Mithiem hai hril dan chun hnuoi sunga thautui (crude oil) ei ti
hi a tlangpuiin sedimentary rocks (ṭieu, pil, phaiphin etc., tuipui ṭuong a kum tamin a del de hnung, lunga insiem) karah a um deu
tak. Tuipui ṭuong (sea floor)
a biomas infin khawm, sedimentary lung kar a hun sawttak (under heat &
pressure) um in Crude oil, Natural Gas le lung meihawl (coal) hai hi an hung
insieng hlak. Tui hnuoia inthawka insieng a ni leiin “Hydro-Carbon” tia hriet
lar a nih.
Ei chengna ram hai hi kum 250 million liem ta laia Tethys sea
(Tethys Tuipui) in a lo inkhum vawng a ni a, tectonic plate movement leia
orographic movement (mountain building) hung um in Tuipui ṭuong a inthawka
fold mountain hung um a nih tiin mithiem hai chun an lo hril hlak. (Himalaya
pumpui, tuta ei chêngna ram hai hi ṭhangsain, hi tuipui ṭuong a lo ni hlak). Tethys sea lo ni hlak, tu chena tuiin a lan
khum zing hai chu hieng Meditterrinean sea ,Black sea, Caspean sea hai hi niin
an hril hlak bawk. Tethys sea in a lo del hlak, tulaia khawmuol a um tah,
thautui tamna hai chu hieng Middle East, Gulf of Mexico, CIS countries,
Ankleswar (Gujarat), Assam le Burma hai an nih.
Khîng a chunga thautui tam na ram hai khi Tethys sea hnouia lo
um hlak vawng an ni leiin Geologialcal Survey of India (GSI) haiin Tuiruong lai
hin thautui um ngei ringin zawngsuokna sin kum iemanizat lai inthawk khan an lo
ṭan ta a nih.
Chun hi lai hmun hi a leilung pienghmang (Geological feature) hi “Domal
Structure” niin mithiem hai chun an hrila, hieng ang hmun hai hi thautui khur
(reservoir) ṭhatna hmun an lo
ti hlak bawk. A um ngei ti an hriet chieng hnung, technology dang dang hmanga
finfie (confirm) dinga survey an suk tawpna khawm, “Why not in Barak Basin” ti
a nih.
Khawvel hmun hrang hranga thautui an laksuok dan tlangpui chu:
Natural lift an naw leh Water Injecting method hai hi ani deu tak. Thautui
tamna le laksuok ani hlim lai chu Natural lift method hi an hmang tlangpui a.
Hi hi machine hmanga hip dawk a nih a, Middle East lai khun hi method hi an
hmang tlangpui. Water injecting method ruok hi chu thautui tlawm tieng, thautui
khur (reservoir) sunga tui an thunlut a tui nekin thautui a zâng lem leiin tui
chunga a hung in lânga, awlsam takin an lak suok hlak. A pakhatna hmangin khawvela
thautui 40 % vel hi laksuok a nih a, a pahnina hmang khin 50 % vel lak suok ani
bawk. Safety measure ṭhatak nei naw chun underground fire hai um thei a ni a, thing le
ruo , ramsa le mihriem hringna chen suk se thei a nih.
Ei ramah thautui a um ngei an finfiena hi kum iemanizat ni tah a
hriet a nih(90’s lai). Manipur University a Professor (Geology le Geography
dept.) tam tam tak lem chun hi lai a thautui um an hriet hi Tipaimukh Hydro
Power Project an ditnaw na san pakhat ani nghe nghe. Asanchu, Tuiruong tui
nasataka an ting chun thautui hi tui nekin a zang lem a Tui pressure leiin
state dang, Assam a drilling thaw awlsam a ta, ram danga ei ram hausakna sawr
pal an inlau lei a nih. Ei ram hausakna ieng leiin am mi rama laksuok ni thei a
ta? anlo ti hiel a nih. Prof. Jha (HoD, Geoscience, Indian Institute of Remote
Sensing) chun hi laia thautui um hi satellite technology hmanga confirmed a nih
tiin a hril a (1998), Domal structure ani bawk leiin thautui tam hle ring a um
a nih tiin a hril bawk. Ei ni rawiin ei ram, a bikin Tuiruong pang lai a
thautui um hi ei ring naw lei amani an nawleh ei hriet naw lei? Geological
Survey of India le ONGC haiin thautui a um ngei ani ti an finfie hnung khawma
ngaiven pawl tukhawm ei um choung nawh. Mi haiin ei rama leilung hausakna hai
hi an lo ngaiven in ei ni nek takin anlo hriet lema, khang laia inthawk khan lo
ngaiven inla chu vawisuna ei buoina hai hi um kher naw nih. Kum 2009 a Global
Tender an ko laia inthawk bek khan ṭhang lo la inla chu ngaidan ṭha tamtak nei ngei tâng ei tih.
Ei ni rawiin chêngna tlak lova ei ngai laiin mi haiin ei ramah
rangkachak (black gold) an la hung hmu pei ding chu ning a ta, chuleiin ei ram
hausakna hai hi hriet le sawr dan ei inchûk nasa hle ṭha’ng a tih.
Tipaimukh Hydro power project le thautui laksuokna sin an thaw tak tak pha chu
ei lo ngaituo lawk naw ang bawkin a khawk khawm ei ngaituona khelah a nasa hle
el thei a nih. Tulai khawvelin a mamaw em em power le thautui hmunkhata hang pe
suok thei ram chu Sawrkar ta ding chung hausakna hnar hung niin hung hlutsak
hle tâng an ta, tlanglo (jhuming cultivation) ei nei hai khawm hi thil rem
chang ani zing ta dal thei a nih, hmathlir sei deu chu ngai a tih. Lo raw hai
remchang zing ta naw nia, chu le inzawmin Global warming suonlamin tlanglo nei
hai mi phal pek ta naw hai sien ei mipui haiin iem chang tâng an ta? Terrace
cultivation hlak ei inhnik si nawh. Thautui chosuok ani chun seepage (thautui
far rûk) lo thei lovin um a ta, boruok le tui hai suk pawrchein, mitnatna le
vun natna hai khawm um thei bawk a nih.
India rama hnuoi sung hausakna (mineral) tamna tak Chota-Nagpur
Plateau, hieng Jharkhand, Orissa hai khu ei enin , a ram mihaiin an hlawk pui
bek nawh. Hieng lawma ram hausa, Khawpui dang chu hril lo, Delhi khawpuia mi
suok (maid) tam lem hi khi laia inthawka hung an ni el dam hi ngaituo chun ei
rama thautui laksuok hi a ṭhatna ding tamtak um sien khawm ngaituo a suksei naw thei nawh.
Ei rama thautui laksuok hi lo phal naw inla ei ta ding in a ṭhatna ding iem
um a ta? Sawrkar in hung thawlui sien ei dangzo dim? Ei dangzo si naw leh ieng
ang chen am ei hlawkpui theina dinga kei kawi dan a um thei ti hai khawm ei ṭhuoitu haiin
ngaituo sain hmalak a hun tah. Sawrkarin Environmental impact ngai pawimaw
sienkhawm ei ni chun ei society a impact ding khawm ngaituo sain ei ram ta
dinga a ṭha tak ding ei
reng in ngaituo tlang a pawimaw takzet. Chuong ani naw chun ei mi thiem tamna, Ṭuiṭhaphai ah Ṭuiṭhapui luong huou
huou zinga fur ruo sur tlawm leia lo kei thei lo zing ei la na, tlangrama lem
chu ei resource hai hmang ṭangkai dan ei thiemna ding hun a la sawt taluo. Ei ram hausakna
hai hi hresuoka, hmang ṭangkai dingin Ṭhuoitu, inchuklaihai, mithiem hai le mitin mani theina kawng
senga theitawp suo seng ei tiu. “Kan Ram hi Kan Rohlu” ti’n ṭhang la seng ei
tiu.
(New
Delhi, 12th Sept. 2012)
No comments:
Post a Comment