BALLE BALLE PUNJAB - III

-Lalchungsiem Thlawngate

Camp: Sangrur. Punjab.

Date: 30.08.2006

Dec 22, 2005 chawhnu tieng a nia, Christmas a hnai ta leiin mi tamtak chu thuomhnaw thar inchawk tuma Sarojini Marketa an buoi nuknuk hun lai tak ani ka ring. Kan nu khom chun Christmas Tree a lo inchawk ve thu le, Munirka a kan umna chu a thei ang anga a lo cheimawi thu SMSin ami hung hrila. DHCF in BSSC hmuna Christmas hmang dinga program a siem leiin Mahipalpur Thralaihai khom hnatlâng thawin an buoi nuknuk hun lai ni dingin ka ring. Kum dang nek tak khomin an buoi vieu
el thei ani. Asanchu, programme nei chânga a huoihottu tak ni hlak Pu (Rev) Lalneikhup khom an lo sonsifâr leiin ni 3 liem ta khan Bethesda Centre a lo suoksan ve char ani si. Kei khom buoi namênin ka buoi nawh, sienkhom ka buoina ruok chu khawvel Sandamtu hung pieng ding lo tûng taluo leia buoi nilovin, hmun ka la hriet ngainawna Sangrûr, Punjab-a District Headquarter pakhatah an mi sonsifâr leia buoi ka nih.

Chandigarh-a inthoka ka suokdok chu zantieng dar 3 vel hin Sangrûr Bus Stand ka tlung ve ta hlola. ‘Ui mawl ram suk’ an hril ang elin ka bo ve top el anih. Khawtieng am ka pan ding ana? nisa hlak a thla vak el ding ani taa, khawlam ka riek ding ana? zana hlak a dei nasa awm si, ti naw chu ka lungrila iengkhom a um nawh. Delhi tienga sung le kuo hai, thil hrie deudeu dinga ka ngai hai ka hang phone kuol tawla, Sienkhom Sangrûra lo fe ta hlak le a hmun le hmâng hrie tukhom ka hmu zo nawh. Hmelhriet an um el dim tiin ka hang enkai deua chu kei anga hnârbong takngiel khom ka hmu nawh. ‘Vâna ra’ ang el anih. Saptrong le Hindi trong ka hriet angangin ka hang indon kuol vela, anni hlakin Punjabi ngotin an mi don pei. Ka hril chu an hrietthiem ni ngei a tih, anachu an hril ruok chu iengkhom ka hriet nawh. Sienkhom, an mi khîkhmu vel dana inthok chun Hotel nekin FCI Office chu a hnai lem ni dinga an lang leiin office tlung phot lang staff-hai khomin hotel man tlawm deu dam anmi kawkhmu el thei ka ringa, chu ding chun ka lungril ka siema.

Ka changtieng chun Cotton Suitcase, lien mangkhêng el; Rizai, Blanket le thlasik thuomhnaw dang danghai kan nu-in ami thun bit pek tral chu rik ti tak hin ka khaia, ka voitieng dâra chun Airbag lien huntawk ve tak el, ka thuomhnaw chi hrang hranga ka thun bit chu ka pai boka. Darkar 4 zet bus-a intet hrep zo cho ka ni leiin, thli mi mûtna ka bawksam chu an thira, ka mit a sen rûn bok. Darthlalang ka neinawa, ka hmai trol chu ka hmu thei chuongnaw leiin ka ngaidam theia, sienkhom nidang neka nasain ami kei trek truk ti ruok chu ka hriet. Thlasik thli deiin ami mût nasa taluo leia ka hnaptui far khom chu a hnâra inthoka hung pût ani ti inhriet ngawi ngawiin ankhat tawkin a hung luong dok nawk zai hlak. Ka thuomhnaw hai chu chawi peiin ka sin neisun va zom ding chun lamlien ruok reng rung a chun ka lawn phei ta nok noka. Ka sawl, ka phing tram leh, kha ni khan chu Christmas mood-a ka um naw chau khom an naw, ka romantic naw fêt el.

Beiseina khel tiengah office a staff-hai chun an mi lo hmu nuom tawl khop el. Nuhmei hai lem khan chu an mi hope deu amani ding aw ka ti rumrum, an mi lo nuisan deu tat tat tawl vong. Sienkhom inti thupui deua um ta laklaw kha ka nia, ka ûksak nuom tawl bik nawh. Chunekin, khawlai hmun a’m bu fain ka riek ding ana ti cho naw chu lungrila thil dang a um thei nawh.

Administration Sectiona a hotu tak chu Sardarji, pa lien tak el hi alo nia, A lu a kawm bûra, a khâkhmul chu inbuk hlup el, extra ordinary-a sei hi alo nih. Ami hang biek changa a khâkhmul châng vel supsup chu ka mit la zawng tak hi ania, ka ennuom hle. Ama hlak chun ka thuomhnaw hai popo le trop taka officea ka zuk lut chu mak tiin ami lo ennuom ve bok. Kan inennuom tuo hi ani ringot el. Sienkhom kan insuk thutak veve a, an nui suok ruok chu kan um nawh. Pa thratak hi a lo nia, ka joining report chu lain, a trul ang ang ami ngaituo vatvat a, In hluo ding ka hmu hma poa ka tlungna ding le chu bulhnai laia bufakna ding a um nghal thu dam ami hang hril vel chu ka thank you sir inrang thei ie. Tu chen hin hi mipa le hin nitin kan inhmu hlaka, kan inen nuom dan chu a nêp ta deu nisien a hawi. Sienkhom kan innui deu sûi zie nawk thung tah. A khâkhmul ka hmu zât hin chu ruomeiser lientak el, Patpuihmun suotienga mâuhâk ruotrol ngeia an siem kha ka ngaituo suok vong vong hlak chu tie. Khangang ruomeiser ngei khan hang hlieu inla chu kâng nuom vieu a tih ti ngot ka lo hisap hlak. Ho mei mei.

Zantieng office trin chun kan nghatna ding khuolbûk (dharamsala) an mi kawkhmua, chutaka chun ka thuomhnawhai ka hre fela. Ka phing a trâm ta bok leiin a tuollai Dhaba a chun bu fa dingin ka fe phei nghala. Sienkhom Christmas Cake chu hril lo, cha-wal tak ngiel khom an lo nei nawa, khop deua fa dinga inbeisei lai, hnuk intar ngawingawi-in tandoori rooti chu ka bak ta lema. Rooti hi ka lo du ve tho hlak amani ka tia chu, fak ding dang aum thrak naw hin chu lungril ruka hin basmati rice, thlenga thurdok zo hlim, khu hlat hlat mol kha a hung inlang nawk hlak. Hi hi maw Punjab chu, a va thring lawm lawm de! ka ti lungril zing laiin Rome-ah i um chun Roman hai angin khawsa hlak rawh an ti hlak ni awm tak kha ka lungrila a hung inlang (khanglang)a.

Kan ring hman hmain ka present address chu Punjab a lo ni ta zing el. Inhoi ti awm taka um chu a trul tah. Sienkhom eini tlangmi tronga hang biek ding tukhom an umnaw lei ruok hin chu ka khuo a sawt thei em em. Patling meuin ‘kannu ka ngai’ hang ti el nading san hlak a um si nawh. Hmar trong khom ka hmang nawna a sawt ta a, ka theinghil el ta dim tia kan ringhla rum rum lai takin ka phone a hung inri vang vanga. Apostolic Indian Mission hai General Secretary Pu R.H.Hminglien Hmar a lo nih – ‘Halo, I dam maw? Nang bêlbul ding chein Sangrûr a khan Missionary pahni kan hung sie nuoma, a rem thei ding am?’ ‘Rem theinaw nih’ ti a ka lo don tanaw kha tu chen hin ka lan sîr naw zing.

(Sulhnung Fang: DT May 29)