LAWRKHAWM

Tv. David Faiheng A Boral

Tv. David Faiheng s/o Darhmangpui (Nehru Marg, Rengkai) chun Liver & Kidney Failure leiin zani 12:45am vel khan AIIMS, New Delhi ah ah ami lo boral san tah. DHWA le HCFD chun vawizan khan a sangnu Hnemi hai chengna 224 E-2, Vasant Kunj ah ralna hunser hmangin nunghak tlangval ha’n an lumen pui a.  A ruong hi vawituk khan Tuithaphai panin an lo fe pui ta bawk a nih. Lusun tuortuhai ei sunpui takzet.

 

DHPL-V Hlawtling Taka Zo

August 4 khan Delhi Hmar Premier League-V : (L) Fimlunghnem Memorial Trophy 2012 chu DDA Sports Complex, Vasant Kunj, New Delhi ah hlawtling taka zo fel a lo ni tah. Ei khawtlangah mithi nei inla khawm ei programme leh an tawk buoi naw leiin thul ding anga ngai hnung chuh fe thleng pui a ni nawk a. Inkhel zo in lawmman semna hun khawm hmang nghal a ni a. Khuplal FC hai chun final ah Habakuk FC hai 4-2 a hnebanin hrat tak nina changin lawmman sum fai cheng 10,000 le trophy an dawng. Lawmman (sum fai) hai hi DHWA Chairman Pu C.Thant Khobung in a’nhlan a, (L) Fimlunghnem Memorial Trophy ruok chuh Rev. Ramchuoilo Varte’n a’nhlan ve thung. Mimala thaw tha bik lawmman dawngtuhai chu-

Top Scorer: Tv. Lala Buhril (Khuplal FC)-6 goals;        Best Striker: Tv. Lalramlien (Habakuk FC);            Best Midfielder: Tv. Lalmalsawm Mihriemate (Faith United);          Best Defender: Tv. Stephen L.Ruolngul (Habakuk FC);  Best Goalkeeper: Tv. Damrawse Sinate

Delhi Zawm Thar a Sin Hung

Tv. Rohminglien Songate S/o Pu Rema Songate, Parbung chun Central Vigilance Commission, Delhi ah Assistant sin a lo hung zawm thar ve tah niin chanchin ei lo dawng. Ama hi SSC Combined Graduate Level Exam, 2011 a tling kha a nih. Officer ei pung peia lawm a um takzet. Hlawtlingna chang pei dingin ditsakna ei inhlan nghal bawk a nih.

 

Sin Thaw That Lawmman

Delhi tlangval lo ni hlak, Central Reserved Police Force (CRPF) a Assistant Commandant sin thaw lai mek Tv. Lalropui Pudaite S/o Dr Rosiem Pudaite, Sielmat chu a sinthaw that leiin Appreciation Certificate, DG's Commendation's Disc le sumfai Rs. 25,000 inhlanin a um. Ama hi Ranchi a posting mek a nih. Hieng ang lawmman a dawng hi DT chun a lawm pui takzet.

 

Assam CEE a Hlawtlinghai

Tukum Assam rama Common Entrance Exam a hlawtlingna chang ei hriet thei hai po chu-

MEDICAL
1. Nk. Rebecca Lalnunfel D/o Thangnuntluong Ralsun, Guwahati (GMC)

2. Tv. Isaac Lalmalsawm S/o Mr.Hmanglienvung, Hmarkhawlien (GMC)

3. Nk. Vanroparvul D/o Michael Hmar, Muolhoi (DMC)

4. Tv. Michael Lalruotsang S/o Mrs. Lalrinpui Diphu (JMC)

5. Tv. Samson Thiek S/o Lalawilien Amo. (SMC)

ENGINEER
6. Tv. Jessie Lalpiengzuol S/o Ringsuothang, Hmarlushai Vill. NC Hills. (Electrical Engg. Jorhat)
**. Nk. Ramhlimum D/o Dr. Ginte, Rengkai (Manipur Quota) (Electrical Engg. Guwahati)

Lawmpui an um tawl takzet. Hlawtlingna insang lem chang pei dingin ditsakna ei inhlan.

 

HCFD Thalai Video Lak Zo

August 1 & 2 khan Department of Music & Youth Affairs, HCFD chun an Music Video Album Vol-II a ding video lakna an nei a. Ei inkhawmna biek-in Apostles’ Methodist Church, RK Puram le Cathedral Church of Redemption, Church Road ah shooting hi nei a ni a. A hlawtling thawkhat hle ni’n chanchin ei lo dawng. Hi album hi Pathienin ropui taka a hmang ngeina dingin lo tawngtai pui zing ei tiu.