a ni châwk. Sawrkar le hringnau hai lai “Inzana / inzatawnna” suk vul thar chu tukuma Euro thupui tak a nih.

            Chu chu zawm ve in DHPL a khawm thupui ei lo nei ve hlak a. Kum khat khan “Play For Life” ti chu thupuiin ei lo nei a. Mi thenkhat tading chun umzie a lo nei phâk naw pal khawma, mi thenkhat tading ruok chun ngaituona a suksei hle. Tukuma ei DHPL a ding hin Organising Board ha’n official takin thupui puong nei naw hai sienkhawm, DT chu thupui nei tha in a hriet leiin a lo thlang a. Chu chuh “Dum (Tobacco) Bânsanin” ti hi a nih.

            Ei pi le puhai chu hlothloa fâk zawng an ni leiin thangtham le mise karah lo theilo in sin an thaw a tul hlaka. Fur ruotui tam laia hlo ei zuk thlo lem chuh mise’n an mi zâwn zo vâng a nih (nupui hmûr thiemin). Chu lei chun lo sinthawmihai chu dumkhu (lekhaziel / cigar) hâwp dingin an lo insukhmu rawp hlak. Tulai thangthar hai ruok chun sawr tangkaina ding a um lei khawm ni chuong lo in dum hi chi hrang hrangin ei taksa ah ei laklut zing a. Sietna tam tak a min tlun ei hriet zing khawma ei la zawngsak tho tho zing hi a pawi hle. Chu kawnga ei fihlim theina dinga hmalâk chu ei thaw mâkmaw a ni tah. Inchûklai le inkhêlmihai lem chun bansan tawp ta inla ei nuom takzet. Chuleiin, sikret, raja, sada, swagat, tiburtui, zarda, talab, shikhar, dilbagh le a keihnawi thil po po bânsan tâng ei tiu. “Dum Bânsanin” thil tha, thil tangkai uor lem tâng ei tiu.

Thukhârna : Thalai tam tak inruithei le suolna chi hrang hrangin a lem mek zing a. Hieng lai hin eini chu hriselna le thil tha lampui hraw tum hrâm hrâm lem inla nuom a va um de! Lungril a hrisel ding chun taksa a hrisel a ngaia, ei thienghlim a tul a nih. Mani invawng thienghlimna ding chun insumtheina a pawimaw hle. Inkhêlna chi hrang hranga taksa sâwizawi hi hriselna intluntu chi khat a ni ve. Ieng inkhêlnaah khawm nisien, hrâtna ding le thathona ding chun ei taksa’n a huot thil hai hrim hrim laka inthawka ei insie fihlima ngai bawk a nih. Nu le pa hai khawma suol hmun neka khêlmuol ngainatu ei thalai tam tak hai hi va uop in thil tha lampui insukhmu thar pei inla nuom a um hle.

            DHPL thiltum le hmathlir lungrila sie zinga mawi tak le thienghlim taka inkhêla hlawtlingna chang ngêi dingin thang tlang ei tiu. Player le team tinhai, hlawtlingna chang ding le tukum DHPL hi kawng khat beka hlâwkpui seng dingin DT chun ditsakna anhlan cheu. Delhi HmarPremier League inthanglienin hmasâwn pei raw se.