DELHI GAWP

Tukum khawm kum dang ang bawk in program chi hrang hrang in a mi chenchil zing a. Kum chenve ei pel hnung lem chun ei buoi zuol sau a. HAS Freshers’ Meet, Thalai Conference, Sikpui Sports, DHPL, Nupa/Nu le Pa Camp le a dang iemani zat chu ei hmang zo ta anih. A mihriem ei in angnaw ang bawkin ei thlirna tukver anthawk a ei hmu danhai chu inang naw seng a tih. A thatna zawng thlir chun ei hmasawnna chikhat inlangtirtu ani a. Lawm a um hle anih.

Hun iemani chen a inthawk khan “Sikpui Ruoi/Kut hi ei hmang ding ani?” ti chu zawna tlanglawn pawl tak ani ta a. Hmang ei in beisei ta naw hnung a ‘surprise package’ ang deu in a hung inri nawk hak a. DHWA a inthawk formal taka thusuok siem ani hnung lem chun ei Gawp thupui tak a hung ni ta hrim anih. Mitin in ei phur tlang seng niin anlang. Khingtieng pang a chun ei Thalai Pawl hai chu Saikot hmuna Centenary Closing Program, ei Gospel Centenary lawmna hun kharna, hang hmang ngei tumin thang an lak mup mup zing bawk. Hlapawl el bakah Skits dam inchukin nassatakin thang an lak a. An fena ding tickethai ngaituona leh; an lu inhai deu map map khawpin an bei ve zing anih. Chuonglai zing chun, Delhi University hnuoia Undergraduate student hai chu Home Examination hi December thla a an nei hman dim; January thla a bawk ani nawk dim ti saikar in hun an hmang mek bawk. A thuneituhai a inthawk hlak a thu chieng iengkhawm hriet ding mumal a la um naw bawk leh, student hai chamlakah a sie vawng a. A buoithlak pek hle. Kil khat ei zuk thlir nawk chun North East a inthawk a Delhi hung tlangtla hnam tin lai a inkhelna tienga inelna Tamchon Trophy a ei hnam hming chawia inkhel ve ngei tumin ei inkhel thiem iemani zathai chun HAS Delhi hmalakna hnuoiah Practice khau takin an nei map map zing bawk. Graduate student, exam pe pawlhai khawm exam pe dinga an in buotsai an chawl hman bik nawh. Mi inkhelna le an pungkhawmna haia an van lang khawmin an tin pha thipuhakin an bei nawk hlak. Ruol thenkhat hlawtlingna chang hriet ding an um deu zing bawk leh, inthladana hman khawm a um bik ta nawh. Ei hmazawn sengah ei buoi mup mup seng a. Buoipui nei lo a inzam thabo el nek chun buoipui nei a invir rak rak chu a tha lem naw a?? “Teplohai teplo,” Thuhriltu chun a tih; “Thil po po hi teplo el anih” Anleh ei reng hin thil teplo el ngaituo a buoi rak rak ei ni el ta am anih?? Delhi Gawp.