Hmar Gospel Centenary -Saikawt

Manipur South District a Chanthintha a hung lut kum zakhat tlingGospel Centenary lawmna Hmar hnam sunga Kohran tum tum han mani puol chita an hmang zo hnungin Hmar Christian Leaders’ Forum (HCLF) in December 9-12, 2010 sunga Hmar hnam pum huopa Gospel Centenary lawm dinga remruotna a lo siem angin Gospel Centenary Celebration Committee, HCLF chun insingsatna ngawr takin an fe pui mek a. Gospel Centenary hmang dinga thil tul le pawimaw hai sukfel le hmang el theidinga inpeifel ani tah, tiin Hmar Gospel Centenary Celebration Committee, Inf. and Publicity Department in thusuok an siema chun an zieklang. Tuta tuma Hmar hnam pumhuopa Gospel Centenary lawmna hiruoi siema a huou huou zawnga hmang tum ani nawh. Programme detail khawm sut zo tep a ni tah. Gospel Centenary hmang ding hin Mizoram, Assam, Tripura, Meghalaya le Manipur hmun tum tuma inthawk le Vairam a Hmar Christian Fellowship um hai khawm thang dinga fiel vawng an nih. Gospel Centenary hmang dan ding tlangpui chuh; Thalaihai ta dingin Music Nite le singing Festival um a ta, Gospel Centenary Choir Hmar umna hmun hran hran a inthawk thlang khawmhaiin Centenary hmangtu hai inpakna hlain inawi an tih. Gospel Centenary darkhuong vuokna nei ning a ta, Dr H.T. Sangliana, Minorities Commission ViceChairman chun Souvenir tlangzarnanei a ta, Rev. Hrilrokhum Buhril in (L) Rev. Thattinlien, Bhutan Missionary chanchin inziekna lekhabu tlangzar bawk a tih. Gospel Centenary hmang sung hin Seminar hmun thumah; Pasal, papui tieng haita dingin “Kohran le inpum khatna(Federal Unity)”, Nuhmei hai ta ding bikin “Nuhmei le Hmasawnna” le Thalaihai ta dingin “Thalai leinchukna” ti thupui hai hmangin neining a tih. Hieng Seminar haia hin anuom taphawt thang thei ning a tih. Hieng Seminar pathum hai baka hin“2010 hnung tienga Ramthim rawngbawl dan ding” ti thupui hmangin Seminar nei ni bawk a tih. Centenary sunga thuhrilna neitu dinghai chu Rev. D. Ruolngul, Rev.Rothanglien Hmar, Rev. Dr. Ruolneikhum Pakhuongte, Rev.Hrilrokhum Thiek, Rev. H. Chungthang Thiek le Rev. Dr. H.M. Songate hai ning an tih. Hmar hnam pum huopa Gospel Centenary hmang ding hi hlawtling taka nei le malsawmna tamtak a hung intlun theina dingin mimal le Kohran tin haichu Pathien kuomah ma lova tawngtainaa Pathien lo buon seng dingin Hmar Gospel Centenary Celebration Committee chun ngenna an siem.