Delhi Thurawn

TUM NEI LE NEI LO KAR

2012-02-09T01:38:00.000+05:30

-L. Keivom

A man without a plan is not man.

-Freidrich Nietzsche

Manipur simthlang bielin Gospel Zabili ei hmang zo hnungin kum khat chu ei lo suo nawk dèr el tah.

Zabili khèl tienga dinga thupuia ei thlang chu ‘Hmar tieng panin’ ti a nih. Kong hrang hrangah ieng chen am hma tieng ei pan ti mi tinin hang insût inla, ei donna chu inang naw thei hle dingin ka ring. Danglamna siemtu poimaw laia a pikhawi chu tum nei le nei lo a ni ka ring.

Tum chieng tak nei, an tum hlen suok dinga hma lakna ding hrie, a hlawk thei dan taka thrang lak dan ding hisap diem mi, an hisap anga a tluong naw khoma remhrietna hmanga a tluong lem dan ding dap suok pei mi an um a. Chuong mihai chu dannarain an tlatna muol sengah mi hlawtling an ni deu tèi. Threnkhat chu tum nei, an tum hlen suok dan ding ruok chu ngaituo chîk loa pawng nor an um. Remhrietna an hmang tlawm a, sawl rak lona dinga khom sawl takin an nor a, hlawtling ngiel ngiel khom an um a, sienkhom an rimsi. Threnkhat nawk ruok chu tum neia inngai, an tum tak khom hre mumal lo, a hlenna dinga inbuotsai dan ding khom hre lo le ngaisak lo an um. Mi hausa an hmu leh hausa, mi thiem an hmu leh thiem insang ve, hla sak thiem an hmu leh thiem ve, inkhel thiem an hmu leh thiem ve an nuom a. An lung puok sung sawt nawte chu an phûr hlut a, sienkhom an dai sawt ngai nawh. A thren nawk ruok chu tum khom nei lo, tum lo khom nei lo, tuipuia thingbong inlang anga inlâng, tuifawnin a hnawkna tieng tienga inlêng, an um.

A ieng pawl lai am ei thrang ti chuh mani seng inngaituo dingin sie inla. Kum thar 2012 chu ei phok tran mek a. Kum dang ang bokin ni 365, chawlkar 52, thla 12, ni tin darkar 24, darkar tinah minit 60, minit tinah sekhon 60 tho a ni ding a nih. Hi hun hi ei umna hnuoi invir hrat dan le nisa a hêl suokna dinga hun a lak zat besana inkhi a nih. A tak taka ruok chu hun hi a thar amanih a hlui amanih, a liem tah amanih a la hung ding amanih a um nawh. Hun chu um zing, danglam ngai lo, Present Tense a nih. Chîmbuka inthoka Mosie zawna hung dontuin UM ZING CHU KA NIH (Exodus 3:14) a ti leh khan an inzawl hle. Hun chu Pathien a nih. Thilsiem umphung chu inthlak danglam zing a ni laiin HUN chu “TU HIH’ (Present Tense) a ni zing. Hun chu, kong danga hril chun, CHATUON a nih. Ei pi le puhaiin Iengkim Pathien hminga ‘Khawzing’ an lo ti khah ‘Khuo+Zing’ tina a ni a, chu chun ieng lai khoma Khuo (Pathien) ni zing a kawk ve tlat leiin ei pi le puhai ngaituona thla ki khan a lo hol inthuk khop el.

Ei thil hril ding takah lut inla. Kha hma ang bok khan tuta le chatuon chenin, tu khom ni khatah darkar 24 neka tam pek bik ei um nawh. Hun hauh bik amanih nei tlawm bîk tu khom ei um nawh. Chun, Pathien ei ring amanih ring naw amanih thua khawvel hi inher ni loin, ama remruot sa, khuorel anga inher a ni lem. Paulan Athens mihai kuoma, “Ama leiin ei hring a, ei chang a, ei um a ni si a” (Tt. 17:28) a ti dam hi ringtu ei ni bik leia thil tlung ni loin, khawvel le a sunga chenghai umphung dinga Pathienin a rel lawk sa anga inher a nizie thu a hrilna a nih. Chu khuorel intlungtirtu tak chu ‘Hriet Lo Pathien’ tia an lo ko khah a nizie thu le chu Pathien thu chu tlanginsampuitu a nizie thu var takin a hril fie tawl a nih.

A sukchiengna dingin entirna pakhat hang hril inla. Chu chu hnuoiin hîpna (gravitation) a nei hi a nih. Vana tiem seng lo arasi bawr danghai ang bokin, ei umna hnuoi le leivir (planets) danghai chu nisain boruokah a hîp tàng a, a hìp tàngna kuol sengah nisa an hêl a, a hnai deuhaiin an hèl suok inrang a, a hla deuhaiin an hèl suok intak a. Nisa hêltu leivir (planet) tin chun hìpna thä an nei seng bok a, an hìp phak thei chin an hìp tâng seng a. Ei hmu phaka um arasi bawr lien (galaxy) Thlasik Trumkong (Milky Way) ringota khom hin chuong anga inhîp tuo chu arasi tlukledingawn (tda) 160 neka tam an um a, an invir mup mup el a nih. Ei nisa khom hin mani tum tawk vanzêmah ti angin sekhon khatah km 250-a hrata fein Thlasik Trumkonga arasi (nisa) dang, var kum 32000 a hlaa um chu a hêl ve a, voi khat a hèl suokna dingin hnuoi kum tiemin kum maktaduai 225 a lak a nih. Chu chu nisa ta dinga kum khat a nih.

Hi an inhîpna thä hi bo thut tah sien chu mitkhapkarloin vanvel le hnuoi le a sunga cheng le thil umhai hi inchek dar vong a tih. A um dan ding awma ka suongtuo chu Delhi Version-a Genesis 1:2, ‘ruongâm mumal la nei lo” tia kan inlet ang kha a nih. Chu hîpna dàn (gravitational law) chu hnuoi le boruoka thilsiem po poin ei hmang a, thrung le ngir le lawn theiin ei um a nih. Chu thila chun Pathien ei ring le ring nawin thu a phur nawh; ama remruot dan anga inher el a nih. Hi hi khuorèl (natural law) dan ei ti chu a nih.

Inchuktirna thra, sienkhom ei hmang suol tam tak a um. Pakhat chu, a ram le a felna zong hmasa phot a, thil dang po po khom pek belsaa um ding ti inchuktirna hi a nih (Mat 6:33). Piengthar hmasa phot a, a dang mamawhai chu autawmatiks-a hung luong lut zung zung ding ni awma ngai pawl le chuong anga inzirtir pawl khom chu ei um. I piengthar a, i sin ding i thaw si naw chun i hmabak chu hlawsamna chauh ning a tih. Piengthar inti iengang la khom i lekha tiem ding i tiem si naw chun i piengtharnain sunhang khat khom thrangpui naw ni che; i puonkhawng ding tet khat khom tetpek naw ni che a; i thlaisuong ding suongpek bok naw ni che. Voi za tam inkhawmah fe la khom i lekha tiem ding khah tiem sain um naw ni a, nangmaa hrietna luong lut ding kha far khat khom lut bok naw nih. Tirko Paula lem chun, “Sin thaw pei lo chun a fak khom fa naw raw se” (2 Thes 3:10) a ti top el a nih. ‘Piengthar inti, Kristien Samdal’ hai hi a theida hle a, bu ngheiin thi hai sien khom an chan ding hrimah a ngai hmel khop el. Sung tin, kohran tinin hi pawlisi hi hmang ve inla chu, ei ngirhmun inkâng awk awk el a tih.

Pathien ‘ram’ a tlungna mihriem, sungkuo le kohrana inhril si, Samdal anga zàl puma malsawmna hung far thla ding trongtraia lo inchàn mi ei ni chun, Pathien thu umzie ei man threlh tìna a nih. A tù rawnin an sîk treuna, a tù tlawmin an sik tlawmna (2 Kor 9:6) khawvelah chuong mi le hnam ta ding chun dam khawsuokna lampui a um nawh. Hnuoia hin hausakna le thilthawtheina tinreng Pathienin a phum sâ a ni a, thiemna, lungvar, taimakna, remhrietna le tumrùna le thrang la nasâ sàin an huot dok rawn el a nih. Boruok fawn hmangin internet thawtuhai chun khawvel inbiekpawna le indawrtuona hi chalaiin sum tam tak an hmu a, inhmatonin ei inbiek a, kha hmaa chanchin hmu thei lo dinga ngaihai chen khom kha voi khat hmetin ei hmaah an hung inlang el a nih. Sumdawng thiem Marwarihai chun Baibul chang hlek khat khom a hriet naw el thei. Sienkhom a hnam pumin a hausa naw pawl laia pakhat khom ei tluk zo tlat naw thei bok. Pathienin hnuoia hausakna a sie sa eini neka huot dok rawn dan le sukhlawk dan a thiem lem lei a nih. Hrietna, thiemna, varna, remhrietna, tumruna le taimakna hai hi ni tin khawsaknaa hma tieng pana mi thruoitu dinga hmangraw poimaw an nih.

Civilisation hrang hrang sawmthum chuongin hi khawvel hi an hluo ta a, an inkhak a, an insor tuo a, damten varna le thiemna tienga hmasawn lemhai chun a hmasahai chu an hung hluo-hlan pei a. Iemani chena inthok khan Christian Civilisation ei ti, Western Civilisation tia hriet bok chun khawvel a thruoi a, sienkhom a thä a hung chuoi tiel tiel a, kha hma daia ropui taka khawvel civilization lo thruoitu Asian civilization hung vul thar chun hma hung lain, China le India chu khawvela hmasawn hrat tak an hung ni tah mek a nih. Hma lo thruoi hmasatu Japan ram le hmasawnna tienga lu lokhai hi kristien ram pakhat khom an um nawh. Chuleiin, kristien ram ni leia hmasawnna le changkangna chabi neitu anga an lo hril hlak kha Pathien thu le ngai fin chu a him ta nawh.

Gospel Zabili 2010 ei hmang sunga thu le hla ziektu le hriltu tam takin ei hril uor chu kristien ei ni leia lekha inchukna tienga hma ei sawn hrat thu a nih. Chu thil le inkopa ei hril sa rop chu Chanchin Thra hung tlung naw sien, thing bul lung bul bea ei la’n thawi zing an ring thu a nih. Hi thukhawchang hi chik deuh meta ei bi non ngaiin ka hriet. British-haiin an mi op sung khan inchukna tieng anni kuta um a ni leiin, lekhathon ziek thei le Baibul tiem thei ei ni bak chunga mi hlangkai kha an tum naw a, inchuk zomna ding high school hong lem kha chuh a trul tongkhongna hmuna naw chu an remti nawh. Mizorama khom an tlawm ding ruoiin high school ngir an phal chauh a nih. Lekha tieng ei hung leikâng met chun ei chanah lungawi nawng ei ta, anni lakah ei hel an inlau a nih.

Manipur simthlang biela ei ngirhmun ei en chun India ramin zalenna a hmua inthoka kum nganaah 1951 khan Pherzawlah High School hmasa tak a hung ngir a, chu ra suok chu Matric tling an hung suok tran a, chuonghai chun college an hung kai a, a threnin engineering le pharmacist an inchuk bok a. Chu chu thiemna tienga bulthrut ei hung rem tak tak tran hun a nih. Chik taka ei sui chun, ei mi thiem tam lem hi India ramin zalenna a hmu hnunga secular educational institution ra suok deuh vong an nih. Kohran chun iemani chenah, primary/middle level-ah a mi thrangpui bak chuh thiemna tieng a mi dom sang hle ti hril ding a vang khop el. Khang hun laia India rama inchukna in thra deuh hleka ngai chu kristienhai ta a ni tlangpui a, chu chu India ram puma khom a ni vong a, eini laia thil um bik a ni nawh. Hun a hung fe pei a, college le damdawi in thraa hril chu secular institution an hung ni tah lem a, kristienhai enkolhai chun chau tieng an hung pan tiel tiel tieng lem vong a ni tah.

Chuleiin, kristien intihai hin ei ngirhmun hi a thara ei inbi non ngaiin ka hriet. Kristien indik tak chu Krista ringtu a nih. Ringtu a nina hriltu chu a thilthaw a nih. Ringna hi thilthaw thrang lo chun thil thi a nih. Ringtu inti si, thil thra thaw si lo chu ringtu thi a nih. Ringtu thi le ui thi sain tlaktlaina an nei nawh. Ringtu intiin inchei vurin leng suok inla, ei tuola dhoti keia trop bara a sin taima taka thaw hlak, ei hmusit em em kha a thil bata lain amanih, a sum pukpek si inla, chu pain a lungril taka a mi hmu dan ding chu hisap buoi khom a ngai nawh. Ei hmusit rok, milem biea ei hril leh khan eini Pathien tak betua insie kha Competitive Exam ei thaw ve ve a, rizal a hung suok a, ama hming chu fie kuouin khi khi khi vah, eini hming ruok chu boruok mong nei lo, khuorkhuruma thlak angin hmu zo ni ta rêng rèng lo! Chu huna chun i thiempu suongtawlol khah thruoiin vaipa kuomah kampênin fepui la, “Keini Pathien hring betu kan nih” tiin va hril ngiel la, i thu a lak i ring am?

‘Thuruksek’ ti chauh naw chuh hlaw i nei naw el thei. Ieng leiin am? ‘Ringtu’ inti pa/nu khan ei Pathien ‘hring’ kha Pathien ‘thi-ah’ inchangtirin, ei sukmuolpho tlat annawm! Baal maicham buotsaituhai Elija’n a ela, “Khêk inring deu ro khai! In pathien chu a ni chie sia maw! A’n ngaituo vung vung amanih, a buoi amanih, a’n zin hmang amanih khom ni rawi naw nim. An naw leh a in a, kei tho a ngai khom ni bâng a tih” (1 Lal 18:27) a ti ang khan mi ti ve hai sien, intlansieknaah an hnung tieng khom ei hmu phak si naw chun, ieng am hril tang ei ta?

Pitarte thlanpuk fangin, “Mithihai, a zâl am in um a thrung?” tia trap hla an zawt a, a nakawr a dei leia thia inngaia thlana lo thrung Sura’n “A thrung khom kan um; a zâl khom kan um” a lo ti hlut leia thlabara a tlan siet ang el khan, kha hmaa All India Civil Services Exam-a eini rawi hming kum tin hmu ve ding a um zut lai kha ei riel sawt tah èm leiin, kum tam danah pakhat amanih a mongkhawna ei hung inlang kek khomin maktiin pitarte angin ei tlan se vê vàng el chu a ni tah hi tie! Hi hi gospel ra suok, pulpit tlanga inthoka ei suong thu ei hril vet hi a ni tlat si chun, eini-ah thudikin hmun a chang ta naw khom a ni el thei.

Ei ngirhmun hi inbi nona ei ngirna tak ei hriet chieng a thra. Gospel zara taksa le thlarau tienga hamthratna le hmasawnna tam tak ei dong nia ei hriet hi eini level-a chu ropui hle-in ei ngai khom a ni thei a, mi dang le ei inhrilkhi chun suong a um naw vieu el thei a nih. Ringtu tak tak ei ni chun ringtu ei nizie thilthawin tar lang ei tiu. Ringtu indik tak chu a taimain a ringum ding a nih. Thil thra thaw dinga Krista Isua siem le buotsai lawk, Pathien kutsuok ringtu chu khawvel hnea ngamtu a ni leiin a thawna taphotah mi hlawtling a ni ding a nih. Chu chu Reformation hun laia an thupui tak, khawvel chunga Europe ram inlengtirtu a nih. Hlawtling ding chun tum nei a ngai a, tum hlen ding chun theina po po le remhrietna po po hmanga phan lawk a, hma nor a ngai a, thaw thei loa mi ngai khom Pathien hratna hmanga theina po po leh thaw a ngai. Tum nei ei tiu. Tum nei le nei lo, thaw tum le thaw inkar hi hnuoi le van ang a nih. (Delhi, January 14, 2012).

THUSEP ZIEK HI

2012-02-09T01:35:00.002+05:30

Lal Dena

If you steal from one author, it’s plagiarism. If you steal

from two, it’s research.-Wilson Mizner.

Lam hi art (themthiemna) chi khat a nih. Ke pahni le ban pahni nei seng, a lam thiem le zeih bik rieu an um hlak.

Thusep ziek khawm hi art a ni a, mi tinin ziek hlak inla khawm, a ziek thiem bik rieu hi an um hlak. Sap mithiem tak tak hai khawm khu thusep ziek thiem (essayist) an ni vawng nawh. Thusep thiem le ziek thiem hi talent a nih a. Chubaka thusep hi mizie hrietna tha tak a nih bawk. Thuvar pakhat chun hmel hi lungril zawngawlna a nih a lo tih a. Chuong ang bawk chun lekhaziek le thusep ziek khawm hi a ziektu mizie zawngawlna a nih. Chuleiin ei lekhaziekhai hi ei mizie hriet theina, ei hlimthla le darthlalang an nina chen a um leiin ziek fimkhur a tul.

Thusep ziek hi in bawl ang deuh a nina a um. In ei bawl ding chun a hma’n a hlimthla (blueprint) ei lo nei hmasa a tul. In lim ziek thiem engineer le architect dam ei ruoi hlak. Chu lima inthawk chun hmangruo lak dan, a lut zat ding le sum seng zat ding khawm ei lo hriet lawk thei vawng hlak. A lim el baka ei in bawl ding a thungpha (foundation) remthat a ngai bawk; chu chun in det indo le tlo ding an nghat tlat a nih. Thusep ziek khawm chuongang tho chu a nih. Ngairuot lawkna (hypothesis) felfai taka ei lo nei chun, ngairuot lawkna ruongam tlangpui (conceptual framework) tha tak ei zam thei bawk hlak. Chuong ang ei lo thaw diem chun sin a zatve zo ang ei nih .\\\

Tulai chu computer khawvela cheng ei ni ta leiin, ieng thupui khawm ziek inla, computer hmangin khawvela library hmun dang dang hai khawm ei pindan chitea inthawkin ei sir zung zung thei tah a, research thaw le data collection hai khawm harsatna a tam ta nawh. Amiruokchu thu le chanchin ei lakna source hi zieksa ngei a tha. Ei thusep ziek thlawptu dingin mi dang lekhaziek le source ei hmang hlak a. Chu hmang dan chu kawng hni a um. Direct taka mi lekhaziek le tawngkam a ni ang anga ei lak sawng chun, chu chu direct citation a nih. Chu thu laksawng po chu inverted coma (quotation mark “ “) sinsiena sungah ei sie hlak. Entirna’n Sanga lekhaziek ka laksawng chun, quotation mark zo charah (Sanga: 2012:p.12) tia ziek a tha. Amiruokchu, Sanga tawng angiel angana la si lovin, indirect takin a thuphung la siin ka hmang thei a. chu chu indirect citation a nih a. Chu khawm chun a ziektupa le ei lakna source kha ziek lang ngei ngei a tha hlak. Hi hi intelectualtual honesty a nih a, ching ding a nih.

Mi ngai dan haw le hmangsuol (plagiarism) ti hin ieng chen am a huom a? Ka concept, theory le hypothesis-hai thlawptu dinga mi dang hai ngaidan direct-in amani indirect-in amani ka hmang thei a, ka lakna source indik taka ka ziek chun, chu chu ‘mi dang ngaidan haw le hmangsuol’ (plagiarism) a ni nawh. Amiruokchu, mi thil hmusuok thar, ngaidan le theory thar keia hmusuok anga ka ziek ruok chun, chu chu ‘mi dang ngaidan hawtu le hmangsuoltu’ ‘plagiarist’ ka ni tina a nih. Chu chu intellectual dishonesty a ni leiin, pumpel hram hram a tha.

Hi le inzawma ziektuhaiin ei hrietzing ding pawimaw dang pakhat chu ‘Intellectual Property Right’ti hi a nih. Computer hmanga hrietna khawvela inzin zung zung thei ei ni tah a. Mithiemha’n research an thawnaa theory thar le thil thar an hmusuokhai hi Intellectual Property Law (IPL) hmangin an humhal hlak. Chuong an thil hmusuok le sinsienahai chu anni phalna laklawk hmasa lova hmang thei a ni nawh. Hla phuok hai sien, an hlaphuok chu phalna la hmasa lova, ei hmang le ei inlet chun, IPL ei baw siet a nih a, hi dan hmang hin lei an min chawitir thei. Manipur sim thlanga chu chanchin tha mansapui inbangna hmasa ei lo ni leiin, thu le hla tienga ei lo burip hmasa a. Ei kawl vel unau suopuihai tam takin ei Pathien hla tuoltohai hi an twang inletin an hmang nasa ve em em a, lawm a um, inro ding khawm a ni nawh. Amiruokchu, ei hlahai an tawnga an inlet pha, a phuoktu hming indik hi mi ziekpek pei hai sien nuom a um.

Hi thu le inzawm hin hril ding tam tak um sienkhawm ei thu chaih le inzawmna bik chauh zuk thlur bing met lem ei tih. Lekhabu ziektu le thusep ziektu chun tu hril ngai lovin copyright ei nei seng. Lekhabu ei sut lem chun copyright neitu chu ‘author’ (lekhabu ziektu) a ni hlak, Author phalna lovin publisher-in lekhabu insuo theina le sut theina right a nei nawh. Chuleiin lekhabu sut a ni hrim hrim chun copyright neitu ‘author’ ti hi makmawa zieksa ngei ngei a ni hlak. Mi lekhabua an thuziek an phalna la lova ei laksawng chun, IPL hmanga khing thei le lei inchawitir thei ei ni ti hi ziektuhai chun ei hriet zing a tul tak meuh a nih. Ziek lang lova, eini awm thusuok anga ei ziek chun rukru ei ni a, chu chu intellectual thief ei nih. Hmar tawng le English-a ka article ziek thenkhat mi thenkhatin an hmang ka hmuh hlak a, mi acknowledge lo le an reference-a khawm ka hming tarlang lova an um ka hmu chang chu inhawih ka ti naw hle hlak. Mi thu ziek ei hmanga, acknowledge ei thaw hin ei ta dingin kiemna nekin hlawkna a ni lem ti hi hriet zing a tha.

Thusep hrim hrim personal reflection tieng panga inthawka thlira ei ziek chun, ei nuom ang ang ei ziek thei. Ei tawnhriet sirsina ziek a ni lem chun sapzek dang an hnaipui tiemsa rawn a ngai kher nawh. Mani awm thusuok ngei ei ziek pha, originality ei nei le nei naw an lang hlak.

Thusep ziek dan tlangpui thenkhat chauh zuk tarlang ei tih. Pakhatnaa Conceptual analysis: Conceptual analysis chun thil ei hmu dan le ngaidan, an umzie le hmang dan thlur bingnain ei hmang tak. Entirna dingin, muol mi lo liemsan ta Pu L.T.Pudaite chun conceptual analysis hmangin ‘Tlawmngaina’ Mizoram and Look East Policy ti lekhabuah khan a ziek a. Hieng ang method bawk hmang hin ‘Taimakna’ ti le a dang dang khawm ei ziek thei. Pahninaa chun Content analysis hmangin ei ziek thei bawk. Entirna dingin British officer pakhat chun “the hill tribes were most anxious for British rule” ti’n report a pek a. Hi thu hi critical taka chaih a ngai. Mingopa hin hnamchawm mizie a hriet nawh. Mingo rorelna tlangrama sukdet nuomna lungril a nei lien. Hnamchawmhai hi tiena tlanga inthawk mi dang awpde le sirdena hnuoia an um ngai nawh ti khawm hi officer hin a hriet nawh a. Tharum hmang chauhin Mingo rorelna zauh thei a nih ti hi a ring dan a nih. Hnamchawmhai hi mi thuhnuoia um tawk tawk thei nawh a. Chuong chu an ni leiin an hel zing zing hlak. A dang khawm khawm hrilsa ding tam tak a la um. Hieng anga thusep ziek hi content analysis a nih.

Thupui thenkhat historical topic an ni chun thil pali suih ngei ngei ding a um;- primary sources, secondary sources, running records le recollections an nih. Dannaranin primary sources chu thilhlui siekhawmna archive, museum, library le mimal thil lakkhawmna/siekhawmna hmunah hai hmu thei an nih. Hieng source-hai hi research paper le thesis ziekna ding chun rawn lo thei lo an nih. Secondary source ei ti hai chu mi dangin lekhabu, annawleh, thusepa an lo ziek ta hai an nih. Secondary (hmang tah) an ni leiin an hlutna chu a bo chuong nawh. Pathumna chu running records mimalin amani organization-in amani document le an thilsiennahai an siekhawmhai an nih. Chun, a palina recollections chu mani chanchin ziekna (autobiohgraphy), memoirs (thil inchikna) le tawngbaua thu inhlansawng (oral sources)-hai hi an nih. Hienghai po po hmang kawp hin analytical or argumentative papers ei ziek hlak. Thusep tlangpuia chu tienami hril ang deuhin narrative-in ei ziek tlangpui.

Thusep hrim hrim critical analysis thawa, a sir leh vel ena atanbawsuta ziek hin tiemtua mawrna (motivation) a pek tha nuom bik. Lala’n chuongchun a ziek a, Thanga chun chuongchun a hril tia thusep ei ziek chun, chuong ang lekhaziek chu “scissor and paste” an ti a; chu umzie chu “chep thlak le bel khawma lekhaziek” tina a nih. Mania awm thusuok (original thinking) ei nei naw tina a nih a. Chuong ang thusep chun tiemtua mawrna a pek ngai nawh. Entirna dingin khawtlanga thiltlung ei analyse ding chun, hieng indawnahai hi a pawimaw: kha thiltlung kha iem a ni a? Iengtin am kha thil kha a tlung el leh? Iengtiziea kha thil kha khang kher kher khan a tlung el amani leh? Khang naw zawng khawm khan a tlung dan a um naw maw? Hieng anga dilsut taka analytical mind neia thil ei suiha ei ziek pha, tiemtu ta dingin mawrna (motivation) a pek tha nuom bik hlak. Thusep ziek hi ngainuom um a ni baka, tiemtua mawrna le chona a pek a, tiemtu’n thusep dang a ziek nawk thei lem chun, a hlawk em em hlak a nih.

Thusep zieknaah hin tawngkam le thumal hmanghai hi dittui nawk zuol inla. Ziektu tukhawm a famkim ei um nawh. Kei khawm ka thusep zieknaa tawngkam ngainuom um lo ka lo hmang ve zeuh zeuh a. ‘Ka pension pha chun’ ti ka zieknaa tawngkam dit um lo deuh ka hmang a, siemthat thei a nit a si nawh. Ni khat lai khan ‘Ruoi, Ruoi, Ruoithe’ ti article ka zieknaa, “Ei pasiet tawl veih leh, ei nei po po dengkhawm inla khawm, Marwari mi hausa pakhat khawm ei tluk zo dim” tiin ka ziek a. Ka thawn ta si, kan sirna’n van a ur. Hieng ang tawngkam dit um lo le tangkailo hi ka lo hmang ve zeuh zeuh hlak a; ching zawm naw tha hlein ka hriet tah.

Hnam changkang lem hai thaw danin mi lekhabu le thusep thlirletpek le lepsepek dam hi ei hung ching deuh deuh ta a, lawm a um. Entirna’n book-review ei thaw chun, a ziektu concept, hypothesis or conceptual framework iem a ni a? A lekhabu ziekna hin ieng thawdan am (methodology) a hmang a? Ieng sources am a hmang a? A source hmanghai hin a lekhaziek a justify zo am? A chapterization a the fuk am? A lekhabu hin baksamna a nei am? A tlangpui thu’n hrietna kawngah le existing literature-a a ziektu contribution iem a ni a- tihai hi ei thlir dan tlangpui a nih. Iengkhawm ni sien ziektu le review-tuhai hi lungril lien tak putin a thu’n insel ei ta, personal mimal thila ruok chu ei lak ngai ding a ni nawh.

Thuhril le tawngbauhai hi chu ieng anga tha khaw ni hai sien, hun a hung sawt a, hrietzing an ni ta ngai nawh. Thusep zieka um, lekhabua mani magazine-a mani insuoa um ruok hi chu a um sawng an ta leiin, siemthat nawk thei a ni tah nawh. Chuleiin tawngkam le thumal hmang kawngah hin ziektuhai hi fimkhur nawk zuol inla nuom a um. Chun, ei thuziekhai a tlawm tawpa vawisari bek ennawn hlak ei tiu. Earnest Hemmingway chun ‘Farewell to Arms’ ti novel bung tawptak a ziek lai chun vawi sawmli a ziek nawn an ti chu. Eini khawm ei thusep ziekhai vawitam ennawn hnunga pe suok chauh hlak inla nuom a um. A hre bik le thiem bik ka ni naw lai zingin, thahnemngaina leiin hi thusep hi ka hung ziek a nih. Mi lungril suknat thei pal a lo um chun, thawpal lieu lieu a nih.

SUO TIENG NGHAIN

2012-02-09T01:32:00.002+05:30

-L.Keivom

Heihah! Sawl zawnga inkhi chun sak tieng nghaa tang deu zing el chu sawl a um ve tho a nih. Kum 2011 chu ka ta dingin India hmar sak tienga inzin kum a ni ringot.

Delhi nekin hmar sakah ka khawsa rawn lem ni ding a na, London-a inthoka chawl hmanga kan naulutir Margaret Thangmawi a hung tlung chun kan nuin, “Kan mikhuolpa hin in a ngaisak hman nawh; a châng po leh a mi hung kan luot hman chauh a nih” tiin a lo ripawt. Inthiem a um ve tho. In lo nghakpui ding January 8 khan nau thar kan nei leiin inzin ka hang âm deu a nih.

‘Sak’ amanih ‘Suo’ tieng hril tah laklaw si chun la hang tuihni met inla. Zo hnathlak chi bing hming an phuok laia eini rawi ngirhmun le inzawl tak hming chu Saksuok (Chhakchhuak) a ni ka ring. Sak rama inthoka hung suok vong ei ni tlat leiin ei inpêm dar pei hnunga ei hmun inson thu ei hrilna trongkam khom ieng dang ni loin ‘thlangtlak’ ti a nih. Hmar tieng amanih sim tieng amanih panhai khom hmartlak le simtlak ti loin ‘thlangtla’ ei ti vong. Mingohai, abikin America rama inpêmhaiin tronglamkei ‘westward movement’ an ti char hi ei thaw ve a nih. India rama chenghai, abikin Aryan le Dravidian hai hin ‘thlangtlak’ ti hih an nei ve naw niin ka hriet. Eini rawi chu nisa ang ei nih: sak tienga inthokin ei suok a, thlang ei tla. Ei ngaituona khomin sak ram a dap a; ei lunglengna khomin, hla phuok thiem Damhauhva dungthulin, sak ram a sun tlat a nih.

Tukram lêntu a kai chiai e, chhak tiang daiah,

Truahpui, vau kan zêm thinlai a zing riai e.

72-piengcham lawmna: Aizawlah

Kum 2011 chu ka ta dingin ‘lawmpui kum’ tia ko tlâk a nih. Ka mang khoma ka lo beisei phak ngai der lo, Tv. Lal Remruata Varte, ZOlife magazine le Zo Infotech neituin kum 72 ka suona champha chu nuoi iemani zat sengin Aizawl tlanga ropui taka lawm a hung rot tlat el a, ami barakhai hle. Chuonga lawm a hung rot tah si chun lekhabu pakhat bek buotsai chu thil thaw awm nia ka hriet leiin ka thu ziek iemani zat thlang khawm chu Mizo-Lusei le English trongin kan buoipui chûk chûk a, L.KEIVOM THUKHAWCHANG 1 kan sut a. Ka piengcham lawm ni July 15 ringotin kawpi za tam a liem duok a, thla khat sungin kawpi a sanga tiem a liem hman a nih. Remchanga lain, thralai mi thiem ruol le ram le hnam thua zalen taka inpawlna bakah Pachhunga University College-a Faculty & Students, Department of Mizo haiin thu le hla ruoi an buotsai bok a. Ngaihruina thu mawi tak el Department of Mizo-in an mi peka chun hieng hin an ziek a:

Mawlna leh atna ram tlanchhuahsan tura i beih dan te, retheihna leh harsatna luipui hrang hrang dai kai a, mihring mihrinna leh eizawnna lamah hlawhtlinna tlang i chuangchhuak thei hi kan ngaisang che a.

Chu mai ni lovin, lei taksa, sum leh pai leh tisa rothil dangte a tawihral vek hnu pawha ral ve lova, mawi taka parchhuak reng tur thu leh hla tha leh mawi kan hnam tana min hnutchhiah zawng zawngte hi kan ngaihlu takmeuh a, lunghlu tha mi angin kan vawng tha zel dawn a ni.

Leilung hunbi chhiara kum 72 ral i lo kai ta hi kan lawmpui em em che a; Zo hnam leh mihring nun tana malsawmna thlentu la ni zel turin Chung Pathianin vengin, hualhim zel che rawh se.

FACULTY AND STUDENTS

DEPARTMENT OF MIZO

Dated Aizawl

The 19^th July, 2011

Moneitu thrien dangdai

Ka beisei phak lo bok chu David Buhril nuhmei neia thrien dinga a mi fiel tlat kha a nih. Ama nek hin kum sawmliin ka pieng hmasa a, ka naupa a tlum tak nekin kum sariin a naupang lem. A hre taphot maktiin an innui. Zoram khawvela moneitu thriena thranga chuh a upa tak le mi suknui rawn tak ka ni el thei. A dangdai bok hrim a nih.

Thil dangdai pahnina chu an inneina hmun a nih. Pansak-panthlang innei an ni chu thu dang ni sien, David Buhril hai panthlang, an ram pekah biekbuk a um a, inkhawm pei naw deu chang khoma an bathlara inthoka thu hril ngaithlak phak a nih. Sienkhom, innei kha an in kota Happy Heart School compound lien le inhoi tak tuolzawlah puon in pathum zarin, nisa, thla le arasi le mi huoltu tlang mawi tak tak hai mit hmu le uopna hnuoiah kan thaw tlat a nih. December 14, 2011 khan chu khawvel khom hlimin a’n nui ver ver niin ka hriet. Samari nu kuoma Nazaret tlangval thukhawchang, “Hi tlanga kher naw khom” ti anga, ‘Biekbuk sunga kher naw khom” ti ri lungril naa hre phak lo, biekbuk sung ngeia innei hi thienghlim le felfai bik dinga ngaina khawvel thring taka chenghai ngaia chu thil dangdai a ni hrim a nih. Hieng ang thil thaw nachang hriet hih, tisa le thisen inhriettirna ringota inthoka suok chu a ni naw hmel khop el. A hrim hrim thuin, ei biekbukhai hi sumdawngna le pawl innghirnghona zun le êk thaknaa ei hmang porche nasat tak leiin, Isu ngeiin Jerusalema Tempul a hmu dan leh khan a danglam ta naw el thei. Ei sungrila ‘tempul’ hi hluo tlâka a fai le fai naw hi a nih a poimaw tak lem chuh.

Thil dangdai dang chu minit nga sung vel chauha kutinsuina tak chu kim tak sia kan zo thei kha a nih. Inneitirtu Pastor Samuel kha pa fel hrim hrim a ni el bakah a la tlangvalin a tulai bok a, innei hun hi sarmon thlak hun a ni nawzie a hriet a, a thaw ding tak chauh a thaw a, kan zo nghal a. Sienkhom, ei thil ching nghokum, mi kei châitu ni rop, sietni thratnia prokram sukporchetu, mi hrang hrangin a lang khera thu insama thilpek an inhlan hlak ruok chu sukbo hrâm kan tuma chu kan hlawsam a nih. Hi thil hi ei lemdernain a hring suok, video a hung suok hnunga ei hung uor zuol, siet-thrata ei fangson taphot sukporchetu a nih. Hnam changkanghai chun thilpek pekna pindan an ruot a, chu taka chun ei pek a, prokram a chokbuoi ngai nawh. Eini chuh mi hmua inlang phet phet ei tum leiin hi thil hi ei thaw a nih. A san bul ei sui chik lem chun Matthai 6:1-2 zawmtu dinga ngai kohran hi a kaikuongpa tak a ni el thei. Shakespeare (The Merchant of Venice) in, “The devil can cite Scripture for his purpose” (Setan khomin a trânghma kei zawngin Pathien thu a changchawi thei) a ti ang khan Isu’n thilpêk pèk dan ding a hril (Mat 6:1-2) kha Matthai 5:16 changchawiin Isu hmûr bok hmangin ei inselthlaktir dèr ngam a nih. Ei huoisen dan hi a dangdai khop el.

Eini lai innei chu “Moin mo neitu hmel chauh, a thlir angin kei khom” ti hlaa mipuiin ei inawi dup dup naw chun a kal kim loa ngaina a um. Hi innei dangdaina pakhat nawk chu inneina velvuol zoa trongtraia an khar zoin insukhlimna prokram-in a zui nghal a. Damsunga nupa ni dinga hmangaina biethu an thlungna ni a ni leiin hmangaina hla (love song) le hla lenglawngin ‘Pistol Puokruk’ le Sinlung Superstar Laltuoklien hai, Kanghlingpa Lalthankung Tusing hai, le ‘Thlawibuong Hmel thra’ phuoktu Zaituokung hai rawiin an mi’n awi a, mit le na a tlai hle. A gospel nawh ti pawl ruok chu um an tih-beiruol inkhawm ni nghal lo chuh!

Keivom Nite

Churachandpur laia an la thaw ngai zen zen lo, Keivom Nite hmang chu Sinlung Indigenuous Peoples Human Rights Organisation (SIPHRO) President David Buhril-in a nuhmei nei zo zing nawk December 16, 2011-ah a hung rot a. Thla thuma inhmain Khawmawi-Ramthar nunghak-tlangval ruolin a pawla sak dingin ka hla phuok an inchuk tlut tlut a. David Buhril hlak chu a nuhmei nei ding nek hmanin ‘Keivom Nite’ buoipuiin a a buoi lem a. A hun ding a hung hnai chun lekhabu pakhat bek hi zana tlangzar ding buotsai chu thra dingin ka ngai a. July thlaa lekhabu kan insuo ang boka ka artikul ziek sa thlang khawm, a bua siem chu ngaituonaa hung inlang hmasa tak a. Chuonga thaw chun ni sawm sunga zo el thei ni dingin kan ring a. Sienkhom, ka ngaituonaah thu thar a hung lut a, ‘IMPRESSIONS’ ti thu mal hi ka mitthlaah a hung inlang a, ka naah an ri zing bok a. Isun a zirtirhai kuomah, “Mihaiin tu am an mi ti a?” a ti ang khan, ruol thra le hmelhriet, ka ditsakhai le mi ditsaktuhaiin an mi hmu dan, an chanchin le inzomin hung ziek hai sien, chu chu lekhabuin siem inla, a ziektuhai autobiography ni bok, ka biography ni bok a ni ding a ni leiin chanchin suina thra tak, historical value insang tak nei thei ni dinga ringna a um a.

November thla bul khan a ziek nuom nuomin hung ziek dingin chanchinbu le website hrang hrangah Siphro-in fielna a’n suo chùk chûk a. Mi mal kuomah a hrana fielna ruok chu siem a ni nawh. Mizoram tienga bawzui sin chu Lala Khobung le Lal Remruata Varte mawphurnaah kan sie a; Manipur tienga bawzuitu dingin David Buhril le Buonga (Vanlalhlun Tryte) kan dande a; khawvel hmun danga mi po Lalremlien Neitham le ka kutah. Phek 150 vel bek ni sien kan ti a, a hung hmasa sa editing kan thaw pei a. December 10 hma ngeia sut zo naw chun kan chawi hman naw ding a ni leiin mi lo la nghak dinga ngenna tam tak um sien khom December 4 khan kan khar a, ni 5 khan setting kan zo a, ni 6-in final editing le proofreading kan thaw a, ni 7-ah press-ah kan pek a, ni 9 zan dar 10-ah tlangzarnaa hmang ding kawpi 50 an hung thak hman a nih.

Lekhabu puitling, phek 309-a sa, mi 40 chuong lekha ziek hieng anga inranga buotsai le sut zo hi a tam ka ring nawh. Editing hi thil hautak a ni leiin, kar hni sung chu darkar 4-5 chauh inna hun ka nei hman trawk a nih. Hi Iekhabu hi December 16, 2011 khan auto-pu, thu-mi Lal Remlien Neitham-in Keivom Nite-ah khùn takin a tlangzar a, ka lawm takzet. Mi tam tak chun an lekhabu buotsaih tlangzar dingin mi lien mi lal an fiel hlak a, sienkhom a tlangpuiin hieng mi lien mi lalhai hin an lekhabu tlangzar chu an tiem ngai naw a, an tiem hman bok nawh. IMPRESSIONS ON KEIVOM lekhabu tlangzartu ruok hi chu thu le hlaa inhnik mi, BA/MA tam tak neka hrietna tienga dangchar le phingtram nachang hrie, hrietna tui dawn zing mi a nih. A dangdai nawkna chu, tlangzartu kuoma hin Siphro-in lawmthu chanchinbua a hril hman hmain tlangzartuin Fiel a ni leia a lawmna thu Hmasawnna Thar-ah a hung insuo lem daih a nih.

Siphro buotsai Keivom Nite kha mel lung poimaw a nizie tu hin a hre chieng ei la tam naw a ni khomin, hnama ei dam khawsuok a ni phot chun, ei la hung hriet deu deu pei ding a nih. Hieng ang thaw nachang hre thei ding le hmu thei lo hmu thei dinga sungril mitvarnaa inthuoma um, tarmit ni lo ‘varmit’ nei David Buhril hin, kha hmaa thang a suohai bakah ni hni sungin thang voi hni zet suo nonin mel lung pahni a phun: December 14-ah a nakru inhmang a hmu kim nawk a, December 16-ah ‘Cultural Revolution’ kotkhar thar a hong. Hi zana hlapawla min awituhai hi tleirawl tak tak vong an ni a, an hla sak hmasa tak ‘Hmangai Nunrawng’ chu kum sawmnga liem tah 1960-a ka phuok, an nu le pahai pieng hma an naw leh an naute laia mi a nih. Hla pakhat, ‘Chantawka khuonu ruot reng chu” ti lem chu kum 1957-a Rengkaia ka phuok, a thu kan hriet suok zo ta naw leia kum 2003-a Khawmawi-Bethela ka phuok sap a nih. Kum 54 hiel upa a ni tah. Thrahma tienga min awitu Ms. Vanlalhriet hai, Lalzarlien Zote hai, Zaituokung hai, Kanghling Pa Lalthankung Tusing hai khom hi zan hin chuh an vul thar a, an hla sakhai khom kum 50 vel liem taa ka phuok deuh vong ni sien khom zani ta phuok ang elin an sukthar a nih. Ka nu thi trum, 1971-a ka phuok ‘Ka chûn nunnem’ ti hla hi mawi tak taka sak an tam taa chuh ka lung tlu zâna sak hi an la um naw a. Hi zana Jenneth L.Varte-in a hang sak zet chu lung a runin a tlu zân a, “I pian a tlai, kei ka hma si a..!” ti hlaa sunzom tak ei nuom el a nih. Pholeng Kids haiin ka hla phuok ‘Thrangruolin’ ti hlaa Hiphop dance an hang thaw chu 1990-a Chicago khawpuia Blacks hai buzawl kotthler kan hraw lai a min hriet suoktir rum rum.

Cultural Mapping

Kum 1894-1928 sung khan George A. Grierson, ICS inrawina hnuoiah British-haiin India lien lem, Afghanistan ramria inthoka Burma le Thailand inramrina inkara cheng, an ram op sunga trong hrang hrang suina an nei a, chu trong suipui chu a hmingah Linguistic Survey of India ti an inbuk a. Hi truma eini tlangmi, abikin tronga sul khat kuol pawlhai chu Tibeto-Burman Group hnuoiah mi sie-in, kum 1904-a sut Linguistic Survey of India Volume III, Tibeto-Burman Family Part III, Specimens of the Kuki-Chin & Burman Groups-a chun trong hnakhat hnuoiah a mi khum khawm a. Hi hnung hin hieng anga chipchiera trong suipui hi thaw a um ta nawh.

Kum 1991 intiempui khan India ramah ‘mother tongues’ an ti 1576 le ‘other mother tongues’ an ti 1796 an um a. Hi hnung hin, kha hmaa Grierson rawia suipui an nei ang kha kum 2007-2012 sunga Central Institute of Indian Languages, Mysore inrawina hnuoia thaw nawk dingin thu a um a, India sorkarin Rs. 2.8 billion a sangson a. University 54 hnuoiah investigator 2000 le linguist specialist 10,000 ruoia thaw ding a nih. Sienkhom, kum 2010 khan hi prawzek hi bansanin, NGO pakhat Bhasha Research & Publication Centre hnuoiah Himalay tlang le a se vela hnam chenghai trong suina nei dingin an ti nawk a. Hi khom hi trong hrang hrang hmanghai lai intibingna le inchungdelna lungril sukpungna ni thei dinga ringna a um leiin sorkarin an lìmsak naw a, hma la mumal thei loa um a nih. Hi ngaituona sunga thil inphum hi a nih thil trium chuh. Chok tho loa ngai thra deua inumtir a, damtea chim ral an ni hnung chun an chanchin sui ding um ta naw ni a, sui khom ngai ta bok naw nih ti thukhawchang a hoi khop el.

Chuong ang chun a kum telin tlangmihai hin ei hnam ro hlu, ei thu le hla hlui hai, hnam dan le dunhai, ei trong hai, hnam lam le incheina hmangruo hai ei inhmang pei a, ni tina ei kawl le kienga um hnam var lem le hrat lemhai chim pilin ei um mek a nih. Sîr tinah thil thra le thil thra loin an mi rùn a. Mingohai kalchara thuom tah sakhuoin eini insung ngei khom kum za liem taa inthok khan a mi hung rûn a, Jordan vadungin ei Ri Dil chu damten a hung chim pil tiel tiel a, a chim pil inthuk po leh ei lallukhum sa sot dinga ngai pawl, ringtu mitdel ei hung pung a. Saiâr (ostrich) ang elin, tritna a hung pha leh pilvutah lu ei phum a, tritna ka hmu nawh ei ta, ei sakhuoin iengkimah mi sanhim dingin ngai thla rok a, sandam ei nit a chun him dinga inngaina a um a, thlaraua sipa ei inngai lai tak dam hi ei hnam ei zor hun a ni thei ti dam hih ngaituo nachang hre lo ei tam. Hnama ei dam khawsuok naw chun ei sakhuo khom a dam khawsuok thei nawh. Pastor Thangngurin, “thlarau le taksa inkal loin” a lo ti umzie hi hre fiea inngai, sienkhom kalchar le sakhuo inlaichin dan hre chieng si lo, iengkim thlarau thila la vong tum pawl ei um.

Hieng thil hi ka lungkhamna kum sawt tak a ni ta a, B.A ka zo hlima Institute of Tribalogy indin dan ding ka phan lai khoma ka ngaituona hluotu tak a nih. Chuleiin, Gospel Zabili ei hmang zoa thupuia ei hmang ‘hma tieng panin’ ti hi a taka sukdikna kong pakhat nia ka ngai chu Grierson rawia Linguistic Survey an thaw kha sunzomna dingin Cultural Mapping tran chu thaw makmaw-ah ka ngai a. Chuleiin, trum hni zet Delhi-a inthokin India hmar sakah ka hang inzin a, Old Kuki Group-a mi Sagang Area-a unau Kom-Rem hai le North Tripuraa unau Darlong hai le Hallam Group-a hnam hrang hrang hai lai David Buhril, Vanlalhlun Traite (Buonga) le Lal Ringum Khawbung hai thruoiin sum tam tak sengin kan inzin a, preliminary survey kan thaw a. Hmun hrang hrangah survey mi thawpui dingin an mi thiemhai kan man pei a. Hi thil hi ka thaw san chu, zan khat mitsim khom lo tuok inla, cultural mapping thaw dan ding inchuktir a, ka um ta naw hnung khoma hma an lak dan ding lampui satpui a nih. Hi prawzek hi bawzui ding chun crore tam tak seng a ngai ding a ni leiin, sorkar-ah thrangpuina sum hni dan ding ngaituo mek a nih. Zoram khawvel hi a thu el ni loa a taka a la hung piengna ding chun thu le hla tienga inunauna suknghet pei a ngai. Chu dinga a kongpui pakhat chu Cultural Mapping ahmatiema thaw a, a remchang hun le hmunah Cultural Meet nei hlak ding a nih. Chu sirbi pakhatna chu kum 2011-a hraw tran a ni hih lawmum ka ti takzet.

Tiemtuhai po po kum thar 2012 chibai ditsakna kuta chelin ka buk cheu. (December 31, 2011, Delhi)

TIPAIMUKH BIEL M.L.A NI LANG IEM THAWNG KA TA ?

2012-02-09T01:31:00.002+05:30

Ziektu:L.Biekrawn Tuolte

New Delhi

12 Tuolbuol, 2012.

Tipaimukh Constituency hi ka piengna le seiliena ram tleng a ni leiin ka hriet chieng a. 1970 bawr vel inthawk MLA neiin sorkarah palai ei tir \an a.

Kum 40 nekin a tam tah. Ram siem ding le sukhmasawn dinga hotu ei nei an ni tawl a.

Ram am annawleh hnam a pawimaw lem ti ka ngaituo rawp hlak. Ram nei lo hnam ropui le lekhathiem tam tak an um a. Chuleiin ram nekin hnam apawimaw lem. India rama ding chun hnam binga ram nei si lo chu Parsi hnam an nih. Miropui le thilthawthei an tam. Europe le America rama ding chun Judahai an ni bawk. Chuleiin, din takin ei ngaituo chun ram hi iengbek a ni nawh. Hnam le mimal a pawimaw a nih. Ram lien tak nei si a, enkawltu dukdak naw chu umzie bo a nih.

Vawisuna MLA pakhatin hmasawna kalbi a rem chu ka dem nawh. Kum tam dai naw nih. Ka manifesto ruokchu suon tam dai ding a nih.

Sap \awngin election manifesto an tih. Political party/Candidate pakhatin a tling pha/ vote tling an ni pha thaw ding iemani zat an zam hlak. Chu sin thaw ding an zam chu manifesto an ti hlak. MLA ni lang ram siem nekin hnam siem hmasak tum ka tih. Kha hma deua ei MLA popoin ram siem an tum a. Mihriem siem\ha loin ram siem thei an nawh. Ram nekin hnam a pawimaw lem sih a.

Tipaimukh biela ka mi-le-sa hai hnam ropui le thilthawtheiin siem ka nuom. Chuleiin, a hnuoia hi ka manifesto, mipui hriet dinga ka tlangzar an nih.

PAKHATNA:

MNF vanglai vawikhat kan khuoah(Patpuihmunah) ser bil nei po kuoma inthawk ‘sawmapakhat’ dawl an tum a. ‘Nangni chan a um nawh’ an tipek a. Anleh, sawmapahni ’ an ti nawk a. ‘Khawm chu nangni chan an nawh’ an tipek nawk a. Iengkhawm an pek nawh. Khaw mipui chungah ienkhawm an law ngam nawh. Mihriemin ei \i tak hi ralthuom ni loin hnam/ khuo/ram inthurol a nih. Kha laia MNF hai kha vawisuna helpawl ang bawkin ralthuom an nei. Hi lai hun hin kan khuo chu kohran pawl pahni(Mission le Independen) chauh an nih. Khuo inthuruol an ni leiin MNF khawmin an kut an lang ngam nawh. Tuhin kan khuoah kohran pawl 6/7 vel a um tah. Hel pawl kutpar zat tling loin an nuom danin sawisa thei an tih.

HRF kutpar zat tling loin Senvawn(Senvawn In 300 neka tam an ni awm ie) mipui an hnawtzamin an sirde san ka ngaituo changin mipui inthuruol naw lei ni ngeiin ka hriet.

Hmar biela chalranghaiin ei nunghakhai an sawisak khawm ka ngaituo bawk. Kan naupang lai chu Parbung le Hmarbiel chu mihuoisen tamna niin an hril hlak a. Khawlam an um zo ta lie ? Mihuoisen khawm hnung tieng phatsantu(betray) an um pha an inlang ngam ta nga lem ie. Hnam le khuo an inthuruol naw chun mihuoisen khawm an suok ngai nawh. Ei inthuruol naw chun hmelma khawm zalen takin ei ramah an che ngam ding an nawm.

Mipui/Hnam inthuruol naw a huoi an um ngai nawh. Tipaimukh biela Hmarhai dawikawlawkna san ka ngaituo chienga. Inthuruol nawna lei a nih. Hnam le khuo inthuruol thei loa siemtu chu kohran pawl tam taluo lei a nih. Hnam hi a dawi reng annawleh a huoi reng an um nawh. Hnam Inthuruol lo rengreng a huoisen an um ngai nawh. Hmelma tlawmte hmaah an tlansie zie hlak.

Ka mipuihai dawizep dinga siemtu chu kohran pawl ni lo maw ? Dawikawlawkna le ramhuoi hi laibung ni lo maw ? Kohran Pawl tam taluo leiin ramhuoi thlarau ei kolut a ni lem naw maw ? Kohran pawl hi Setanin a hmang ni lem lo maw ? Ngaituo a sei ngei.

Naupang chite ka ni lai khan Kuki leh ei buoi a. Ka hrietna popo fawmkhawmin hun ka suirkir a. Nuhmei le naupang hmelah \itan hmel reng ka ngaituo suok nawh. Asan ieng dang um thei a tim. Ram mipui inthuruol hun ni lo maw ? Tuhin Dimasa hmarchadeng khawp chauin mi hung run hai sien ei ram ei tlansan el naw ding ?

Chuleiin, Hnam suksetu le mipui le khuo dawikawlawka siemtu nia ka hriet chu pawl tam taluo a ni leiin ka bielah kohran pawl pahni neka tam ka remti nawh.

Kohranhai sulhnung ka sui a, NEIG buoi zo 1930 le 1960 kar hi biel ropui hun le ei hmasawn hun a nih. NEIG buoin kohran mipui a sawp hnung, mimal tlawmte chaua inthawk pawl thar hung ngir Independen a a nih. (Manya enkawl) Hi kohran hi mi tlawmte chauin an chelngir a.

NEIG Missionin malsawmna tam tak keisuok sienkhawm kohran pawl buoi leiin hmabak thaw lo tam deu a um. Hmar biel, Vangai biel le Kailam chung khawm chanchin \ha var hmangin an kap eng zo nawh. Independen a ngira inthawk ram thim nasa takin an kap eng bakah hla ropui tam tak ei nei pha tah. Iengkim din takin ka thlir a. Mission ( NEIGM) le Independen kohran hi ei rama dinga Pathieinin a phun ni in ka hriet.

Pathienin ka biela dingin kohran pawl tam deu a a phun ka ring thei nawh. Biekin pakhata inlawi khawp chauh, biekin tam deua inlawi dingin Van Pathienin a kohranhai a vuokdar ka ring thei nawh.

Ka biela dingin evangelical hming ka ditsakpui nawh. Chuleiin, EAC hming hi thai bo ka tih. Atira hming, a pa hming phuok, NEIGM hming inputtir nawk ka tih. EAC hming ka dehawn hmasa tak ding a nih. NEIG Mission hminga mi hmasahaiin ramthim an ner hun kha an ropui hun nih.

Mihriem ei var pha hming thar nekin a hlui an nganain an dit lem. Entirna chu Bombay aiah Mumbai, Orissa aiah Odisha Bangalore aiah Bangaluru ti le a dang dang hril ding a tam. Ei mawl hunah chu hming thar le sap rawng kai ei dit hlak. Chanchin |ha ei ringa intahwk kum zakhat ei hmang zo tah. Hming hmasa nei nawk/kei tho a hun tah.

ICI chungah khawm ka kut thlak ka tih. 1960 hnunga pawl le kohran hming hrim hrim ka phawi vawng ding a ni leiin ICI hming khawm him naw nih. A tira mi hmasahai hming phuok Independen (Manya Enkawl) hming inputtir nawk ka tih. Chuleiin, a nu le pa hming phuok Independen hming pe nawk ka tih. Hi zoa ka kut tuor ding chu 1960 hnunga pawl ngir hrimhrim a zung pumin phawi hmang vawng ning an tih.

NEIGM (Mission) nuom naw chu Independen ah denglut ka ta; Independen nuom naw po NEIG Missionah dengkhawm ka tih. Thlirna tuker dangdanga inthawk le Enremna khawl hmangin ka thlir hnung khawmin ka biela dingin Pathienin kohran pawl pahni neka tam a phun ka ring thei mama nawh. Ama kohranhai vek vuokdarna dingin pawl dangdang Pathienin a phun ring a um thei nawh.

Mihriem lungril siem ngil ka nuom leiin innghirnghona, mipui dawikawlawka siemtu le u-le-nau kara do-le-ral siemtu ,1960 hnunga pawl hming hrimhrim phawidawk chu ka manifesto pawimaw ning a tih.

A chunga ka manifesto hi thawk-le-khatin hmang thei ni kher naw nih. Vawisuna hnam dawikawlawk, sienkhawm zinga \hangtharhai hnam huoisena siem ka nuom leiin thaw makmaw ning a tih. 1960 hnunga kohran pawl lut hrimhrim thaibo vawng ning an tih.

PAHNINA:

A dawta ka ziekfung tuor ding chu kristien hla bu (Sap hla inlet) hi ni nawk a tih. Mani zakuo/thuom dehawna Saphai zakuo/thuom inbela Pathien biekin lut ka remti ta naw ding a nih. Khuo sunga kristien hlabu,Sap hla inlet rengreng chu dawl khawm vawng ding le biekin kil khata siekhawl ning an tih. Kristien hla dit an um chun hla bu chawi loin biekinah zawng ding a nih.

Mipui mitdel, mani nina hmu lo, an mit sukvar a ngai ding leiin tuol\o hlahai lallukhum inkhumtir ka tih. Mani nina ang charin ka ram mipuihai chu Pathien hmaa inlang dingin thu insuong ka tih. Mani tuol\o hla chauh biekinah hmang ka phal ta ding a nih. Ram tleng ka siem hmain mihriem lungril tleng hmasa ning a tih. Hi lei hin mani nina ang chara Pathien hmaa inlang chu hril uor ning a tih.

Khawvel hnam laia depde chu ei tuolbawmhai (chalranghai an ni awm ie) an nih. A san ieng dang a um nawh. Hindu ni lo, Hindu sakhuo an phun lei ni lo am a ni ? Kum zabi sawmpariet lai khan Bengali pachal pakhatin Hindu sakhuo an zuitir lei ni lo maw ? Mani ni nawna ni tum hi hnam depdena bul ni lo maw ? Chuleiin, MLA ni lang ka thu puong ding chu khuo tinah mani nina ang chara siemtu chawimawi le biek ni tang a tih. Mani ni nawna ni tum hi hnam lepchie le depdena bul ni lo maw ? Sap ni si lo Sap hla inlet kum tam hmang inla khawm ei nunphungah (culture) kawpdet ngai naw nih. Mani ni nawna ni tum hi ei depdena bul ni lo maw ?

Hmarhai depdena bulpui ka vawikhat thaiin thaihmang ka tih.

PATHUMNA:

Sikpui hi khawtinah hmang nawk dingin kei tho ka tih. Mani khuo sengah Sikpui Ruoi keitho nawk ning a tih. Sikpui chungchangah ‘Research’ thaw ding lekhathiem ruoi ka tih. Khuo tin mani remchang ang peia hmang dingin thu pek insuong ka tih. Sikpui kan inser hmaa Delhia ka hmathlir (vision)angbawka hmang/inser dingin khuo tinah thupek insuong ka tih. Tulai khawvel intlansiekna pakhat chu inkhel a ni leiin ka mipuihai chu khawvel hmasawna hnawt phak dingin siem ka tih. Chuleiin, Inkhelna chitum tumin Sikpui hmang \an ning a tih. Khaw tinah futbawl zawl siem \hat ngai a tih. Taksa thunun le insawizawi hi hriselna le dam sawtna a ni leiin hi thilah ka mipuihai chu an hnufuol ka remti nawh. Ram changkang thawthei chu an thei ve ngei ding a nih. Nunghak le naupang khawmin inkhelna chi tumtum an thiemin an hriet ve ngei ding a nih. Mipui inlusu kei thona dinga ka hmangruo vilik ding chu Sikpui a nih. Sorkara inthawk inkhelna thuom an dawng theina dingin khuo tinah Sikpui Sporting Club indin tir ka tih.

Sikpui hming pathum incherpek ka tih. A hmasa takin ‘Sikpui Inkhel’ ti ning a tih. Inkhel dan dangdangin inser ni phawt a tih. Inkhel zo hapta khat velah Ruoi ropui takin hmang ning a tih. Chuchu ‘Sikpui Ruoi’ an ti chu a nih. A tawp zan biekinah hla ruoiin zo ning a tih. Chu hming ding chun Sikpui Inawi’ ti ning a tih. Biekin sungah Pathien hlahaia zo ning a ta; puo tieng ruokchu sai hlahai le a dangdangin hmang ni lem a tih.

Sikpui Sporting Club huoihawtna hnuoiah khuotinah tienlai lam khawm siem\hat (modernisation) ning an tih.

Tipaikukh a Hmarhai aidentiti inhmang hi ka vawikhat thaiin kei tho ka tih.

PALINA:

Pi le pu thuvar ‘mihriemin an tam an dampui a; ngahaiin an thipui’ti changchawi ning a tih. Chuleiin, ka bielah khuo khatah In 50 hnuoi um phal ni naw nih. Mi tlawmte chauh hi hmelma lakah himna a um naw a. Zu le va laka thlai khawm a him nawh. Kangmei le sietna dangdang laka inthawk mi tlawm taluo chu an him nawh.

Mihriem siem\hat dingin sikul \ha le damdawiin \ha ei mamaw. Mihriem tlawmte, khuo khatah In 20/30, mihriem zakhat vel chau umna khuoah sikul \ha le damdawiin \ha siem a harsa. Sorkar naver phak dingin rihau nei khawp mihriem umna khuo a ngai. Chuleiin, khuo khata In 50 neka tlawm chu hmun khata karbum ning an tih.

Mani umna zirin mihriem lungril a chinin a lien hlak. Khuo chite, mihriem tlawmte chauh a inthawk lungril zau tak nei suokin pieng ngai naw ni hai. Khuo chite, mihriem tlawmte umna a inthawk lekhathiem tirsuok ngai naw me nih. Ka mipuihai lungril zau dingin ka dit a; hmathlir sei tak nei dingin ka ditsakpui bawk.Chuleiin, khuo chite chauah tukhawm intawm lo dingin hril uor ning a tih.

PANGANA:

Ka biel hming dingin pathum lai ka dit a. Chuhai chu: Parbung, Ruong-le-vai le Sinlung an nih. Khawvel mihriemin ei hnawt le duthusam chu aidentiti ni lo maw ? Tipaimukh hming hi biel mihai leh inlaichinna a nei naw leiin ‘constituency’ hming tleng dingin \hang khaw nghal ka tih.

PARUKNA:

Tipaimukh Dam hi kum 30/40 hnunga puitling dingin lo ngai ta inla, hi hma hin Vangai tlangdungah lampui Timaimukh insuntir ngei dingin \hang khaw bawk ka tih. Ka mipuihaiin Dam puitling an hmasuon thiemna dingin khuo tinah Seminar neipui bawk ka tih.

Nagahaiin an nuom hunhuna Manipur mihai hnuk an rek nawk ta nawna dingin Meitei MLA popo hrilvar ka tih. Tipaimukh via Vangai tlang lampui siemfel dingin \hang khaw bawk ka tih.

INBUOTSAI LAWK

2012-02-09T01:30:00.003+05:30

-L.Keivom

Our plans miscarry because they have no aim.

When a man does not know what harbor he is making for,

no wind is the right wind.

-Seneca (4 BC-65 AD)

Ka penson-a inthoka kum sawmna chu May 2012 hin ka suo ding a lo ni nawk der el tah. Hi sung hin ni tin darkar 12 vel lekha dang dang buoipuia ka buoi leiin tiem dinga lekhabu thra le puitling ka’n chawkhai chu nuom anga tiemna hun ka nei hman ta naw a, chu chu ka lungkham pakhat chu a nih.

Kum 1970-a Foreign Service ka zoma inthoka kum 2002 May-a ka penson chen khan dannaranin ni tin chanchinbu le magazine hrang hrang ka tiem bakah kar tin lekhabu thra pakhat bek ka tiem zo hlak a. Ka penson chara Baibul inlet ka trana inthoka ka sut zo chen, kum 2002-2007 inkar ruok khan chu Baibul le inzom lekhabu naw chuh ka tiem hman ta naw a ni tak a. Chu chun kakhawk a nei naw thei nawh.

Kum ruk zet bu le hme pangngai ringa khawsak ang a ni leiin nunah siksawina a siem a. Ei thu bi rawnin a tukvera inthok chauha thil min thlirtirin, thu hrim hrim hi translator mita inthokin a min khìtir a, thu hril le zieka trong dan indik lo ei hmang po po hin ni dang nekin nä a sukkham zuol a, ning a suktel a, lungril a suk-taliban leiin kha hmaa ei ngai zam el khom kha ei ngai thei zing ta naw a, a buoithlak khop el. Thil indik lem nia ei hmu khah zawlneihai angin huoisen takin hang puong suok inla, mi lawm le inpâk nekin mi hnâm le nghok le theida ei hlaw lem bok si. Indikna Pathien tri loa inzor ve a, laiking anga hmun khatah or insen a, hmun dangah indum a, mi lawm zawng ringot hril tuma indaw phar ve nuom a um hiel chàng a um hlak. Fiena chi khat a nina chin a um. Amiruokchu, Isai anga

Felna chu hla takah a ngir a,

Thutak chu kotthlerah a tlu a,

Indikna a lût thei ta nawh.

A nih, thutak a’n leng ta naw a,

Thil thra lo hnawltuhai chu,

Sa anga pèlin an um pei.

Chuong chu Lalpan a hmu zing a,

Indikna a bo tah leiin,

A lung a awi thei ta nawh

a ti anga puong ngam ve chu, mi hmai manin man naw inla, Socrates hai anga thudik thi chil huoma thrang lâk ngam chuh, Pathien tritu le inzatu ta ding chun a trûl bok si. Khikhawk tak a nih. Mi lawm zawng ringot hril tuma inkhap le infân hi nawchizorna chi khat a nih.

Kum 2012 ruok hin chu ni dang ang boka lekhabu a tam thei ang tak tiem dingin lungril ka siem a. Kum sawmhni lai liem taa ka lo tiem sil tah, THE ODYSSEY READER: IDEAS AND STYLE (1968) ti, Genevieve B. Birk le a pasal Newman P.Birk buotsai, literature khawvela ziektu hmingthang mi 91 lekha ziek, College-a inchuk dinga an thlang khawm chu zal pumin zan tin darkar 1 vel ka tiem tran nawk a. Ngaituona ril chok tho thei le thu ziek tienga kal chawi dan ding kawkhmu thei lekhabu a ni leiin, kum 1970-76 inkara Delhi tlanga thu le hla phuok le ziek tienga keima tawka ka’n hmang nasat laia ka lo inbuotsai ve dan dam a min suikirtir a, lung hlui a sukleng vong vong a. Chuong lai chanchin chu a hlawkpui an um takduoiin tiin tlawma zawng hang phor lang vak ka tih.

LALNUNNEM (1974)

June 16, 1974 zan khan External Affairs Hostel, Delhi-a ka um lai zankhuoin tienami ka ziek a, a tienami hmingah LALNUNNEM KA NGAI EM CHE ti ka hmang a. Kha hma, 1960 bawr vel khan ka ruolpa Darkamlo Faiheng chun hla inlâr tak el a phuok a, a thunon tlar hmasa takah ‘Lalnunnem ka ngai em che’ ti a lo hmang ta a. Nuhmei a hung neia an naulutir a pieng chun a hmingah ‘Lalnunnem’ ka sak a. Ka tienami ziek a hung inlar hnung hin Darkamlo hla phuok khom hi ka phuoka ngai le hril an hung tam a, “Ka phuok a’n nawh. Ka ruolpa Darkamlo phuok a nih” ka ti khoma “Khai, i phuok a ni khah” mi la ti trawk trawk khom an bo nawh. A hnunga ka tienami ziek hi Mizo-Lusei tronga inlet a, ‘Bawktlang Thawnthu’ ti lekhabua a hung suok ding khan ka ruolpa Siamkima Khawlhringin, “Shakespeare khomin a drama ziekhai hi hming tawi té tè an bùk a, a mawiin a olsam lem a, chuleiin ‘LALNUNNEM’ ti lem ei tih” ti a rot chu kan pompui a. Kum 2001-a ka tienami ziek 5 le thusep ziek 3 lak khawm, NUN RAM ti lekhabu kan suta khan ‘LALNUNNEM’ tiin kan hung sie tah a nih.

Hi tienami hi tu chena tienami ka ziek tah laia hril hlaw tak a la nih. Threnkhat chun ka chanchin an sawn a, lunginsieta ka darah min bât a, mi trap khum khom an bo nawh. A ziektu hnuk ngei khom hi a suk-ulh chang chu a um ve tho a nih. Ka hril nuom tak ruok chu, hi tienami buotsaina ding hin kum tam tak a lak thu a nih. Hmun pahnih, Pherzawl tlang le Senvon tlang besana phuok a ni a. Senvona thil tlung hi a tak taka kum 1958-a tlung a nih. Kum 2007 October 12 Zirtawpni tuk khan Senvona kan inzin trumin Hrangthangvung le David Buhril thruoiin Senvon High School tuola kum 19 a nia thi Darkhawlkim thlan chu kan va dap suok ngat a nih. Hi chanchin hi KA NUN ti phek 110-123 ah a chuong. Hi Senvona thil tlung hi Pherzawlah ka hlu lut a nih. Ka ziek hmain a changtupa U Rokung hi a chanchin ziek dingin ka ngen a, chu a thil ziek chu besana hmangin hi tienami hi indin a nih. A lung nona tieng ngot a mimirin an khukpui leiin, tienami dangdai tak el a nina tieng hi tiemtuhaiin an hril ka la hriet ngai nawh. Sir hrang hranga chîk taka bitu an la um naw lei khom a ni el thei.

Tienami dangdai a nina pali chauh hang hril thuok thuok ei tih. Pakhatna, dannaranin tienami hrim hrim hi suol le thra indona a ni deuh tei. Thra le suol an indonaa chun suol chu iemani chen dingchang le hlawtling angin inlang sien khom, a tawpah a tlawm hlak. A tlawm naw chun tiemtuhai lung a dam thei nawh. Sinema ei en khomin, mi suol kha mi thrain a tawpah a hnè naw chun a entuhai lung a awi thei nawh. Hi tienamia ruok hin chu suol le thra indona a um nawh. Chu chu a dangdaina pakhat chu a nih.

Pahnina, tienami reng reng tiem sukhniktu le hma tienga mi thruoi peitu chu thil hung tlung dinga ei beisei, a tlung dan ding ruok chu ei hriet el thei si lo thil chu a nih. Hriet vak ei chaknain a mi tur ut ut leia tiem zui pei ei nuomna boruok hi Saptrong chun ‘suspense’ an ti a, chu chu Oxford Dictionary chun “a state of anxious uncertainty or expectation” tiin a hril fie. ‘Khailaka um’ ti inla, a kawk hnai el thei. Chu chu ‘khailak’ umzie dang, entirnan ‘sin khailak’ (chatlak, inzawm lo, hun kar awl tla zep) ti le ngai pol ding ruok chu a ni nawh. Hi tienamia ruok hin chu ‘suspense’ ding a um ve nawh, a san chu a tawpnaa intran, a trannaa tawp a nih. Tienami hrim hrim chu a tawp dan ei hriet hnung chun ei tiem inhnik tak tak thei ta ngai nawh. A tawp dan hriet hnung sia tiemtuhai tiem inhnik dinga tienami ziek chu chona namen lo a nih. Chu chu hi hi tienami dangdaina chu a nih.

Pathumna, a hmaa ei hril tah angin, hi tienami hi tienami inbiel, a tawpnaa intran a, a’n trannaa tawp a nih. Tienami inbiel dang, a hung intrannaa tawp, Chemtattepu tienami ei nei a, amiruokchu, hieng tienami pahnihai inbiel dan hi hnuoi le van anga danglam a nih. Pakhat chu thudik tak zong suok an tum leia inbiel a ni a; pakhat ruok chu a ziektuin chona nasa taka a ngai sitail hmanga a ziek lei a nih.

Palina, hringnun hi tak ram le suongtuona rama leng a ni a, mi tam tak chu tak rama nekin suongtuona khawvel, mang ramah ei cheng rawn lem. Hi tienamia changtupa hi a ngaizawngnu pùr inrim taka kum sawm lai lo do tah, a khawnawtin mi invet ang hiela an sie tah ni sien khom, ieng lai khomin tak rama cheng a ni le ni naw fie dingin a sie le thra hrietna fîm takin a la hmang ngat ngat a nih. Chu hrilfiena chu zan khat thilthua a mit voi thum zet a nuoi thu le a nuoi zo zata “Aw, ieng dinga ka mit ka hang nuoi kher kher am a na! Mi rimsi ka va ni ngei!” a ti zie hi a nih. Sakhuona khawvel, thlarau Kanan rama tui hlim cheng tam tak hin tak ram hmasuon dinga kir nawk hi an rin zuol.

Ka hril nuom tak lem chu ka tienami tawi ziekhai nek hmanin short story ziek dinga ka’n buotsai lai chanchin a nih. Kum 1958 khan a thlarau a thok ve tlat chu ni naw nim, ka tienami ziek hmasa tak ‘Sangi le Thangsiem’ chu a hung suok a. Kum 1959 khan ka ruolpa Khamlienin Kangreng tieng a chawi leh a sukhmang song a. Ka la hriet suok thei po chu drama-a inchang dingin a dialogue ka ziek sok sok a, 1962 October a Sielmata HSA General Assembly-ah kan inchang ve mop a. Kum 1964 khan pi le pu hla le inzom tienami tawi ‘Hranchon’ le ‘Zawllai’ ka ziek nawk a. Tienami puitlinga siem hman loin, lekha inchuk le competitive exam bei dinga inbuotsaia ka buoi leiin thu le hla phuok tieng ka chawlsan a. Kum 1970-a Indian Foreign Service ka zomin Hmar thu le hlaa a tllaksam tak nia ka hmu chuh tienami (novels & short stories) niin ka hriet a, chu baksamna chu phuhruk dan ding ka ngaituo a. Umzie nei deu hleka tienami ziek dan inchuk chu thaw makmaw thil nia ka hriet leiin Saptronga ziektu hmingthanghai tienami ziek, a bikin short story ka hmu thei taphot chu Delhi-a British le American Libraries-a mi hawin ka tiem a. Abikin W.Somerset Maugham ziek le Indian writers le Russian writers hai ziek ka thlur bing zuol a.

Hi ruola thil ka hmu chieng èm ém pakhat chu, tienami ziek ding chun ei ziek dinghai ram le hnam chanchin, abikin an socio- cultural history hriet chieng a trulzie le writer ni tum chun mani sor khop sociology le anthropology tieng hrietna khom nei sa a trulzie ka hmu suok a, kum hni zet chuong sabzek pahnihai chu lekhabu thraa an hril ka hriet taphot library-a inthoka hawin ka thlur bing a nih. Hieng lai hun hin ziektu hmingthang Larry Collins & Dominique Lapierre kha an hung suok a, histawri sirsana hmangin lekhabu thra tak tak an ziek a, O Jerusalem (1972) an ziek hnunga 1975-a Freedom At Midnight an hung insuo lem khan chu Indian Sub-continent chu an nghor nghing takzet a nih. Hienghai thil ziek dan hi ka rîl rem zawng tak a ni leiin, a hnunga novel le short stories ka ziek tam lem chu histawri besana bawl deu vong a nih. Chu entirna thra tak chu Zangkhaw Bungbu a ni ka ring.

Hieng mi lekha ziek ka tiem hai hin nasa takin a mi thrangpui a, tukver hrang hranga inthoka thil thlir dan a min chuktir a, ngaituona kholbing a mi thriekpek bok a. Chuong chu a ni lai zingin fimkhur a ngaina tam tak a um. Mi thu le hla ziek thra tak tak ei tiem pha leh mani insit a, mani inngaihnuoi phanaa hmang pal a ol a, chu chun phùrna a sukzuoi thei leiin fimkhur a thra. A thu ziek dan kawpi a, an thlek dán dàna thlek a, mani thlek dan bansan pal thei a nih. Chuonga i thaw chun i nina tak, Pathienin nang kha nanga a siemna che, mi bik i nina, i personality chu inhmangin, lemchang bawmah tlu lut i ta, i hlutna bo a tih. Thil ziek hi mani nina le ei sung rila ei thil pai ei puong suokna, Saptronga ‘personality projection’ a ni a, ei thlir dan, ei hmu dan, ei lungril a them dan, mani trongkam hmanga mani bau le rawl ngeia puong suok ding a nih. Thil thra inlâk ton hi khawvel dan a ni a, sienkhom mani thratpui chin ding chauh làk a, ei nina hlàn le hlie thei thil, ei sietpui thei dinghai chu hnawl thiem a thra.

Duthaw deuin zuk hril sei met inla. Ei Prime Minister hmasa tak Jawaharlal Nehru kha politician a nina nek hmana histawrian le ziektu ropui a nina khah ka ngaisang lem a. Saptrong hi thiem taktea a thiem el bakah a ziek thiem bèk bék el a. Kum nga chuong zet lung in (jail) a inthoka a naunu Indira Gandhi inchuktirna dinga khawvel histawri chanchin a ziekpek, a hnunga lekhabu pakhata an sut, Glimpses of World History dam hi classic literature a tling takzet a. MA (History) ka’n chuk nekin hi lekhabu ka tiem hin hrietna zâu lem a mi pekin ka hriet a, ka hlawkpui lem bok. A lekha ziek ka tiem nasat lai chun Saptronga lekha ka hang ziek hrim hrim hin ka hriet naw karin ama thlêkin ka lo her hlak a, ka ngaituona le kut a lo thruoi nasa hle a nih.

Hi taka inthoka thil inchuk ding chu lekhabu thra le thu ziek thra tiem a poimawzie a nih. Naupang tiem ding lekhabu thra thlang le inchawkpek dam hi nu le pa ta dinga sin poimaw tak a nih ti dam hi hriet a trûl khop el. A san chu ei thu le hla tiemin a mi thruoi nasat lei a nih. Uong thu chang naw sien, ka nauhai hi naupang tè an nia inthoka lekhabu thra le chanchin bu thra tiem thrang an ni a, Saptrong indik ngot inchuk an ni leiin lo thei loin an hung thiem suok el a nih. Eini rawi Hmar trong ziek indik thei ei vang tah hi a san bulpui kum tam ka sui hnunga ka hmu suok chu ei Baibul trongin a mi thruoi suol lei a lo nih. A mi thruoi suol a nih ti ei hriet thei naw chu thu khat, thu ei hril amanih ziek amanih changa standat deua thaw ei tum pha ei Baibul trong thlêk bokin ei thaw nawk el hlak el hi ei bo inthukzie tar langtu a nih. Insil fai tuma vok chu vok buola bok a lut nawk ang char hi a nih. Chu chu a theida nuom pawl chun theida rek hleng an tih. Thutak kotthlerah a tlu a, indikna a lut thei ta nawh ti dam hi eini ta ding ni loa mi ta dinga ziek ei sawn tlat an nawm! Ei Baibul hmang lai Hmar trong le inlet indik lo po po hai hi Rengreng vadungah ei phum hmang ngam hma chun Pathien thu him ngai naw ni a, ei trong sukhmasawnna dinga thrangmawbawk ni zing bok a tih.

GITANJALI (1973)

Rabindranath Tagore-in Bengali tronga hla 103 a phuok lak khawm‘Gitanjali’ chu ama vekin Saptronga inletin 1912 khan a sut a. Kum 1913 khan hi hla lei hin Nobel Prize for Literature an pek a, literechar huonga Asia rama inthoka hieng ang chawimawina insang dong hmasa tak a nih. Hi hla hi Hmar trongin ka’n let a, October 29, 1973 khan ka zo a, sienkhom tu chen hin tlangzar loa la um a nih. Hieng laia ka Personal Assistant (PA) chu Bengali tlangval fel deu el, A. Bhattacharya a ni a, aman a Bengali text a kol a, inlet harsa le thu inthup deuhai chu ka’n let suol nawna dingin a Bengali text leh kan enkhi a, sin pangngai thaw pumin hun awlah ni tin kan bei hlak a nih.

Gitanjali hi thra ka ti leia nuompawnga ka zuk inlet el a ni nawh. Kan let hma kum ruk lai zet a ziektu thu ziekhai hi biin ka sui hmasa zet a nih. Kum 1967 khan Indian Revenue Service (Customs & Excise) ka zom a, Calcutta Collectorate hnuoiah trening kum thum zet kan nei hnungin Chandernagore-ah Assistant Collector sin ka zom a. Chu hma chun Alipurduar-ah thla ruk zet ka um ta bok a. Bengalihai laia thok ding chun an thu le hla ngaihlutpui hi an lungril hne theina hmangruo thra tak a ni lei le keima inhnikna infawmin, an mi ngaisang tak Rabindranath Tagore le mi dang dang thu le hla ziekhai ka tiem hlak a. Chuong hun laia inthoka ‘Gitanjali’ hi ka ngaizawng tran a nih. Gitanjali umzie chu ‘Inhlànna Hla’ a nih.

Gitanjali hi Sam ang deuh a ni lei le ringna le hrietna tienga ei mi le sahai ei la puitling tawk naw leiin, a bu-in insuttir inla, mi threnkhatin hmang suol pal an tih ti inlauna leiin tu chena sut loa ka la sie a nih. Kan let hnung kum sawmli deuthawah tu hin Mizoram University chun Mizo-Lusei tronga nei ve tumin an inlet mek a, an nei vat tah beisei a nih. Hi lekhabu ropuizie hi tlawma zawng ngaidan ei nei theina dingin, high school level-a inchuk dinga an thlang suok, hla pakhat No. 35 (Where the mind is without fear) chu hang thur lang ei tih:

Ngaituona lungril, tritna thrang ngai lo le

Mani indikna huoi taka kengkawna hmunah;

Hrietna var a zalen-engthawlna hmunah;

Intibingna bang chité tèn khawvel,

A daidan darh nawna hmunah;

Thudik rilmu anka an inhlànna hmunah;

Beirakna chawnbanin sawl dawn lo a,

Famkimna ram tieng a ban zingna hmunah;

Lungvar, zo tui anga inthieng le fîm chu,

Chìng dan triumin thlaler ram trawl vutpil lai,

An luong thamraltir nawna hmunah;

Ngaituona le thilthawah chunghnung zuol pei dinga,

Nangman lungril i thruoina hmunah;

Chu zalen-engthawlna van rama chun aw Pa,

Kan ram hai ang thrang raw se.

Delhi Version (2002-2007)

Ka thilthaw lai po poa inbuotsainaa hun ka hmang rawn tak chu Baibul (Hmar), Delhi Version tia hriet inlet le sut a nih. Thangngurin, “Ka hma khalin hnuoi tieng a mi lo dom” a ti ang khan, ka hriet naw lai khomin hi sin poimaw hi thaw dingin Iengkim Lalpa chun a mi lo buotsai a nih ti le chu mawphurna laka inthoka inhlip thei ka ni naw thu hi ka penson hmaa ka na rila ka thu dong chu a nih. Chieng êm èma ka thu donghai chu: (1) Naupang tè i ni laia inthoka thu le hla inhnikna le trong chîk taka inchuk chàkna petu che le chu chu bawzui pei thei dinga lampui sielpektu che chu ka nih; (2) Baibul tiem peina le tiem inhnikna petu che, inlet thrat a trulzie hrea invoina lungril inneitirtu che, chu thila chanchinbua thu huoi taka ziek ngamna petu che, i sum le pai seng ngai loa Baibul ram le a se vel rama thruoia infangtirtu che le chu thila lekhabu inziektirtu che chu ka nih; (3) Kum sawm hnungah Gospel Centenary in hmang hma ngeia hnam dang sum le pai pek khawm ni lo, nangni thaw suok ngei hmanga Baibul inlet le sut dingin ka ruot che a nih.

Ka nun a hmatiema ka hang suikir takluo chun thu le hla tienga ka lo inhnikna le inhmangna hai, thiem tuma trong ka lo inchuk ngat ngat dam, lekha inchuk a, history le literature ka lo thlùr bing dam, hla siem a, thusep le artikul ziek a, tienami ka lo phuok dam, foreign service ka lut leia sorkar thä hmanga Baibul ram ka fang chip dam le thil dang dang ka lo thaw le buoipui hai chu Baibul inletna dinga trening ka lo lakna vong a nih ti ka hmu suok a. Trening ka lo lakna zara chun India rama sorkar sin insang tak chen lo zom phakin, ka thaw ding tak ka thaw hma daiin hamthratna tam tak ka lo sîk dèr tah a nizie dam chu ka zuk hmu chieng zuol pei a. Matthai 6:33 a Isu ngeiin, “hieng po po hi a pek belsa ding cheu a nih” a ti indikzie chu ka nunah inhmai ruol a ni nawh.

Amiruokchu, keima tieng thaw ding tam tak a um. Chu dinga nasa taka ka’n buotsai lawk chu a ngai bok. Thu inlet dan kalhmang (art & technique of translation) nasa taka inchûk a ngai. Baibul inlet sin hi trong inlet el ni loin thu inlet sin a nizie hriet chieng a ngai bok. Trong inlet ringot a ni chun a umzie hriet thei der loa insuo châng a um thei a, thu inlet a ni ruok chun a umzie a phok fuk a, hriet theiin a suok hlak. Mi thiemhai thaw dan inchuk a ngai a, chu ding chun mani trong ang chara thiema hnam dang trong pahni bek hriet a ngai. French tronga mi Saptronga an inlet dan inchûk tum sia Saptrong chauh ei thiem chun thil thei a ni nawh. A thei dan um sun chu an inlet dan chîk taka Saptronga an soi chipna lekhabu zong a ngai. Chun, Baibul an inlet dan chanchin el bakah chang hrang hrang an inlet dan dam, a thu chieng lo (textual corruption) an inlet dan chi hrang hrang dam, pawl hrang hrangin anni trânghma kei zawnga an inlet leia danglamna um hai dam, Hebrai le Grik tronga thumal threnkhat, umzie inril tak nei, Saptronga a tlukpui a um naw leia chieng lo taka an sie, entirnan Hebrai 11:1 a Grik thumal ‘hupostasis’ ti, KJV an inlet laia a umzie tak an hriet naw leia ‘substance’ tia an sie ringot dan dam, a ngiel a ngana (literal/textual) inlet am, an naw leh a umzie phok suok zawng trongkam hmanga inlet (contextual) ding ti dam hriet fie a ngai.

Chu khêla chun rawn ding Bible Concordance, Dictionary, Commentary le Version hrang hrang dorzon khat bek, nei a ngai a. Chu nêk hmana trangkai lem chu Bible Software thra, zong sawl rak ngai loa computer hang hmeta ei thil dithai suok zung zung thei, nei a ngai. Chu ding chun a tlawm takah computer pahni bek hmang a ngai bok. Ka thaw dan chu, ka laptop-ah Bible Sofware ka mamawhai chu cheng sing nga chuong man ka thun a, chu chu ka voi tieng dawkan chungah ka sie a, ka chang tieng ka Personal Computer (PC) ah ka thu inlethai chu ka sut thlak a. Delhi tlanga nisa suok hun dar 7-ah ka dawkanah ka thrung tran a, zan dar khat chen chawl loin ka thaw ngat ngat a. A châng chun a luong zuoi zuoi a, a châng ruok chun sentence khat chauh luok suok pawta sunnithlaka buon châng a um. Chuonga sawl phal loa thaw peiin, Thuthlung Thar, Sam le Thuvar inkop chu March 8, 2004 ah, Baibul pumpui chu October 7, 2007 khan kan tlangzar hman a nih. Hi hi inbuotsai lawkna thra nei naw chun thil harsa el khom ni loin hun tawite sunga thaw thei lo tluk a nih.

Tlangkawmna

Inbuotsai lawk poimawzie tar langna dinga ka tonhriet pathum ka hung hrila inthoka hlawkna iemani bek lo hmu pha an um chun, chu chu ka kut sawl lawmman a nih. Inbuotsai lawkna thra nei chu thaw hmaa sin chenve zo ang a nih. Olsam taka thaw zung zung thei thil hrim hrim chu thra awm fua inlang khom a tlo ngai nawh. Phaiphin chunga bawl le lungpui chunga bawl in hang danglamzie hriltu kha Isu Krista a nih. Tlanna sin thaw dinga Lalpan a lampui a buotsai lawk neka inbuotsaina nasa, ropui le hlawtling a la um ngai nawh. Chu chu a nih Tirko Paulan, “Iengkim siemtu Pathien kuoma chatuona inthoka thuruk um, a lo remruot lawk, Lalpa Isu Kristaa a hung hlen suok” (Efesi 3:9-11) thu a hril kha. (January 20, 2012 Delhi)

Article ‘ENTAWN’ Hrilfiena Tawite

2012-02-09T01:28:00.002+05:30

- Tawnluaia

‘Entawn’ tih article, tawitea Lala Khobungin HYG-ah dated 9.1.2012-aa ziek ka lo tiem ve a, lawmum ka ti hle. A ni ngei takluo a; kha article kha mani irawma suok anga credit lak tumna lei le credit hmutu ding tak inhmutir naw tumna leia ziek a ni der nawh a.

‘Thuro’-a insuo ding hin article nei huntawk a lo intak khawp el a. A hluo siptu dinga, insuo a hun tak hnung khawma, insuo ding article ziek chuk chuk a ngai chang a tam hle a nih. Kha article, ‘Entawn’ [Thlasik (Oct-Dec) 2011] –a suok khawm kha, hmawsaruma inhmaw taka Pu H K Bawichhuaka (kei lem chun ‘Pa Bawi’ tiin ka ko hlak a) lekhabu ‘Nun Dan’ a mi tam tak laksuok a ni reng a. Hmai pal leiin ka lakna hnar ka lo ziek naw pal a, a pawi khawp el. A khaw hnung daia ka hrietsuok tak hnung hlaka siem\hat nawk thei a ni ta si nawh. Tu’n am a ni bek chu an hung hril suok ka ring a, ka lo nghak zing reng a. Tuhin Lala Khobung-in a hung zieklang ta a, lawmum ka ti hle. Hmai pal lieu lieu a ni leiin pawi ka ti a, thupha khawm ka chawi nghal ni raw se.

Credit pek le pek naw thua lem chu kei neka credit pe nuomtu tan naw hle’ng an tih. Thlâ-khat, la’n hnai tak el, suon tam khawm la liem hman lo; Kamsing a thlahai vawng kaupeng hung indar pei, hmun hrang hranga khawsa tawl kan nih.

Tuta Champhai hmar tieng, Champhaia inthawka km 12 vela Khawbung khuoa kan puhai an khawsak lain kan pu Kamsing-in arpui 300-in khuong a chawi a. Chu tlang chu January ni 15, 2010 khan Prof Vanlalnghak, NEHU hail eh ke ngeiin kan hang sir a. An lung lo phun hai le an tuikhur ngei khawm tu chen hin hmu theiin a la um nghe nghe a nih. Kum 1970 kuma Pachhunga Memorial Gov’t College lecturer sin ka hang thaw \um khan Pa Hnunlian kawlah ka hang innghat phawt a. (Pa Hnunliana puhai le Pa Bawichhuaka puhai hi unau an la ni a; Hnunliana hming tluon khawm Dohnuna hming la-in ‘Dohnun Hnunlianthanga’ tia phuok a ni nghe nghe. Kum chanve hnungah Pa Bawichhuaka-in an ina um dingin a mi ti leiin Pa Hnunliana ina inthawk chun Pa Bawichhuaka in tieng ka’n sawn lut ta a; kum chanve zet chu kan khawsa hmunkhat a nih. Pa Bawia ina ka um lai ngei chun Central Service zawm dingin college-a ka sin chu ka maksan tah a nih. Aizawl-a ka’n zin zatin bat lovin, Pa Bawisuok um ta naw sienlakhawm, an in ka sir tei tei hlak. Hieng ang hi kan inhnai dan a ni leiin an sungkuo ditsaktu ding tak laia mi niin ka’n hriet a; credit pe nuom nawtu ni lem chu hla tak a nih. Ka naupa Lala Khobung nek chun nasatakin ditsak lem ka’n ring.

Lekhaziek hi fimkhur a ngai a, fel sêng hlak a’n tak. ‘Copyright Act dam hi hriet a tha’ tih Lala Khobung-in a ti hi a’n dik hle. Hi lekhabu ‘Nun Dan’ khawm hi a ziektu Pu Bawichhuaka ngei khawmin lekhabu tam tak tiema, Samuel Smiles a lekhabua mi lakhawma a siem a ni thu Thuhmaah a ziek bawk. Hieng ang hi a ni leiin a ziektu ngei khawma Footnotes le Reference a pek nawh a, copyright a reserved bawk nawh. Amiruokchu, hi lekhabu phek 72 chau hi lekhabu ropui tak el, Mizo-pa siem laia chun lekhabu \hatak hai laia pakhat a ni ngei ring a um. Kei lem chun Mizo lekha ziek laia chu hi lekhabu neka \ha ka la hmu nawh. Hang inpak rak ding hlaka mani sungkhat laina hnai ziek a ni si leiin a emchang \utin ka hriet si nawh. Lekhabu hlu a tling.

Mihriet hi famkim lo, thawsuol zing zing el ei ni leiin fel sêng hi a lo intak ni’ng a tih. Lala Khobung a lekhazieka ngei khawm hin indik lo pahni a um pang el.

1 Rengkai, Churachandpura mi Central Service-a um –sipai General rank hiela pension an um kei chun ka hriet nawh. REngkai khaw mi ka ni a, ka Tawnluaia hriet hlak chu General rank ema pension ni lovin Lt General rank (ceremonial purpose only) chauva retire (pension) a ni si;

2 Tawnluaia, ‘Pa Tawnluoi’ tia a ko pa hlak chu Shillong-ah a um si nawh a, Gurgaon-a (Delhi) inthawkin Shillong tieng a’n zin zeu zeu chau a ni si. Ka hriet Tawnluaia hlak chu kum 1987 vel lai khan a lo thi ta dai bawk si. Tawnluaia hming put dang Shillong-ah an um hriet a ni bawk si nawh. Chulein ka naupa Lala Khobung hin a thil ziek hi a hriet chieng naw hle niin a’n lang.

Lala Khobung a article ‘Hmar Khawbung Dohnuna’ Sikhawvar November 2011. Voll-04 a insuo hi lo thlir nawk thuok thuok ei tih. Hi article sei taka hin Salvation Army Brig. Sapliana lekhabu ‘Bible |obul’-a Rev H K Dohnuna pieng kum 1885 tia a ziek a suklang a. Baptisma an changna Register ruok chun April 17, 1884 a ni thu a ziek a. Hi register hi tu kawla’m, khawlaia a hmu am a suklang ta nawh. Chun, C Vanlallawma buotsai ‘Tun Kum Za Chhunga Mizo Hnam Puipate’ (1894 – 1994) phek 240-a 1907 December 20-a Aizawl Venghluia muol inkhawma H K Dohnun thuhrila inthawka Suoka a piengthar thu a hril a suklang bawk a. Hi pahni naw lem hi chu H K Dohnun kristien a ni hma thu le a nuhmei Pi Roziki hai unauu bawi an ni thu le an suok nawk peii dan a ziek \eu nakachu a thulakna hnar a tarlang ta der nawh. Kum za neka tam liem ta thil a ni leiin ama irawma suok thei thil a ni bawk si nawh. A thu lakna hnar chu pahnih um thei a ta: 1) Mi hrilnaa a hriet-sawng (Primary Source); 2) Mi lekhazieka inthawka a laksawng (Secondary Source). A pahnia inthawka a laksuok khawm ni thei mei a tih. A ziektu ngeiin a tarlang nawh a, a thu laknahai kuomah credit a pek bawk nawh. Secondary source-a inthawk a ziek a ni lem chun an \awngbau tam tak hmang-sâwng ve ngei a tih; ring a um hle. Plagiarism-a inthawkin fihlim hulhuol bik nawng a tih. A thu lakna hnar a suklang naw hi a tum lei hrim ni lovin mihriem famkim maw leia a hmaipal ve bawk tho a nih ring a um tak.

A chung para-a ei hung ziek hi ‘THURO’-a ‘ENTAWN’ tia ei laksuokna hnar ei ziek hmai pal inkhum mawina dinga ziek ni lovin, mihriem hi famkim lo, thawsuol nei zing ei ni hlak zie le, keiin inchuk ding ka hau ang bawkin, ka naupa, ka pu Lala Khobung hin inchuk ding a la hau ve hle suklangna dinga ziek a nih (Ka nu puhai le Lala Khobung a puhi hi unau an la nih). “‘Khawbung’ a la ti ta deu deu” an ti mathlawn lovin hi thu lo tiemtuhaiin ‘Bu\hing le Khawbung an inhlawm thei nawh’ ti naw hram sien la ka ti hle. Chu nekin, “Khawbung-hai thaw ding chun a awm tawk vieu tho annawm” mi tipek lem hai sien ka nuom hle bawk. A tupa, a pa ni bawk, biek phakin ka la um zing a; a ngai pawimaw chu phone-in mi hung hril el sien la, ka hrilfie el ding bah!

Letter to the Editor

2012-02-09T01:27:00.002+05:30

Pu Editor,

Delhi Thurawn

Delhi Thurawn DT-XXVIII Issue No.18 15th January 2012 (Sunday hmasaa suok) phek 13-14 a Pu Lala Khobung thusep, HYG-a inthawka laksawng ni awm tak, ‘Entawn’ kha ka tiem a.

A suokna magazine hi ‘Thurawn’ a ni ang hrimin, Pu Lala thuziek/tawngbau kha ‘thurawn’ a tling. Amiruokchu, ‘Thusep’ huongah khum ni sienkhawm ‘thusep’ ei ti hlak hi chu a ni theiin a’n lang nawh. Hmar Literature Society journal ‘Thuro’-a article sawiselna a ni lem a; students’ magazine-a suok ding chun a’n hme chie naw deu de aw ka lo tih. Iengkhawm ni sien, a zietu’n HYG-a a post kha dittawk lovin DT-a insuo dingin a hung pek a ni ruok chun ama thu a na.

Pu Lala thuziek kha, a hrilfiena HYG-ah ka post tah a. Amiruokchu, DT-ah insuo a ni leiin, HYG-a ka post chu tlawma siem\hain lekhathawn angin ka hung ziek a nih.

Magazine/journal/newspaper hai hi ei en chun a issue hunbi- thla/kar/ni hming a chuong hlak a. 'Khawnvar July 2011’ ti dam, ‘Thuhriltu September 2010’ ti hai ang hi ei hmu hlak. A chunga khawm khin ‘Delhi Thurawn DT …’ ka hung ti khi. Thuro hi quarterly-a suok a na, issue khat hin thla thum a huom pei. Issue tin hi Hmar \awngin a hming pek seng a na –|hal, Fur Favang le Thlasik ti an nih. A magazine hming i.e. ‘Thuro’ le a issue hming i.e Thlasik, etc., ziek dan hi hriet hran harsa a ni nawh a, hawrawp in-ang hmang a ni ngai bawk nawh. Patling buoina tham chu a ni nawh ie.

Thuro hi literary journal ni sienkhawm tu hma chun Hmar Literature Society (HLS) magazine (owned) a ni ngai nawh. Pu Lal Dena \hahnem ngaina leia insuo ni lemin a’n lang. Kum 1983 July khan a suok \an a. Thlakip suok ni sienkhawm a suok remchang naw \um le, thla hni an keikawp chang a um a ni hmel. Chu angin April-May 1986-a suok, bu 30-na chu a tawpna a nih.

Hmarhaiin literary journal ei nei naw kha mani tawkah ka lo engto ve hlak leiin kum thum VEL liem taha khan a hming bek khawma insuo dingin HLS hotuhai ka hang ngen a. A buoipui thei an um naw ni chun mania buoipui dingin ka’n volunteer nghal a. Hotuhai chun an remti a; chu khelah Thuro kha HLS-in sukhring nawk sien tia Pu Den-in HLS hotuhai a ngen thu an lo hril a. Ama Pu Dena kan biek a. Thuro ownership chu Samuel Songate leh kan pahni’n a mi hung inhlan a. Amiruokchu mimal ta ni lovin, HLS hotuhai le inbiekna dungzuiin, HLS journal dinga insuo a ni tah a nih. Pu Denin issue hlui po po chu a hung thawn thlak a, Xerox lain ka kawl a, a original chu ka thawn kir nawk tah a nih.

Thuro hi Manipur-a Hmar Literature Society-in a buotsai a na. Tuhin chu Assam, NC Hills le Mizoram tieng khawm HLS a ngir ta leiin hmun tina HLS hai ta, an renga thangruola an insuo a nih. Literary journal a na, mimir inhnik chi a ni rak naw leiin open market-ah zawr a ni nawh a. A la nuom hai chun kum khat lakman –Rs 100/- (Rs 50 for students) peka lak thei a nih. Hmar tawng, Hmar thu-le-hla ngaina a, humhal le sukhmasawn nuomtu taphawt la dingin ka fiel nghal bawk.

Pu Tawnluaia (Chairman, Thuro Editorial Board)-in ‘ENTAWN’ ti article a ziek, Pu Lala Khobung-in a hung lepse kha, ama Pu Tawnluaia vekin a hrilfiena a siem a, a hnuoia hi aw. Kutzieka a hung pek, kan lo type a na, mistake a um el thei.

R H Hminglien Hmar

Editor, Thuro

H No-626/3 RK Puram

New Delhi – 110022

Tel: 09868558955.

Hmarram Ezukesawn le Hausakna

2012-02-09T01:26:00.000+05:30

-Malsawmthang Keivom

September 1999 khan USA-a kum 40 hnuoi tieng mi hausa sawmli an thlangsuok a, hienghai laia 1-10 chen sumhlawkna chu IT (information technology) kawmpani le inzawm a nih.

A danghai sum hmuna chu pizza kawmpani, miuzik kawmpani le inkhelna tiengpang dam a nih. Hiengang bawk hin India Today magazin March 10, 2008 issue a khan India rama kum 40 hnuoi mi hausa pahni thlalak le chanchin tawite an hung tarlang a. Sameer Gehlaut (33) le Rajiv Rattan (34) hai hi IIT-ah an inchuk zo hnungin Indian stock market-ah an lut a, an lungvar an hmang thiem leiin naupang te’n mi hausa an kai phak tah a nih. Gehlaut a hausakna hi cheng vaibelsie sangruk a n’a, Rattan a hausakna chu cheng vaibelsie sangthum a nih. An tleirawl lai hretu Vai pakhatin a mi hril dan chun hienghai pahni hi Rs. 10,000 vel chaua intan an nih. Indian share market hi ngun takin an inchuk a, a suk a tunga an lumlet zek hnungin stock, bond, mutual fund le equity ah investment an tan a, an hlawk tung pei a, kumriet sung chauin mi hausa an kai phak a nih. Sawrkar sin zawng buoi khawm a ngai nawh. An kawmpani hming chu Indiabulls a nih.

March 9, 2008 zan khan BBC World, Inside China (Chinese School), pawrawkram ka en a. Ka lungril a tawk bek bek el! Zing dar 6 a inthawk zan dar 10 chen sikul an kai a, an hotuhai taimak dan chu hril ngaina khawm a um nawh. Zan dar 10 hnunga sikul-a la thung nuom pawl dam an um hlak leiin an hotuhaiin an hnawt dawk hlawl chang dam a um. Hi sistem hi kum 30 lai an lo thaw ta hlak a nih. China rama sikul tha tak takhai hin vawisuna an ngirhmun a siem dan ka ngaituo dawk ur ur a. Thieminzir run lo pawimaw dan hi chu aw...! Vawisuna China ram hausakna intluntuhai hi kum 30 vela inthawka hotu inpe zo tak tak haiin thi-le-thau senga an lo inchuktirhai kha an nih ti ka hang hrietsuok chu ka na rawng rawng el. Hmarram ka ngaituo naw thei nawh! India ram hausakna khawm hi a tam lem chu kum 30 vel liem tah a inthawk Vai rama sikul tienga inchuktirtuhai sin inrim ra kha a lo nih. Hieng sa khawm hin tulai khawvel sikula inchuktirna hai hi a tha tawk nawa ngai pawl khawm an tam el.

Tulai sikulin ei inchuktirna-a ei ngai pawimaw tak chu naupang an hung puitling huna an sin thaw ding a nih. India rama chu a tam lemin ei nauhai hi IAS le IFS ni ding damin ei hang dit phawt a. A thenin enginiar ni hai sien, a thei lem chun fakruk ding tamna hmun tak a khan pawsting hang hmu nawk nghal hai sien ti dam a nih ei duthusam chuh. IRS lem hi chu ei dit taluo a, ei zer a far thluk thluk el an naw’m a nih? Ei vizawn khawm hi a’nfuk naw zo vawng tawl an tah. Hausakna hi a tha taluo rak a, nisienlakhawm a lampui indik le hausakna indik ei zawng a tul a nih. Nu-le-pahai ei khawnghat a’ndik naw leiin ei nauhai khawnghat khawm a hung indik naw ve pei a. Ei mawlna leia khawnghat indik lo khawm ei tam. Ei lungrila det tlat chu kawrapsawn thaw naw chun hausak dan ding lampui a um naw anga ngaina hi a nih. Hausak dan lampui tha le indik tam tak a um ti ei hriet naw leia kawrapsawn chau ei lungrila um khawm a ni thei. A chunga kum 40 hnuoi tieng hausa ei tarlang ta hai kha kawrapsawn um loa hausa vawng an nih.

Eini lai chu a bik takin kawrapsawn hung intanna chu sawrkar, kohran le sumhlawk zawnghai lai a nih. Sawrkar thawktuhaiin hausak an nuom leiin a thaw dan ding dang an hriet si nawh, an ngirhmun chu remchanga hmangin indik naw takin sum an zawng hlak. Kohranhai khawmin ei kohran membar an tam theina dingin chawm naupang ei zawng a, chawm naupanghai chawmtu ding Sapramah ei zawng nawk a. Mi’n lungril le titak zeta naufahra enkawlna ding thawlawm an hung thaw hai kha eini lai kohran pawl zawngna dam le mani insung intungnungna ding damin ei lo hmang hlak a nih. Hi hi ngei hi kawrapsawn indik tak chu a nih. Sumhlawk zawngtuhaiin awlsam le inrang taka hausak an nuom hlak leiin sumhlawkna indiklo an thaw hlak. Taima-in ei lungril Pathienin hmang dinga a mi pek hi hmang tangkai nuom in la chu kawrapsawn hi a tul thak nawh. Kawrapsawn ei ti hi a’ntanna pawimaw tak pakhat chu mawlna hi a nih.

Naupang chu an chintea inthawk sum inthieng taka an hmu dan ding, an hausak dan ding inchuktir in la chu an hung lien pha kawrap naw tawp an tih. Chu lei chun ezukesawn tha ei pawimaw a nih. Naupang chau ni loin puitling khawmin ezukesawn tha ei pawimaw. Fainansial ezukesawn a tharin ei inchuk a ngai a nih, ei naupanghai a bulthut chite bek ei inchuktir theina dingin. Lekhathiem tak tak khawm a tam lem chu mi mawl vawng ei nih. Ka zuk tina san chu fainansial ezukesawn ei hriet nawh lei a nih. Ei artikul hmasahai – Talent Fawrmula le Hausak Dan Thuruk – kha ei tiem seng ring a um. A tam lem chun Malsawmthang hi a va tisa mi tah lawm lawm de, mi ti mei an tih. ‘Hi kawng thua hin ka tisa mi nawh ie!’ ka ti nuom a nih. Talent tekhithu le Mina sawm tekhithu hai hi hausakna thuruk ropui taluo an lo nih. Hi neka praktikal biuzines le ekonomik thuruk inchuk dan ding a um di’m a nih ka ti hiel a nih. Ei Lalpa Isu Krista var dan hi chu mak tak a nih, Pathien a ni hrima.

Tuta ka sin thaw lai zing zawm dinga 1991-a Delhi ka hung khan ka mawl dan chu vutluo chem mawl nek khwmin ka mawl lem. BA ka pasi tawk a, sin ka hmu tawk tawk a, ka zawm thei tawk tawk chau a nih. Ka pasie rapthlak el bawk. Fainansial ezukesawn tha tak lo nei lang chu hma ka sawn hrat ding vei leh. Ei sin thawna ei zawm hin ei thiltum zo ang dera ei in-ngai hi ei mawlna pakhat a ni nawk bawk. Ei sin ei hmangai ngawi ngawi a, ei sin thawna-a inthawk ei hotuhaiin mi ban an tih ti dam ei inlau a. Ieng tik lai khawm ei ti dawr dawr a. Sin nei e ti loin, ei hun rinumna’n tu mi hriet pui mang loin ei hmang zo hlak. A tawpah ei thlatin hlawhai Vaihai ti dan angin ‘My hard earned money!’ ei hang ti ve bawka. Harsa ngawi ngawia ei hlaw dawk hai Vaihaiin an mi hei lakpek nawk vawnga. Ei thla hlawah ei in-nghat taluo a, sukpung dan ding lungril khawm ei phan phak nawh. Hausakna hi ei ta dingah ei sie naw tawp el a nih. Anachu sum ei inhnarna a bo chuong si nawh. Money game hi suol ang damin ei ngai. Pawisa hi suol anga a’nlang nasan chu mihriem ei suol lei a nih. Hiengang ngaidan po po hi a tira fainansial ezukesawn ei lo nei naw lei a n’a, mawlna inril tak a lo nih. Vai ram ei hung tlung a,income tax umzie dam ei hung hriet liet liet a. Investment thaw chu kahase!

Ei ezukesawn bulthut a that naw leiin ei rama sum-le-pai enkawlna tieng hrietna khawm a tlawm nawk zuol a. Aithing, vaimim, sipui le hmarcha ei ching a, khawvela sumdawng thiem takMarwarihai kuomah ei hang zawr nawk a. Chu naw chuh fainansial ezukesawn ei lo nei ngai naw hrim hrim. Marwari le Saldarjihaiin an nuom po leh aithing man an suksang a. Aithing man a tha anga ngaiin a hawnpuiin, a tel telin aithing bil ding rampui ei vat kuo dei duoi a. A kumnawk aithing zawr a hung huna, aithing man an lo sukhnuoi nawk a. Kumpui lingleta ei sin thawna, zawr naw thei hlak ni ngai lo. Aithing ei ching nuom ta naw charin aithing man an hung suksang nawk a, a pang-ngai ang charin a hawnpuiin aithing bil ei siem nawk ut ut a. Ei thaw dan pang-ngai angin ei inkuol inkuol hlak a nih. Hazat um tak chu a nih. Ei rama ei khawsak dan hai a hin inchuk ding um ai lo chuh!

An leh hausakna dinga ezukesawn chu iem ning a ta? Ei inchuk tanna dinga tha pakhat chu paper asset investments (savings, stocks, bonds, mutual funds) hai hi a nih. Paper asset investmenta hin a then chu liability a uma, a then chu profit earning asset a um bawk. Profit earning asset chu ei zawng ding tak a nih. Liability ei ti ruok hi chu share ei inchawk a, a hlawk tieng neka a man a hung inhnuoi hi a nih. Hiengang share hi ei inchawk fuk nawna dinga fimkhur ding a nih. Cheng 5000 khawma intan thei a nih. Ei intan hma’n hun iemani chen zet inchuk a tha. Vaihai bawk ei indawn a, a kawitan tak. An hemtubawk hmang dan inchuk ei ta, ei thiem pha leh anni ei vuok ve theina dingin. Kawmpiutar le internet hmang thei seng ei nih. SEBI website ei hawng a, mania inchuk thei ding tam tak a um. Hitaka inthawk bengvarna ei hung nei chu fainansial ezukesawn pakhat a nih. ICICI, HDFC le Axis Bank a hai account hawnga stock market-a lut thei zing a nih. Vai rama um hai poin stock market-a trading thaw dan ei hnesaw chun ei ram tieng ei hrietna ei phur lut ding a nih. Chu chu Hmarram siemthatna dinga sirbi pawimaw pakhat a nih. Hmar tawng a hin biuzines tawng thumal a tlawm taluo a, chu lei chun ei pasie bik rieu a nih. Tawng thumala ei pasietna chu a tak khawmin ei pasie hlak.

A nei deu haiin real estate a invest dan inchuk nawk zuol ei tiu. Entirna’n, Pu Lalruotthangin Dwarka(Delhi)-a a in (flat) Rs. 30,00,000 zetin a zawr a, in (flat) dang Pu Hlira Pulamte in kawl hnaiah man tam rak loin a’nchawk nawk a. A pawisa chuong a thenin Rengkai khuo, Tuithaphaiah, Rs. 3,00,000 velin in hmun a’nchawk nawk a. Fainansial ezukesawn pakhat hang hril zawk ka tih. Pu Lalruotthangin Dwarka-a flat a’nchawk laia lawn (loan) a lak kha la zuk thung zo el naw sien, a san chu a lawn lak khan kumtina income tax a pek ding iemani zat zet rebate a hmu thei a, chu chau chu ni loin inflation hung um pei kha a hmang tangkai a nih. Ka hriet suol an naw chun home loan a hin insurance a um a. Tuta home loan a la thung zo lo po a ding hin insurance siem thar bawk sien. Vangduoi thilah a lo thung zawm thei naw khawmin a insurance khan a home loan lak kha a thungpek vawng ding a nih. Rengkaia in hmun a’nchawk nek khan tuilo (paddy field) parikhat inchaw sien, kumtin a san man buhum pawt 40 la sien, a buhum chu a kum nawk favang lai tak zawr sien, a hlawk inkhawl peiin kumhni hnungah a GPF Rs. 2,00,000 ladawk nawk sien, lo parikhat a’nchawk sa nawk thei ding a nih. Chuongang pei chun a lo san man inkhawl pei sien, kumhni dan peiah a GPF ladawk nawk pei sien, tuilo dang a neka lien inchaw sa pei a t’a, a tawpa chu hausapu a kai el ding a nih. Tuilo thar a’nchawk zatin a hma neka a leta lien lem a’nchawk zie thei ding a nih. Money game ei ti chu 1,2,4,8,16,32.... a nih.

Sumpui tam bek loa intan khawmin sumhlawk dan ding chidang dang a um. Tuta inthawk chu ‘sumdawng’ hi Hmar tawng vawkabulari-ah a sie’n sie ringawt tang ei ta, thumal thar dingin ‘sumhlawk’ ei ti ta ding a nih. ‘Dawng’ ti hi a tha nawh; ‘bo’ annawleh ‘chan’ tina a nih. ‘Business’ hi ‘sumhlawk’ ti ding an tah.

Indik taka milianer kaina ding chun kum 20 vel a lut a nih an tih. A harsat vanglai tak chu a bul tana inthawk Rs. 50,00,000 chen vel nei thei hun hi a nih. Hi khel tieng hi chu pawisa ei hnawt ngai loin pawisa’n a mi hnawt ta hlak a nih an tih. A’nhawi awm! Sumhlawk thaw tana inthawk kum 18 sung vel hi chu sum laklut a tam bek nawh a, a tawp tieng kumhni sung ruok hin chu hriet naw karin a pung huk huk el a nih an ti bawk. Information Age a um ei ni leiin kum 20 sunga mi hausa kai theina hun hi kum 10 velin a hung inhnuoi thei tah an ti nawk pei a nih. A hma tienga ei hril zawk mi hausa naupang te tehai khawm kha Information Age hmang thiem pawl an nih. India ram ekonomi hi mi hausahaiin an kawntrawl a nih. Sawrkar danhai hi Minister thu nei thei deuhai hmangin anni hlawk theina ding zawngin an siem danglam hlak a nih. Tulai hnai el khan India ramah bufai le gehu a tlawm ta leiin impawt diuti (import duty) um loa lak lut thei a nih ti thu NDTV-ah an puong khah. Impawt diuti a um naw sung po a hausahaiin lo impawt teu an ta, diuti a hung um pha chawl nawk hmak an ta, bufai le gehu a hung tlawm charin hlawk deuin an zawr nawk char char ding a nih. Hiengang ngaituo theina hi fainansial ezukesawna intan vawng a nih. Chu lei chun ei Hmarram ezukesawn hi ei invawi naw thei nawh. Aw kan Hmarram, truoilopar anga i vul zing ding hun hi kan va nghakhla ngei! Iengtikam ka lung awi a ta? [Gaborone, 24th March 2008]

HMAR STUDENTS ASSOCIATION Joint Headquarters, Delhi Letter to Chief Minister Of Delhi

2012-02-09T01:24:00.002+05:30

To,

Sheila Dikshit

Chief Minister

Government of Delhi

Subject: Justice for raped victim.

Dear Madam,

We, the Hmar Students' Association, Joint Headquarters, Delhi would like to bring to your notice that one of our female member was physically beaten, tortured and raped by one Mr. Anuj Saini on the night of 18^th of January, 2012 at Dwarka, Delhi.

The raped victim aged 20 years, Miss Ruth , who is a Tribal Christian and working in a Spa company in Gurgaon was offered a lift in a car by the rapist on the night of 18^th Janaury, 2012 on her way back to her rented place in Mahipalpur, New Delhi. Instead of dropping her to her place, the rapist Mr. Anuj Saini drove her to an unknown and isolated location somewhere in Bamnoli area of Dwarka Sector 28 and physically abused, tortured and raped her.
After escaping from the rapist, the raped victim returned to her place and an FIR was filed at the Police Station, Dwarka Sector 28, Delhi on 19^th January, 2012 against the rapist (FIR No. 11 Dated 19/01/2012) and the case against the rapist registered under IPC 365 and 376 and her statement taken by the concerned Police. The Police, who promised to arrest the rapist after 2 hours of filing of the report, arrested the rapist only after 5 days after the incident.

Considering the seriousness of this case and similar incidents that happened at the National Capital Region (NCR) and the unprecedented racial/gender-based violence meted to the people of North East India living in NCR, we, the Hmar Students' Association, Delhi demands the following to be taken up by your good office at the earliest so that justice be delivered to the victim, who is physically and mentally disturbed by the trauma she went through:

1. That, the rapist be punished appropriately without fail as per the law of the country.

2. That, the rapist in the case be further booked under suitable sections of the Scheduled Castes and Tribes (Prevention of Atrocities) Act, 1989.

3. That, the victim be compensated as per the Scheduled Castes and Tribes (Prevention of Atrocities) Act, 1989 and any other prevailing laws that cover this nature of crime.

4. That, a special cell headed by an IPS officer from North East India be established within the Delhi Police to pro-actively deal with the issues and problems regularly faced by people from the North East India in NCR.

5. That, justice be delivered fairly to the raped victim at the earliest.

Sincerely,

(JAMES PUSING SANATE)

President

(ZACHARIA VARTE)
Secretary

Hmar Students Association
Joint Headquarters, Delhi

Letter to the Editor

2012-02-09T01:23:00.000+05:30

Pu, Editor

Delhi Thurawn.

Subject:- Sawmapakhat le Building project donation/contribution

Delhi Thurawn, Pathienni dated 15/01/12 Building Committee/Executive Committee HCFD thusuok, Sawmapakhat le Building Fund pe hai hming list (2011) ka lo tiem a. Hming ka hriet lo ei lo tam hle leiin hrietna a suk zau a. A\ha hle el.Hi lai zing hin ka suongtuona sukpengtu a um tlat el. Hming list hi HCFD inthlang(election) le inzawma insuo a nih. Chuleiin, list a \hang po Ex. Committee Candidate ti thei an ni nghal bawk. Eleksawn zo ani tak leiin listah ka hming achuong ve tlat naw hi asan hriet ka nuom.

Building Fund hi hun iemani chena inthawk in ka lo pek tah a. Ka record danin a hnuoi ang hi a nih:-

Sl.No	Month	Year	Amount
1.	April	2007	Rs. 10000/-
2.	August	2007	Rs. 10000/-
3.	March	2008	Rs. 10000/-
4.	April	2008	Rs. 10000/-
5.	May	2008	Rs. 10000/-
6.	April	2009	Rs. 10000/-

Total Rs. 60000/

Achunga baka khin June 2009 a inthawk December 2011 chen thlatin Rs. 3000/- ka pek hlak. Chu umzie chu, Rs. 3000 X 31 months =Rs. 93,000/- ka contribute ve ta. A reng a Building Fund a ka pek ta po chu Rs 1,53,000/- char a nih. Thlatin Rs. 3000/- pe si Biekin a khawm puong lang ni hlak, a pe list ka hming um bawk lo chu a san hriet ka nuom . Thawpal le hmu \hel ni thei ring a um nawh. Kum khat sung(2011) a tarlang ni sien khawm thlatin cheng 3000/- chu ka pek a nih.

Pu Editor, Building Committee/HCFD Executive Committee hai in an record hung enfel in a hnuoia zawnhai hi Delhi Thurawnah hrilfie dingin ka ngen.

1) Building Fund Contribution ka rikawt le Building Committee/Ex.Commitee rikawt an mil am?

2) Building Fund Contribution list a ka hming a um naw reng reng am a ni ?

3) Building Fund contribution list a Ienglei a ka hming hi inchuon lo am ana?

4) Rikawt mumal lo lei a ka hming um lo am a ni?

5) Duplicate receipt sie lo am a ni?

6) Tum hram a ka hming inchuon lo am ani ?

7) Thlatin Cheng 3000/- lai pe ve si, iengleia cheng 3000/- hmu \hel thei am a na ?

8) Rikawtah ka hming a um naw chun ka pek zozai hai khawlam a riral zo a na? Collector/Usharhaiin an peklut naw am a ni ? A san hriet ka nuom.

9) Building Fund pe si hming dang inchuon lo a um am?

1o) Hming list hi khawlai record dungzui a insuo am a na ?

11) Mipui hriet dinga insuo hmain countercheck thaw lo am a ni ?

A chunga zawna hai hi a dawnna fietak Building Committee/Executive Committee, a inthawk ka beisei. Contribution list a kahming a um naw chun pekzawm nekin pek lo a him lem ta ka ring. Mipui khawm fimkhur \hang a tih. Building Fund ding ani leiin hmangna hriet loa a riral remchang naw nih. A fena dinga hmang ani le ni naw hriet ka nuom leiin Delhi Thurawn veka sukchieng dingin Pu Editor Building Committee/Executive Committee ka ngen.

Ringumin,

Dr. Dony Tuolte

Ph No. 9868874660

24/1/2012.

ENTAWN

2012-02-09T01:17:00.002+05:30

Lala Khobung, Aizawl.

Nikhat el lai khan THURO THLASIK (Oct-Dec.2011) Delhi-a inthok a insuo Magazin ka lo tiemve a. Thil pahnih, mak kati a um a.

Pakhat chu, khahma khan HLS buotsaih THURO ti a um hlaka, tuhin chuh hming seilem ‘THURO THLASIK’ ti alo nita am ani ding or tutahma a THURO khah alani zing am ? Thlasik titak hih Phalbi, English hai in ’Winter’ an tihih a ni am?

Pahnina chu, hi ei Magazin a hin, ‘Tawnluaia’ inti in artikul ENTAWN ti a ziek a. Ka zuktiem chu, Pu H. K. Bawichhuaka lekhabu NUNDAN tia mi 90% neka tam, angiel-angana a lak, Luseitronga mi Hmar tronga an let ani a. ‘ENTAWN’ titak lei el a hieng lawm lawm a mi thuziek, credit pesilova en ton el chuh thil thaw dan ding an nawh a. Hi thil hih Court case a lak le lei chawina tham a ni leiin, Editor khoma lo enpui hlak thra in kahriet. Tawnluaia in ti hin a nina (identity), khuo le address a ziek si nawh. Ka laibungpa ‘Pa Tawnluoi’ ti a kako hlak, Rengkai, Churachandpur a mi, tuta Shillong a um hih ‘ning a tih‘ heiti ding niinla hlak chuh, a ma mithiem le inchuksang, central service a inthok a sipai General rank hiela pension in hienga mi thuzieksa a ngielangan a la sawnga, a ziektu credit pe lo hin a thaw nuom ka ring bok sinawh. Hienga mi dang ngaidan le thuziek la sawng a mani irawmsuok anga hmang (plagiarize) hih thil namei an nawh, Copy right Act hai dam hih hriet a thra. Pu H.K.Bawichhuaka hih ama lo um ta naw sienkhom, a nauhai mi fel tak tak Aizawl a hin an la um tawla, lo hre ve hai sien ieng tin am an ngai ding ?

Tuta hma khom khan Hmar Gospel Centinary Souvenier ah H.K.Bawichhuaka pa H.K.Dohnuna chanchin indiklo takin Dr. Lalkhawlien Pulamte in a hung ziek lei khan, a siemdikna ding in Dr.Lalkhawlien Pulamte inzatak (with due respect) pum in artikul seideu ka ziekpha nghe nghe anih. Pu.H.K.Bawichhuaka le apa H.K.Dohnuna hai hih ram le hnam le kohran bulthrut remtu, mi trangkai le inza phur an ni leiin, an chanchin le an thuziek hai hih indik taka hmang tum seng eitieu khai.

High school ka kailai Pu.H.L.Daka khan “Pu H.K.Bawichhuaka lekhabu NUNDAN hih lekhabu ropui tak aniha, tiem ve ngei ngei rawh” a mi ti leiin ka ngaiven nghala, voi iemanizat katiem suok taha, athuziekhai hih a ropui in lekhabu ro tling tak zet a nih. Dr. Rochunga Pudaite in Hmar trong in an leta, a sut hma a lo en ding in, a mi ti lei in, ka en ngun vieu nghe nghe.

Lekha ei ziek reng rengin mi thu le hla eilak sawng a ni chun ei lak sawngna hrilin ‘credit’ pe hlak eitieu. Tulaichuh mitin deuthaw hin lekhatiem an uor ta a, mi thu le hla ei haw hai hi ei haw nahai hming samsiloa an thuziek hai, mani ir-awm a suok ang ela eithur suok hin an hriet nghal a, mak an tia, rukru-ah an mi ngai anih. Chuleiin thri be china inngai hai lem chuh fimkhur zuol a thra.

Tawngbauhai

2012-01-13T10:09:00.002+05:30

## Tv. Paul Tryte: Sikpuiruoia ka
lam laia ka thlalak nei dam in lo
um pal chun Fb a khan hung
upload tûm! iem ka ang hei in bêl
chîng ka tih

## Brother Papathre:
Sikpuiruoi chu dawn/inrui chi
thanglo khawma inhoi deua
hmang thei alo ni ran hi ti maw.
## Tv.Zachariah Varte: Andik
char a nih ei tin khan athenin “i
sa hieu ani maw” an mi ti a. Ka
dawn lêtna chu “lam ding hin sat
ka ngainaw reng reng” ka confi na
zawng tak a nih.
## Tv.William R Darngon:
Tukum chun Delhi hai hi ka boin
Christmas in lo hmang ding chu
na maw! ka ngaituo ngei cheu iem
inlo chang ding chu, harsatna
innei chun hung hril pei el ro aw.
## Pu. Hrangthangvung
(Street Hawk): Sikpuiruoi ka
hmang laia chu 2011 sikpuiruoia
ei musician hai khan an rem fuk
tak, a na chu an tlawm deu a ani
kha ti.
## Tv. Joseph Lalramlien
Joute: U Muonte first letter hung
thawn kha Sikpuiruoi ni a zinga
khan ka hmu a, ka hawnga, ka
tiem nghal. A thu a ziek tlum fet a
ni aw.
## Nehemiah D Ruolngul : Ei
Sikpuiruoi hmang kha chu kava
zuk sawl mei mei de aw! ka kut le
zâng ala na thuom el chu ti, na
chu anhoi top, lam ve hman naw
a ti thu cho.
## Nk. Vari Fanai: U Ngaia
venga um kha ka office tinin ka
hang phone na Tall Road lai ka
um tah mi hung pickup ta rawh
ka hang ti chu a nui an za ie.
## Nk.Daisy Darngawn:
Talithahai rawi ku hi tulai chu an
mi hnam thei taluo ka nu le pa an
uma ruol hlak pawl ta lo reng reng
ka na, “I nuhai fe tahai sien” an
mi ti char char ei ni’n ei ngai vei
leh.
## Pu. L Keivom: Khawvela thil
mawi ka ti ve pawl pakhat chu
nunghak le tlangval nal deu a
Bike a an inphur hi a nih. Its very
beautiful.
## Pu.Vanlalhlir Pulamte:
Keikhawm kan nu ku hi Car thar
hlawk nekin bikea nal vekvawka
phur hi ka lan hawk tak a nih.
##. Pu.Sunga F Khawlum: Ei
hang pasie tak tak hin chu inzawr
hi ei nuom el an nawm. Nuhmei
an lo inzawr khawm hi awm ve
tak a nih.
## Pu. Vanlalmuon Joute:
Hieng khop hin Avon kan vir
buipui a chu, kan fak tawk tawk
chau a ni hi, nghei em chu kan la
nghei nawh ie. Sungkhatpa hi
chu a tlin an tak ngei el.
## Tv. Freddy: Sabengtung hi
Camel a ni maw?

Tuta kar thupui

2011-11-28T21:46:00.003+05:30

“Hratnaw i thangpui dan le, Ban zoi i hang san dan tak chu maw!

Mi mawl i hril var tum dan chu,

Ieng hrietna ril am a na i phu suok?

Joba 26:2-3 (DV)

DELHI HMAR SIKPUIRUOI 2011

2011-11-28T21:44:00.000+05:30

3^rd December 2011, MTNL Hall, Sector 6 R K Puram

(1130 hours – 2100 hours)

Sikpui Pa:

1^st Session (Business Session)

Comperes: Sunga F Kholum & Sunita Lalparmawi

Hla ruoi

Sikpui Sports Lawmman Semna

Book Release

DHWA thuoitu dinghai thlangna

Christmas Album Release

2^nd Session (Festival Session)

Comperes: Lalchungsiem Thlawngate & Sunita Lalparmawi

Sikpui Hawngna

Sikpui Hlasak

Sikpui Thucha

Hnam Lam

Sikpui Thucha

Fashion Show

SIKPUI RUOI KIL TLANGNA

3^rd Session (Rimawi Khawvel)

Comperes: Henry Haulienkung & Chingboi Buhril

Hriet ding tul hai:

A thei phawt chun Hnam inthuomna chi khat bek a inchei seng ding.
Hi ni a buoina siem an um chun nguntlak tak a an chung rel ning a tih.
Hmar Inpui a sum peklut trul, a hran taka dawl ani naw leiin Sikpuiruoi 2011 hmangna dinga member hai laia sum lakkhawm hin a thei chun in kep tir sa tum ani bak ah Tomchon Memorial Football Tournament a sum ei bakkhaina hai sawmdawlna a hmang ding ani leiin thahnem ngai taka pe dingin ei in fiel nawn a, la pe hman lo an um chun reception a pek thei ning a tih.
SIKPUIRUOI hi social thil a ei chawngchen ni ani leiin a tar a zur thang seng dingin ei in fiel a; sum le pai harsatna leia contribution pe thei lo ei lo um pal ani khawm in inphalam lo a thang seng dingin ei in fiel nawn anih.
Ei mamaw dan en a Hall booking thaw ani leiin program a hun tak a tran ning a tih.

TAWNGBAUHAI 27 November 2011

2011-11-28T21:42:00.004+05:30

** Pu Dr. U Chunga Infimate: Sikpui Ruoi phat hlasak ding ka ti a chu ka buoi taluo a ka phuok hman hlawl naw a nih.

** Tv. Lalneilien Inbuon: William chu thil dang iengkim a nei thei vawng; Ngaizawng char a nei thei nawh.

** Tv. U Dina: Tamchon a Miliente goal thun kha a nal bek bek el a nih. By mistake a a thun a nih. Chu na Sikpui Sports a chu thang kawp dal kan ti ie nakie goal thun nawk a ta hrat pal hlau rawi kan tih.

** Tv. Lalhratthang Shakum: Mami Sinate hi Prem alu hung inchawk hai leh ku khan an lo inang khawpel maw…!

** Brother Papatre: Dual phone a suk ta… Dual key pad, dual battary, dual voice, dual touch-screen, dual free sms, dual talk time hai khawm inchawk thei vawng an tah. Hurry. OK!

** Pi Mahmingi Infimate: Ek in sungah ka thung ta hin chu lekha tiem ding a um naw chun ka’n hnawm thei thak nawh. Tiem ding a um naw tawp khawma ‘Harpic’ bek ka tiem tho tho hlak.

** Tv. Chanchinmawi Faiheng: Sikpui Sports 2011, naute nu in a vawn zing lai a inthawka tar chenin ei nghakhla chu zing hi a lo ni der el tah. Ui karei!!

DHWA INHRIETTIRNA

2011-11-28T21:42:00.000+05:30

Hung tlung ding 3^rd December 2011 SIKPUIRUOI ni pui ni hin Delhi Hmar Welfare Association a thuoitu ding dang dang hai tlaing ding ani a;

Preliminary round a tling (candidate) hai chu a hnuoi a ang hi an nih:

Executive dinga candidate hai:.
1. Pu Hrangthangvung
2. Pu C. Thant Khawbung.
3. Pu Lalchungsiem Thlawngate.
4. Pu Lalthuoisuok Pudaite.
5. Pu Darsuothang Khawbung.
6. Pu Benjamin Khawbung.
7. Pu Timothy Sakum.
8. Pu L.H Hrangchal.
9. Pu V.L Renga Hriler.
10. Pu Kawllienthang Khawbung.

(a chunga mi 10 hai a inthawk hin Kum 2011-2013 sunga Chairman, Vice Chairman, Secretary, Asstt Secretary, Treasurer ding tlang ning a tih)

Nghak-upa dinga candidate hai:.
1. Nk Roslyne Lalumpui.
2. Nk Dorothy Lalneizo.
3. Nk Lalremkim Buongpui.
4. Nk Kimi Pulamte.
5. Nk Daisy Darngawn.

(mi 5 a inthawk hin kum 2011-2015 sunga Nghak Upa ding mi 3 tlang ning a tih)

Val-upa dinga candidate hai:.

1. Tv Lalneilien Inbuon.
2. Pu Sunga Khawlum.
3. Pu Lalchunghnung Infimate.
4. Pu Thanglalmuon Hrangchal.
5. Pu Lalkhawnvar.
(mi 5 a inthawk hin kum 2011-2015 sunga Val Upa ding mi 3 tlang ning a tih)

DHWA SIKPUI SPORT 2011 RESULT :-

2011-11-28T21:40:00.002+05:30

Group :-

Football pasal – 1^st Munirka & Vasant Area

Football Numhei – Munirka, Mahipalpur Dwarka V/s R K Puram & Rest of Delhi- Winner Munirka, Mahipalpur Dwarka

Footall Naupang V/s Papui – Winner Naupang

Tunnel Ball Nuhmei – 1^st Rk Puram & Surfdurjung

Individual :-

Silai kap Pasal – 1^st Upa Dr. Lasiemlien Pulamte, 2^nd V.L. Ngaite, 3^rd Zalienhmang

Nuhmei Cock Fighting – 1^st Nk. Cannan, 2^nd Nk. Mary, 3^rd Pi Zarzokim Inbuon

Tlangval Arm Wrestling – 1^st Jehova Jire L. Hmar, 2^nd Isak Parate, 3^rd Jim Blessing

Tlangval Shotput – 1^st Isak Parate, 2^nd Jim Blessing, 3^rd David Lalkhawnvar

Nupui Arm Wrestling – 1^st Pi Zarzokim Inbuon, 2^nd Pi Sary Ralsun, 3^rd Pi Rosie Khawbung

Nupui Shotput – 1^st Pi Zarzokim Inbuon 2^nd Pi Judith Sanate 3^rd Pi Judith Khawlum

Nupui Running Race – 1^st Pi Zarzokim Inbuon, 2^nd Pi Mercy Rulngul, 3^rd Pi Priscilla

Papui Arm Wrestling – 1^st Pu Samuel V. Hmar, 2^nd Pu Joseph D Hmar, 3^rd Pu Abel D Hmar

Papui Shotput – 1^st Pu Samuel V Hmar, 2^nd Pu Hminga Hrangchal, 3^rd PU Joseph D Hmar

Nunghak Shotput – 1^st Nk. Daisy Darngawn, 2^nd Nk. Joicy Zionkim, 3^rd Nk. Mary

Nunghak Arm Wrestling- 1^st Nk. Alina, 2^nd Nk. Daisy Darngawn

Nunghak Zawngmeikei – 1^st Nk. Alice Tingthiem, 2^nd Nk. Esther Lalsanhim 3^rd Nk. Roslyn Lalhmangai

Nughak Running Race – 1^st Nk. Mary, 2^nd Nk. Daisy Darngawn, 3^rd Nk. Joicy Zionkim

Naupang (1) Running Race – 1^st Seraf, 2^nd Daniel, 3^rd Sarah,

Naupang (2) Running Race – 1^st Julie, 2^nd Romuonpui, 3^rd Philip

Naupang (3) Running Race – 1^st Mosie, 2^nd Christopher, 3^rd Daniel

Naupang (4) Running Race – 1^st Calvin, 2^nd Herbert, 3^rd Lalthangsei, Zarzosang

Naupang (5) Running Race – 1^st Paul, 2^nd Kenny, 3^rd Gospel

Naupang Marathon Race – 1^st Calvin, 2^nd Lalthangsei, 3^rd Herbert

Naupang Zawngmeikei- 1^st Samuel Khawbung, 2^nd Andrew, 3^rd Gospel Ralsun

Playing Card(Zatsawm Inchu) 1^st Lalhmingthang & Lalbieklawm 2^nd Pi Sary Ralsun & Pi Hoilam

Carom Pasal Single – 1^st Ngaite Hmar, 2^nd Emmanuel Ramngailien

Carom Pasal Double – 1^st Ngaite Hmar & Damrawse Sinate, 2^nd Lalhmingthang & Lalbieklawm

Carom Mixed Nuhmei le pasal – 1^st Mordekai Joute & Lalremthar Pulamte, 2^nd James Vanlallur & Ramvarmawi Khawbung.

Carom Nuhmei Single – 1^st Ramvarmawi Khawbung, 2^nd Lalbieklien

Carom Nuhmei Double – 1^st Ramvarmawi Khawbung & H. Lalhmangaihi, 2^nd Sary Ralsun & Lalremthar Pulamte

Badminton Pasal Single – 1^st Thanglienmang Buhril, 2^nd Emmanuel Ramngailien

Badminton double Pasal – 1^st Fimthanglor infimate & Thnglienmang, 2^nd Ramngailien & Dr. Lalsiemlien

Badminton Nuhmei Double- 1^st Esther Lalramhuol & Thlirnaawnmawi, 2^nd Roslyn Lalhmangai & Elizabeth Sungte

Col Gaddafi Sȗnna

2011-11-28T21:39:00.002+05:30

-Thangnuntluong Ralsun

Ningani, 20 October, 2011

Vawisȗn chawhnung tieng NDTV 24x7 ka zuk en chu Col Muammar Gaddafi thi thu le a lim a hung inlang a, lung a ṭhâwng kher el.

A nih, Lal intlaw (Stupid Dictator) (invȇt – kawlbun chi chu ni si lo) hai chan chin ngaituo a, an thilthaw nuizatum tak tak tapsak kila lo innuipui kȇk kȇk hlaktuhai tading chun Gaddafi thina hi chânna râpthlâk tak a ni hrim a nih.

September, 1969 khan Libya Lal chu thisen insuo lovin a suon thlâk a, chu hnung chun an lal ta ngat ngat a nih. A taksa ṭhat lai deu khan chu John Travolta angna tak a neiin ka hriet. Film tieng lo lȗt sien iem chang a ti aw?

Tulai hnai (modern)a Lal intlaw tak Uganda ram rorȇltu Idi Amin chu kum 1978-a a tlâk hnung khan Gaddafi hi Dictator hai laia an tlaw lien taka ngai a hung ni tah. Idi Amin a tluk nawna tak chu mâni le mâni Title inpȇkah a nih. Idi Amin chun ama le ama hieng ang hin title an pȇk : His Excellency, President for Life, Field Marshal Alhaji Dr. Idi Amin Dada, Lord of the Beasts of the Earth and Fishes of the Sea, Conqueror of the British Empire in Africa in General and Uganda in Particular, VC, DSO, MC, CBE. Hmun tina lo tiemtuhaiin an hrietthiem vawng theina dingin ka thei tâwkin Hmar ṭawnga sie thei po hai hang inlet ka tih; hieng ang hin : Fel le ṭha chung chuong, Dam sȗnga President ding, General nȇka insang lem Field Marshal Dr. Idi Amin, Hnuoi chunga ramsa le Tuipuia Nga hai Lalpa, A tlângpuiin Africa khawmuolpui-a le A bȋk takin Uganda rama Kumpinu Lalram Hnetu. Pui vet vet tak a nih.

Kum sâwmli chuong inlal si a ieng leia Idi Amin anga title ropui deu Gaddafi hin ama le ama a’npȇk ve naw am nȋng a ti aw! Idi Amin nȇkin a var lem deu am a ni ding! Am, An tlaw lem? Kum 1969 a Libya Lal Idris a suon thlâk lai khan Captain a ni a, chu zoah Colonel hi tukhawmin an pȇk naw a, ama le ama an pȇk a nih. Mi a entawn tak Aigupta roreltu Gamal Abdel Nasser kha ama le ama Colonel an pȇk a, chu nȇka insâng chu an pȇk nawh. Chuleiin, mi tam tak chun President Nasser a entawn ni dingin an ring. Title inpȇk tieng uor naw sienkhawm Medal (Tangkapui) in pȇk tiengah hma a lâk nasa ve thung a. Dictator a ni hma Captain chen a tlung khan indonaah vawikhat khawm ṭhang si lovin Libya Tangkapui (Medal) insâng tak The Medal of the Great El Fatah (1^st Degree) chu Dictator a hung ni hnung chun a ma le ama an pȇk a. Chu cho chu an nawh, sipaihai an huoisenna le an thilthaw ṭhat leia chawimawina (Decoration) le Tangkapui (Medal) an hlaw hlak pariet zet ama le ama an pȇk a, chuonghai chu ama tading lieu lieuva a hmusuok le a siem suok an nih. Hi thil hi hril a hlawna tak a ni a, an tlâwkna suklangtu tak a hung ni hrim a nih.

A chan chin ni lovin an tlâwkna la hang sui dep ei tih. UNO Assembly 2009 khan thu a hril a, minute 15 sȗng hun pȇka um chu minute 100 zet thu a hril. UNO inkhâwma bawk Gaddafi chun, “USA President John F Kennedy tuolthina kha sui ni raw se, UN Security Council hi Terror Council ti-a ko ni raw se,” tiin a hril. USA President Ronald Regan le khan vawikhat an inhmu thiem naw a, Regan chun, “Khawsak tienga mi invȇt tak chu Gaddafi a nih, Ui invȇt (Mad Dog) a nih,” a ti a; Sienkhawm,Gaddafi chun President Regan chu ama nȇka invet lemin a hmu ve tlat thung. Tu’m an intlaw lem ding aw! Chu khȇlah, ama ngaituona ni ngei a ta, kum 2008-a Africa khawmuolpuia ram khat Lal (Monarch) iemani zât an inkhâwm a, chu taka chun Gaddafi chu “Africa Khawmuolpuia Lalhai Lal,” tiin an puong bawk. Chun, Omar Mukhtar (1862-1931) chun Italy mi Libya rama colony siema sumdâwnghai chu rawi indinin an lo do hlak a. Italianhai chun manin a rawihai mit hmuah an khai hlum a. Kum 2009-a Italy rama Gaddafi an zin ṭumin Mukhtar a lim chu a rȋngah ṭhi angin a awr a, chubâkah; Mukhtar a naupa tar takel ta chu Italy rama hin a ṭhuoi bawk. Ieng lungril am a put nȋng a ti aw! Kum hung upa-in tar hung hnai ta sienkhawm a lungril a la tar naw ni ngei a ta, nikum laia Wikileaka khan a hung chuong ve a, Ukhranian nurse pakhat châkum deu (voluptuous) leh an inthawp deu rân thu hmu a ni bawk.Inchung sâwnga riek ngam loa sâwng hnuoi tak (ground floor)a riek hlak le tuipui chunga vuongnaa vuong ngam loa hril Gaddafi hin ṭawngbau nuizatum deu deu iemani zât a lo sâk suok a, tlâwmte hang târlang ei tih. 1. Nuhmei chu a pui khawm lo nisien a chal khawm lo ni raw se, inthlangnaah ngîr dingin chanvo (right) a nei (A woman has the right to run for election whether she is male or female). 2. Facebook khap ding khawpa intlaw ka ni naw a, a hmangtuhai lungina khum ka tum lem cho a nih. 3. Hnuoi chung po poah Libya ram ti naw khawlai khawm mipui roinrȇlna (democracy) a um nawh.

Ama thlâktu ding ei zawng hma-in ama anga intlaw, a ruol û (senior) deu hai chan chin la hang zep sa vak ei tih. Cuba ram Dictator Fidel Castro chu Cuba rama Communist Party Central Committee inkhâwm hun-hawngna dingin dârkâr 5 sûng veng vawng thu a hril zie hlak. Mak thei ngei!

Kum 1990-a USSR a kawidar khan rorêltu intlaw tak tak iemani zât a suksuok hai laia mi, a danghaiin intlâwk tienga an el phâk naw damsûnga President tum Saparmurat Niyazov, kum 1990-a inthawka kum 2006-a a thi ni chena Turkmenistan ram rorêltu chun thla hminghai (i.e. January, February, etc.) chu ama ngainat zâwng lekhabu hming le hlaphuoktu hai hmingin a thleng vawng. A nu piengcham (birthday) chu National Holiday-in a siem, vûra siem Lal In (Ice palace) a bâwl. A ram sûngah pasalin khâkhmul (beard) an hla a khap, ha mel (ha tlawng ta) haiin rangkachaka ha an siem a khap, TV a nuhmei thupuongtuhaiin make-up an hmang a khap bawk. Iengleiin am? Pasal tadingin nuhmei chu make-up hmang lo khawma hmêlṭha le châkum saa pieng a ni leiin.

Ei pansak tieng aw! Kum 1962 anthawka kum 1981 chena Burma ram rorêltu (dictator) Ne Win chu mi pakhat (numerologist)in a vângneina number (lucky number) a hril pêk a. Chu number 15, 35, 45,75, 90 hai chu Pawisa note (currency note) in a siem. An leh, Col Gaddafi ai-awtu ding chu tu’m ni tang a ta? Nangin i dit tak (âwm i ti tak) lo thlang el rawh.

Zimbabwe ram Dictator Robert Mugabe chun March 2003 khan, “ Tu chen hin Hitler ka la ni zing. Hi Hitlerhin thiltum pakhat cho a nei : A mipuihai tadinga indikna, a mipuihai tadinga thuneina insâng tak, Zimbabwe ram independentna khawvêl ihrietpuina, a ram hausakna hmang dinga mipui chanvo pêk. Chu thil sukpuitling chu Hitler ei ti chun vawisâwm Hitler ning ka tih.” tiin a lo hril ve.

Central Africa ram rorêltu Bokassa chun ama le ama hieng ang hin title an pêk: His Imperial Majesty Bokassa the First,Emperor of Central Africa by the Will of the Central African People,United within the National Political Party, Leader of the Movement for the Social Evolution of Black Africa.(Lal Ropui tak Bokassa Pakhatna, Central Africa mipuihai Ditthlangna leia Lal Ropui tak, A ram mihai Political Party-a Inzawm khâwm, Africa rama Midumhai Hmasâwnna dinga Nawrtu Pâwlhai Ṭhuoitu). Bokassa hin Napoleon entawna ama in sukropui a tumnaah kum khat sûnga a Lalramin sum-le-pai a lam suok hmun thuma ṭhea hmun khat (1/3) a hmangral ve hmak.

Papa Doc Duvalier, Haiti ram rorêltu chun a ram sûnga ui dum (black dog) po po a râwt (that) hmak; Ui duma inthawk ama khingtu an hung suok a ring tlat leiin.

Khawvêla nunghâk hmêl ṭha tamna taka hril; Venezuela ram President, Hugo Chaves, tulaia Cuba-a Cancer natna inenkawl mêkpa chun kum 2006 UNO General Assembly-ah, “ USA President George W. Bush hi Setan a nih, vawisûn chen Khawhri rim a lân nam zing,” a ti ve ṭhuoi.( Khuo pakhata Pathienthu hriltuin khawlai dunga thu a hril zo chara a ti hlak angin, Ṭek ṭawk mai a, zawng tilmu ei ti khum di’m a nih?). Venezuela President hmasa tak Simon Bolivar ( Daulakuan le Gero Murty inkâra Simon Bolivar (Marg) leh inmatna an nei am?). Simon Bolivar hi thi dân pângngâi (naturaldeath) a thia ngai a ni a; kum zahni vâng a thi hnungin ni khat lai el khan Hugo Chaves hin a thlân an cho suok tir a.Simon Bolivar a ruhai chu thei patâwpin a ṭap khum a. ‘ Simon Bolivar hi misuolhaiin tûrin an vaihluma nih, a vai hlumtuhai hi hrem ni raw hai se,” a ti ve kêk. A vaihlumtu hai hi hrem thei thei dingin an la dam di’m aw!

Korea ram tieng aw! Kim Jong II, North Korea Dictator chun Margareth Albright, Bill Clinton huna Secretary of States kha a lo star hlum vâng, sienkhawm a zâwl thlûk naw ni âwm tak a nih. A mipui (North Korea mipui) hai kuomah Korea ram sûnga khawmuol (khawsiet-le-ṭhat thuah) thu nei phâk hielin an hril. Kum2010-a football World Cup Tournamentah North Korea Teamin an khêl ṭha naw leiin South Africa rama inthawka North Korea an hung vuong tlung charin Vuongna fîl (Airport)ah North Korea Team memberhai chu mani nakâwr seng inkei tirin dârkâr khat sûng nisa lum hnuoiah an ngîr tir.

Thla kuo pumhlûm deuthaw Libya sawrkâr le helpâwlhai an indo a. August thla khan a Lal In ropui tak el chu hluo ngam ta lovin Gaddafi chu a tlânsie a (ama chun tlânsie inti lovin tlânṭha an ti lem hlau). A pieng-le-mûrna Sirte-ah inbi hmangin thla hni zet helpâwlhai chun sahliem hnawt takin an hnawt thlûr ngat ngat a. Vawisûn khan an bîkhmangna tuihawkkawr (drain)ah an phawksuok a. “Mi kâp naw ro, mi kâp naw ro” tiin a ngên lawm lawm a. Sienkhawm, a ke pahniah an kâp a; a hringa manin siel angin an sawi hlum der a nih. Ama lainatu le a zâr lo zo hlaktuhai chun, “ An thawdân saw en ngam ruol a ni naw ie, a lu an lâk dân a na ie,” ti ngei an tih.

In Fam Ni Khan

2011-11-28T21:38:00.002+05:30

Ziektu: L.B.Tuolte

24^th November 2011

New Delhi

Thu vuongva ka hriet danin a hnuoia hla hi a phuoktu nia insal umin an hril a. Hi hla phuoktu (Fmt) Pu Lalrohlu a nih. Hla phuoktu thi hnunga mi dangin ‘ka phuok a nih’ tia phuoktu hming inchu hi thuthar a ni nawh. Entirna pakhat, langsar tak chu ‘Entu Mihrang Pasal\hahai’ ti hi a nih. Hi hla phuoktu chiengkuong hriet a ni naw leiin \hangtharhai an chiai hle.

‘Entu Mihrang Pasa\hahai’ ti hla sut zatin thangtharhai chu phuoktu hmingah an buoi ding a nih.

Chuleiin, ‘In fam ni khan’ ti hla hi thangtharhai chiai taka an um nawna ding le sut zata an buoi nawna dingin phuoktu kut ziek ngeia inthawk lak suok ka hung tar lang a nih.

1. In fam ni khan si-ar lai van zawlah,

Sarpui a’n zam mihrang fam hnung sunin,

Khawtlang a ngui lenruolhai \ap lai an bang thei nawh.

Vangkhuo a ngui ruoi ie mihrang an fam ni khan.

Aw, pasal\ha fam zun a na ngei el,

Chun le zuohai \ap lai an bang thei nawh.

Ram siem din’ zalenghai an tho zo tah

Hung tho nawk ro aw mihrang fam hnung hai.

2. Pasal\ha zam lo mihrang fam hnung hai,

Hawktui iengin in thisen luong hi aw,

Hmar tlangpuiah la luong suok ngei a tih.

Ei hnam riengvai par ang sukvul ngei a tih.

3. Fam thlipui in tawnah hrang vel sienkhawm,

In sulhnungah in lenruol zaleng haiin;

Ar ang vaia zanmu tuorem loin,

Hnam zalenna dar ang sai an bang chuong nawh.

4. Suithang vala ka la um an nawm le,

Hmelma doral \huom anga do dingin;

Mihrang huoisen pasal\hai lungphang naw ro;

Ei hnam reingvai par ang la vul ngei a tih.

Hi hla thu hi a mawiin a \ha hle a. |hangtharhaiin College a khawm an la hlutsak am annawleh literachar khawvela khawm ngir hmun insang an lapek ka ring a. Nakie hi hla hi kalbi kimin hrilfie a\ul hun la um thei ngai a nih. Chuleiin, a hla phuoktu hming le a phuok san hrietchieng a pawimaw. Mi pahni a phuokkhum a nih.

Hla phuoktu (Fmt) H.A. Lalrohlu, Shan Editor, ama kut ziek ngei a hnuoia ang hin tarlang an nih:

“Hi hla hi Jiribam, Manipura ka phuok a ni a; Hmar pasa\hahai MAP leh 16/5/1989 a an inkapna ah Hmar pasal\ha pahni thina an lo tuok ni, siar lai van zawlah Sarpui inzam le nu le pa lenruol hai \apna le hi thi fam zun leia tlangval tam tak hnam ta dinga an hung inpek uoiuoi leiin an ni khawm hi tho nawk dinga fielna a nih.”

Hla phuoktu hin mithi pahni hming a hril nawh. Tarik 16 Thlaphur(May) 1989 hin HPC le MAP inkapna hmasa tak Muniarkhal (Cachar le Mizoram ramri lai vel) khuoah(Tea Estate) a um a. Tlangval Lalhuoplien(Sakawrdai) le Lienhmingthang (Sartuinek khuo) an thi leia a phuokkhum a nih. MAP tieng Vanlalaua rawiin mi pathum lai an thisa bawk. An ni hming hril si loin tarik 26 Thlaphur(May) 1989 hin Jiribamah hi hla hi H.A. Lalrohluin a phuok a. Lusun hla a nih. Hla saktu chu Nienglawmkim a nih. Original Manuscript le revised khawm Ms Darrokim a kawlah a um a phocopy ruokchu ka kawlah a um a ; en nuom chun hmu thei zing an la nih. Tuta saklar hi revised a nih.

HPC Movement hin politik tieng a kakhawk a sei bek naw khawmin literachar a dingin ei hlawkpui hle. HPC movement hi an hlawtling hle ti theina ding chu lliterachar khawvelah a nih. A chunga hle le a hnuoia hi hla man tam HPC movement leia incher an ni veve.

Hi inkapna/thina le inzawmpeiin martarhai ni khawm Thlaphur(May) 16 hin ei hmang ta pei a. Martar Day hla:

1. Hi khawvel hnam ze tinrenghai ta din,

Hmun le ram Chungkhuonuin a lo ruotpek;

Hmar naulenghai khawm hmun le ram chu zawng veiin,

Val mihrangha’n an hringna an inhlan.

Mihrang fam lo changhai in ta din hun le ni,

A tharin kan hung inhlan cheu;

Hmar nau zaleng ruolhan May 16 ni hi

Martyr Day(Martar Ni) din kan inhlan cheu.

2. Ram santu mihrang buonleia zal ta hai,

In tlawmngaina kan innghil thei lul nawh;

Tlang tin muol tinah sam ang lo zal inla khawm,

In sakhming hril hi bang thei nawng kan tih.

3. Ram le hnam ta dinga mi tlawmngai hai le,

Hringna chen lo I nhlantuhai leiin;

Ei hnamin par ang vul ni la nei ngei a ta;

An sakhming \hangthar lai mawi zuol a tih.

(By Laltlansung, Patpuihmun)

TAWNGBAUHAI 20 November 2011

2011-11-28T21:34:00.002+05:30

@@ +919999929907 begin_of_the_skype_highlighting +919999929907 end_of_the_skype_highlighting: Tulai chu Pastorpa le U Chungin thei an du tak a; chu dawtah Timothy in.

@@ Brother Papatre: Five Star a mi fak ding inchaw ngai thak naw ro. Because, an hmehai sawh computerised vawng ana, taksa ta ding khawma a tha nawh.

@@ Pu Dr. U Chunga Infimate: Living things hman ei siem thei chun Non-living things lem chuh siem thei ding ei ni ringawt!

@@ Nk. Lalthangpui: Tukum chuh vengah hang suok ka ta, um sawng dingin insiem tawp el tang ka tih. Delhi hi chuh ka ning an tel pawt chu an tah.

@@ Tv. Lalhmunlien Darngawn: Tulai phone suok tharhai hi chu a rapthlak tawl ta ngei maw…dual sim, dual battery, dual screen, dual camera, dual buetooth ti vel vawng an tah. Chun, a suok thar takhai lem hi chu multi-purpose ang kha a ni hmel tie! Khaaa…, samkhitna khawma hmang thei ang chi khah.

LAWRKHAWM 20 November 2011

2011-11-28T21:34:00.000+05:30

Mid-Term Exam Tan Mek

Zing, November 21, Thawtanni a inthawk khin Delhi University hnuoia Undergraduate course hrang hrang, Semister System thar hmang tah, hai chun Mid-Term Exam tan tang an tih. Anni el khelah hin DU le JNU a Postgraduate Course inchuk mek hai khawma Exam dang dang leiin lekha tiem an inhawmthaw tawl hle a. Mi lekha tiem sukbuoi zawnga khawsa lo dinga fimkhur nawk zuol dingin mitin ei in fiel thar a nih.

DHWA Sikpui Sports 2011

Kum tina ei lo nei hlak angin tukum khawm Sikpui Sports hmang a ni ngei theina dingin ei chu thuoituha’n thang an hung lak a. Chu le inzawm chun vengbuk hrang hrang a hai carrom le playing card chu nei a lo ni ta khah.

Final Day chu November 26 a Central Secretariat Ground a hmang dingin ei thuoitu han riruong an lo siem ta bawk a nih. Thu chieng lem chuh a sunga hmu thei a nih.

Thalai Inkhawm Programme

Kar thar, November 25 zana Thalai Inkhawm programme chu a hnuoia ang hi ning a tih:- Conductor-Tv. Isak Parate; Tantu-Nk. Canaan Changsan; Special No.,-Tv. Zawlkapthang; Thuhriltu-Rev. J.Thanglur. Hi inkhawma thang ve ngei dingin DT tiemtuhi po po fiel ei nih.

Lawmthu Hrilna

2011-11-28T21:32:00.002+05:30

North East Tamchon Football Tournament 2011 chu October 22 – November 5 sung khan nei a lo ni tah a. Organisers, TNSD hai mi fielna suk puitling theiin HSA, Joint Headquarters, Delhi khom hi tournament a thrang ve theiin a um a.

Pathien zar le mimal le pawl tamtak hai zar chauin ei thang ei suo thei a ni a. Second Runners-up (a pathumna) hai chen ei lak phak a nih. Ei lawm takzet.

August thla khan HSA-Tamchon Committee 2011 chu indin a hung ni a. Iengkhom sum-le-pai um der loin ringna chau leh hma lak tran nghal a ni a. Pawl / Organisation le mimal tamtak indawr puiin, fund raise dam thawin hma lak pei a ni a. Ei hriet seng ring a um; Hieng thil a ding hin sum hmu a harsa em em hlak a. HSA hming sala kut daw el a trul chang dam a hung um hlak a. A dawltu ni khom a rinum a, a petu ni khom rin a um viu hlak. Kum bula inthoka annual planning thra tak le fumfe tak neia thil thaw a ni ngai naw leiin hmalak a harsa hlak. Hi lai tak hi chu sukdik thei ni ta em em sien nuom a um hle. Hmatieng peia chu Planning thratak nei tum tang ei tiu. ‘Delhi mipui hai lai kut ei daw vet kha chu thaw ta naw hram ni sien’ ti kha agenda lien tak ni sienkhom, a tawp-a chu thaw lo thei loin a hung um nawk a. Mi tlawmngai ei hung zong nawk el chu a ni kha. Delhi khawpui le hmun dang danga um, Pawl chi tum tum le mi tlawmngai hai po po chungah HSA-Delhi Tamchon Committee-2011 hmingin LAWMTHU kan hung hril a nih. Delhi Thurawn fe thleng a kan LAWMTHU hrilna hih kan lungril anthok ngei a nih ti khom mi hre pek inla kan nuom. Sum-le-pai wl khel ah Trongtraina a mi lo santu le Ambedkar Stadium hmuna HMAR UNITED hung support-tu hai po po chungah Pathieninin a hrietfuk, HMAR hnam hmingin lawmthu kan hung hril bok cheu a nih.

HSA – Tamchon Committee -2011 in Contribution a hmu hai po chu a nuoi ah ei hung tarlang a nih:-

1. Tv.Thanglienmang Buhril – `.500

2. Tv. Thathang Buhril - `.500

3. Pu L.H Ruolngul – `.1000

4. Pi.Haulintling – `.500

5. Pu Suothang – `.2000

6. Pu L. Thagen – `.2000

7. Pi D.F. Dinpui – `.500

8. Pu Hrangthangvung – `.2000

9. Nk. Pauline Hmar – `.1500

10. Pu Suonga Khawlum – `.500

11. Nk. Roslyn Lalumpui- `.2000

12. Tv. Francis Lalnunmawi – `.1100

13. Pu Thachunghnung Joute – `.3000

14. Tv. Jacob Sakum (Mumbai) – `.1000

15. Pu Lalbieksang – `.1000

16. NEREFS – `.20000

17. Dr. Upa Lalsiemlien – `.3000

18. Nk. Lalfamkim – `.1000

19. Pu Lalchungsiem – `.500

20. Nk. Linda Tusing – `.1000

21. Tv. Immanuel Joute – `.1500

22. Nk. Alice Vanrammawi – `.1000

23. Pu Timothy Sakum – `.1000

24. Pu Darsuothang – `.500

25. FA YAN – `.1000

26. Pu John Duhlian – `.3000

27. Pi Rodingpui – `.500

28. Tv. Lalfakzuala Hrangchal – `.10000

29. Nk. Sylvia Buongpui – `.1000

30. Pi Landymore – `.2000

31. Pi Abigail Dawn Frazen – `.5000

32. Mercy Intoate – `.1000

33. Pu Lalchunghnung Infimate - `.1000

34. Pi Zarzokim – `.500

35. Nk. Zionkim – `.500

36. Nk. Rody Hrangate – `.1000

37. Nk. Mawite Buhril - `.2000

38. Nk. Lalbieklien – `.1000

39. Tv. Lalsiemdik Tusing – `.3000

40. DHWA – `.15000

41. Tv. Vanlalhruoi – `.500

42. Pu Andrew Varte – `.500

43. Tv. Paul Rosang – `.500

44. Tv. Lalropieng – `.500

45. Nk. Remthar Pulamte – `.300

46. Pu J.S Ringum – `.500

47. Tv. Vanronghak – `.1000

48. Pu V.L Renga -

Sum hmangna thlangpui:-

Outstation player token money – 56400

Delhi player token money – 19300

Player hai flight ticket man – ` 56700

Match ni a Player hai Bus hire man - `. 15600

David Lalkhawnvar Edward Sungte

Manager Coach

Hmar United

DHWA Sikpui Sports 2011

2011-11-28T21:31:00.002+05:30

Tu kum Delhi Sikpui Sports chu 26^th November hin Central Secretariat Ground a nei ni nawk a tih. Sun dar 12 a inthawk zantieng dar 5 chen nei nieng a tih.

Ei sikpui sports a hlawthling na ding a tam thei anga thang tum seng dingin eiin fiel a nih.Sports item ding hai chu a hnuoia hai hi ning a tih:-

1. Football

2. Arm wrestling (Nuhmei Le Pasal)

3. Long jump (Nuhmei Le Pasal)

4. High Jump (Nuhmei Le Pasal)

5. Cock Fighting (Nuhmei Le Pasal)

6. 100 meter race (Nuhmei Le Pasal)

7. Needle race (Nuhmei Le Pasal)

8. Sack race (Nuhmei Le Pasal)

9. Musical Chair (Nupui, Papui Le Naupang)

10. Tug of war

11. Baloon sirkawi (Nuhmei, Pasal Le Naupang)

12. Carom finals (Nuhmei Le Pasal)

13. Playing card finals (Nuhmei Le Pasal)

Area inthe dan:-

1. Munirka & Vasant Vihar

2. Mahipalpur & RK Puram

3. West Delhi, North Delhi & Dwarka

4. South-ex & Rest of Delhi

Phlegon Chiru

Secretary, Games & Sports, HSA Delhi