HSA Tour Report

Hun iemani chen a inthawk a ei lo tung lawk HSA Educational Tour 2010 chu zani, October 30, khan tluongtaka zo a lo ni tah. Tukum chu a hmun khawm a hla naw bawk a khawm ning a ta ring nekin a fe khawm ei thahnem hle. Nikum khan Jim Corbett National Park a fe tum in thang ei lak a. Amiruokchu, a hmun a lo hla deu bawk bakah sengso a hung tam tham deu lei kha ni dingin ring a um, inhnikna suklang mi 10 vel bak ei um naw a. Tour khawm nei thei lo in a hlamzui reng bawk ani kha. Ieng po khawm lo nisien tukum ei nei thei nawk hi lawm a um takzet anih.

            A khawvel in a’nhersuokpui tak lei am ani ding hun vawngdik hi chu ei in hril rawn po leh ei thei tak tak naw zie ei hrietchieng tul el anih. Chuleichun, ngaimaka khawm ngai chuonglo in zuk hril pei el tang ei tih. Ei dan pangngaiin Pick-Up point ei tarlanghai kha pakhat khawm a hunbi indik a ei tlung hman naw anih. Asanchu, mi danghai ei ngaituo phak ngai naw lei ni takin ka hriet. Ei hunbi tiem a tlunghan ieng chen am eini leiin rinum an lo tuor hman ding ti ngaisak lek lo in ei hun ei hmang a. Apawi hle.

            Leh! Report tawite’n hang thailang ei tih. 47 Seater Tourist Bus pahni a intar lo tawk a inthawk suok ani a. Ka lo tiem chie naw a chu mi 90 vel chu kan tlingin hriet. Naupang pahni an um bawk. Bus driver pakhat in lam a hriet chieng naw a. “A hriehai in hmasa tir la a hnungah hnawt el rawh” kan ti hlaka hnawt phak mumal thei bawk lo. A tlansan hla met leh phone in a ko chat nawk pei a. A buoithlak hle. Chu chu hun remchang a la in tlangval thenkhat in video a lain bus pahni a chuonghai po po chu introduction an lo nei pui a. Darkar 1 lam chu darkar 2 vel kan tlan hnungin Sultanpur National Park chu kan tlung tah a. Haryana sung ani tak leiin phone khawm roaming  service in a um vawng ta a. Bus pakhat nghak lai chun thuoituhan tickethai lo sukfel vat vat a. An hung tlung kim chun thil pawimaw tlawmte puong ani zo in park fang ding chun kan invakdar tah anih.

            A park chu a lien ve angreng khawpel a. A hmun khawm anhawi ve hle. Amiruokchu, tui a lo kang nasa lei khan a mawi ding angin a mawi zo ta naw a. Dil chung tlang bawlawl a thinghai chu vate chi hrang hrang, abikin tui vatehai, in an ra kur tek tuk a. Va fe hnai rak dan a um naw leiin zuk thlier hrang a harsa a, vate chu an tam hle ti naw thei an nawh.

            Ramtina invak dar a thla dam la a hun kan hmang hnung chun 2pm in main entrance lai kan intuokkhawm nawk a. Game chi hrang hrang a insukhlimna kan nei zo chun A-Mart han fak le dawn ding an mi hung thak pek chu thlaitakin kan kil tlang tah a. Kan lo tam tawl ta tho chu ning a tih; kan hlim tlang hle. Chuongchun zawng hawn le inchu pumin lunch chu kan kil anih.

            Kan inthun khawp zo chun huon fang ding chun kan lut nawk ta a. A lo sawl deu entrance bulhnai lai a lo hadam pawl khawm kan um bawk a. Kan inhman tawl tho a khawm ni ding ana, hmangruo iengkhawm thanglo a kutlawng tawp a nga manna ding mi thenkhat in an lo va hmusuok a. A chin a lien, a hmei a pa a hre taphawt deuthaw chu an lo va tlan khawm a. Vakam a hung inper dawkhai lo rut el ani leiin, a dan le dun kha chu thu dang nisien, nga man lai chu a awlsam pawl ni hrim hrim a tih. Thenkhat lem chun an rack sack a inleng lo vang khawp a man le kan insawp nawk el.

            Zantieng kan hung kirna lama chun bus pakhat chu tluong takin a hung thei a. Pakhat lem ruok chu traffic incheptak kara hung inhmang kuol hrepin thimbutin dar 7:00 vel in Mahipalpur a hung inher dawk thei hram chau anih.

            Ieng po khawm nisienla, lawm uma ngai ei ta; kumthar tieng chu inthuruolna tha lem leh hmun puithu lemhai khawm ei la fang thei ngei beiseiin lo insingsa sau sau ei tiu.